سؤال للخبراء بخصوص أقسام الحاسب الالي

[SaraNa]

[FONT="Mudir MT"][FONT="anaween"][FONT="Simplified Arabic"]السلام عليكم ورحمة الله وبركاته
أنا طالبة بالمرحلة الثانوية، نظرا لكوني بالسنة الاخيرة بدأت بالتفكير عن التخصص المناسب لي، قررت الدخول بعالم الحاسب الالي لمهارتي فيه، وأثناء بحثي في أقسام الحاسب الالي وجدتها متشابهة ولم أستطع التفريق بينها بشكل واضح.

أسئلتي:

- هل تخصص هندسة البرمجيات يركز على الجانب العملي، من لغات برمجة وما إلى ذلك، أم أنه يحلل فقط؟

- ما هو تخصص تقنية المعلومات؟

- بالنسبة لتخصص الأمن السيبراني في جامعة الملك سعود، عند بحثي عنه وجدت أنه تابع لتقنية المعلومات، كيف يكون ذلك؟ هل تتم دراسة سنة تحضيرية أولى ثم الانتقال لتنقية المعلومات وبعدها أمن سيبراني، أم دراسة سنة تحضيرية وبعدها الإنتقال للأمن السيبراني؟

- هل الأفضل دراسة علوم الحاسب للبكالوريس وبعدها أختيار تخصص دقيق للماستر والpHd؟

- ما أفضل تخصص للحاسب الالي من ناحية سوق العمل؟

"رجاءً لا تنسخ كلام من المواقع وتدلي به، أريد كلام من شخص فاهم يستطيع ايضاحه لي"


شكرا لكم

[Hadiuh]

وعليكم السلام ورحمة الله وبركاته

بتكلم عن تجربتي في كلية الحاسب جامعة الملك فيصل.

اول شي لازم تخلص التحضيرية بعدين تنتقل الى الكلية وحسب الخطة 4 سنوات دراسة
حاليا اول سنتين مواد عامة ومن ضمنها مواد حاسب عامة
التخصصات المتوفرة : علوم حاسب و نظم معلومات والشبكات والاتصالات وقريبا هندسة الحاسب
انا تخصصت نظم المعلومات وهذا التخصص يركز على قواعد البيانات وتحليل النظم يعني مثال اخذ المتطلبات من العميل واحللها ويكون فيه تناقش الين مايكون جاهز واسلمه الى المبرمج يسوي النظام حقيقي<<مثال
بالنسبة لعلوم الحاسب يركز على البرمجة والمنطق والرياضيات هنا فيه اكثر<<اذا تبي تصير مبرمج التخصص ذا مناسب
بالنسبة للشبكات: درست مادتين عنهم وكلها اساسيات وكانت حلوه تعلمك الاساسيات عن الشبكات والاتصالات وماتعمقت فيه
بالنسبة لهندسة الحاسب :الى الان مافتتح القسم ولكن فيه مادتين عامه عنه مثل الالكترونيات ويتكلم عن القطع الالكترونية وكيف الكهرباء يمر فيها ودوائر كهربائية وفيه مادة ثانية اسمها الأجهزة الرقمية تقريبا تعمق زيادة في الالكترونيات ويكون فيه تتعلم الارقام الثنائية (10110) هذا جزء منها.

بخصوص هندسة البرمجيات هذي مادة موجوده في تخصص علوم الحاسب اتذكر كان فيه محاضرة عامة عن هذا المصطلح وكان انه يحلل البرنامج ويشوف الاخطاء اللي فيه .

اتمنى افدتك والله يوفق الجميع.

[P e a c e]

وعليكم السلام ورحمة الله وبركاته

بالنسبة لسوق العمل
هناك تخصصات دراستها سهلة وفرصها الوظيفية كبيرة جدا مثل مشغل حاسب Computer Operator لكن رواتبها أقل من التخصصات الأخرى، والمؤسسات في حاجة دائمة لا تتوقف لهذا التخصص
وهناك تخصصات دراستها صعبة جدا لكن رواتبها عالية جدا مثل مدير قواعد بيانات أوراكل أو حامل شهادة CCNP لشبكات سيسكو
وهناك تخصصات دراستها صعبة لكن فرصها الوظيفية قليلة جدا، مثل البرمجة
لما تاخذي شهادة برمجة راح تلاقي وظيفة بسهولة، لكن ما راح تكون وظيفة مبرمجة، بتكون أي شي آخر قريب منه، دعم فني، شبكات، تشغيل، إدارة قواعد بيانات
لكن البرمجة صعب جدا تجي شركة وتقول لشخص توه متخرج تعال شارك في عمل نظام لشركتي، وحتى لو حصل ذلك فمن الطبيعي أن فرصة صيانة الأنظمة أكبر بكثير من عمل الأنظمة
مثل في عالم السيارات مثلا، كم مصنع سيارات موجود، وبالمقابل كم ورشة صيانة
في نفس الوقت يعتبر تخصص البرمجة أفضل تخصص من ناحية لو حبيتي تشتغلي لحسابك الخاص
الكثير من المؤسسات الصغيرة، مثل مكاتب السفريات أو المكاتب العقارية أو المطاعم وغيرها تشتري برامج البيع اللي تستخدمها من مبرمجين يشتغلون لحسابهم الخاص
وفي هذي الحالة مهم يكون عندك إلمام جيد بأكثر من مجال. كأمثلة: برمجة بلغة الفيجوال بيسك دوت نت، بايثون، ولغات وبرامج تصميم المواقع مثل HTML و WordPress وأيضا قواعد البيانات والشبكات وشوية معرفة ببرامج تصميم مثل الفوتوشوب، وكل ما كان إلمامك أكبر قلت حاجتك للاستعانة بالشركاء.

لو حابة تاخذي فكرة عامة عن تخصصات الحاسب على شكل دورات، أدخلي دورات MTA
فيها عدة أقسام تتعرفي فيها على علوم الحاسب المختلفة، Operation, Database, Security وغيرها، وبشكل مبتدئ للمتخصصين في الحاسب واللي حابين يحضرون لدورات متخصصة أكثر مثل
MCSA للمشغلين
و CCNA و CCNP للمتخصصين في الشبكات
ودورات SQL و MySQL لقواعد البيانات

وبشكل عام ما سيحدد تخصصك الحقيقي هو وظيفتك وليس دراستك
ممكن تدرسي شبكات وينتهي بك المطاف مديرة قوعد بيانات
أو تدرسي قواعد بيانات لكن تشتغلي موظفة دعم فني

مثل لما شخص يدرس فيزياء بعدين يصير مرشد طلابي
أو يدرس جغرافيا وبعدين يصير مدرس رياضة

فتخصصك الجامعي راح يحدد المجال العام لشغلك
لكن وظيفتك هي اللي راح تحدد تخصصك الدقيق
وهي اللي لازم تركزي عليه وتطوريه


فيما يخص الدراسات العليا ما عندي جواب محدد لاستفسارك لكن بشكل عام كل شهادة عليا يجب أن تكون متعلقة بما قبلها
أفضل شي تاخذي لك طلة على الجامعات اللي تعطي ماجسيتر ودكتوراه علشان تعرفي شروطهم للقبول
ممكن تدرسي تقنية معلومات وبعدين تجي تاخذي ماجستير أمن شبكات والجامعة تقبلك مباشرة، او ممكن تشترط عليك بعض المواد التكميلية، يعني تشترط عليك تدرسي سنة عندهم وتاخذي بعض مواد التخصص قبل البدء في برنامج الماستر، مثل ما يحصل لمن يريد دراسة ماجستير إدارة الأعمال وهو غير متخصص في إدارة الأعمال، أو ربما ترفض لأن تخصصك السابق ليس شبكات مثلا
فالأفضل التأكد قبل هذي الخطوة المهمة

أتمنى أكون أفدتك
وبالتوفيق إن شاء الله