ظاهرة واقعية ..

[l a v e n d e r]

.
.

صباح نقي كـ نقاء الندى ..

كنت أتمشى بالصور وسرحت بفكري لما شفت الصورة التالية ..



م اعرف الشخصية للأمانه ..

لكن أكيد مو خليجي

م علينا

الملفت سواء بالأفلام او المسلسلات او حتى الواقع لما نسافر برى ..

الرجل الأجنبي يفي لزوجته المتوفاه ..
عكس الرجل الخليجي " السعودي" بالتحديد ..
يفكر بالزواج وهو بالعزا أساسا ! وحدثت أمامي ..
وتزوج بعد شهر أو شهرين من وفاة الزوجة ..
وطبعا نفسية أبناءة وبناته بالحضيض بالتأكيد ويتصبرون حتى لا يزعجوا والدهم ..

العجيب أن حتى النساء " بالمجتمع " ..
يؤيدون موقف هذا الرجل وأنه طبيعي بيتزوج ..
" رجل كبير من يخدمة .. ؟ "
" مين يعطية ماي بالليل "
مين ومين ..


طيب م الفرق بين الرجل الأجنبي والرجل العربي ..
هل الرجل الأجنبي م يحتاج خدمة ..؟
ولا رجل آلي وماله طلبات وأدوية زي السعودي المسكين ..

هل الوفاء عند الرجل والإخلاص لإمرأه واحدة فقط في حياته صعب .. ؟
هل الوفاء قد يكون موجود بغض النظر عن زواج الرجل وتعددة ؟؟ "
لا أظن

للعلم ..
لا اتعجب او انكر زواج الرجل بعد وفاة الزوجة إجمالا ..
العجب فقط
" لماذا لا يستطيع الوفاء لذكراها .. "
او على أقل تقدير ..
الإنتظار لوقت " ... " احترام لذكراها فقط ..
احترام لمن كانت تملئ حياته ..
احترام لمن كانت تخدمة ..
احترام لمن كانت له الملجأ في ضيقة والسند ..

وبعدها بطبيعة الحال وسنة الحياة سـ ينسى ويعيش حياته ..


التوقيت
هو محور العجب والانزعاج ..
بغض النظر الموقف للذكر او انثى ..
الحاله الإنسانيه هي التي تهمنا هنا ..

مشاهدة مواقف عدم الوفاء بحد ذاتها تؤلم ..
فكيف بالعيش بها ..

.
.


الموضوع مفتوح للنقاش بكل التفاصيل ووجهات النظر والزوايا

تحياتي لرواد القسم الكرام ..
ومشرفية ..

.
.

[Dark Chocolate]

اهلاً و سهلاً نور القسم

و الله يا كبيرة مادري عن الاجانب و وضعهم مع حريمهم هل هم اوفياء او لا ..

لكن بتكلم عن اللي حولي للاسف ما مرت علي قصة اعرف اصحابها شخصياً كانوا اوفياء لزوجاتهم ..

شيء ثاني لو صار العكس و الزوج هو اللي توفى غالبية المجتمع ما يتقبل زواج الارملة الكبيرة في السن ليه


-

[نسيم الصبا]

كنت استغرب مثلك إلى ان تعودت وصرت أراه شي طبيعي..
لما كنت صغيرة جارنا تزوج بعد وفاة زوجته بحوالي اسبوعين،احس اني اكرهه للحين
وصديقتي توفت امها وبعد شهر تدور عروس لأبوها،تقول والله احس قلبي يتقطع بس ندور له احنا احسن من واحد يزوجه بنت صغيرة وهو شايب..
المهم..
مدري ايش الجواب
لكن ممكن ضعف في الرجل الخليجي انه مايقدر يعيش بدون امرأة
أو انه فاضي ماعنده شي يشغل وقته بعكس الأجنبي
خلينا نشرشحهم شوي ونطلع حرتنا في هالموضوع
بس عشان مانظلمهم
مو كلهم،امي توفت وانا صغيرة وابوي ماتزوج الا بعد تقريباً سنه، وماراح يتزوج اي وحده..
لكن عذراً (ابوي مو زي الناس )

[مــطــنــوخ]

وين الغربي ما وفالها وهي حية تبينه اذا ماتت أرجوكم لا تعممو عشان موقف شفتوه
قبل يومين بأحد القنوات سعودي يبكي حرمة المتوفاة اللي لها كم سنة
وهذا اللي أنا أشوفه في مجتمعنا
وبعدين وش دخل زواجه عقب موتها بالوفاء
لاصار عندة صغار من يراعيهم
أعرفلكم رجال تزوج بس عشان عيالة وتزوج اخت زوجة المتوفية وهو مايبي الزواج أبدوكل أنسان وله سبب

[{تهاويل}]

السبب الحقيقي في هذه السمعه
ان النسوان مايتكلموا ولا يتناقلوا قصص
الا الرجال الي يعتبروهم غير اوفياء
الاوفياء موجودين مثل هذا الي في الصوره
واكثر منه
في عندنا ناس تمرض لان زوجته توفت
ويبكي في كل شيء يذكره فيها
ولا يبحث عن زوجه ولا شيء اذا ماعنده اطفال صغار بالذات يحتاجوا لعناية امرأة
فيه ناس عندنا حتى بناته واولاده يبون يزوجوه
وهو مو متقبل انه يجيب وحده تحل محل زوجته (هذا رجل عمتي بعد وفاتها)
فيه امثلة كثيرة جداً
رغم ان الوفاء الحقيقي هو الوفاء بها في حياتها
الاجانب ياما نسمع ويما نشوف عن تجاوزاتهم في حياتهم
النسوان فيما يخص هذا الموضوع عندهم تعميم مو طبيعي على الرجال.
والحمدلله مازالت الدنيا بخير

[-PEARL-]

-

وصبـآحك جميل كـ جمآلك ,




والله الوآحد ينربط لسآنه في مثل هالموآضيع

ويعلق ..

ويدقر ..

وكل شي

من كثر الكلام اللي بينقال


أعجز عن التعبير ب صرآحه

يابنت الحلال , حتى لو انه يكرهها ومايحبها ويبيها تموت اليوم قبل بكره

اقل شي , اقل شي

قدّر الموقف ..!

المره ماتت والله يرحمها

والناس جايين يعزونه وهو تلقينه يفكر من بياخذ

يامُسلم , شوية اححساس




وياكثر هالمواقف اللي تصير زي كذا .. هذي تموت منا وهو يعرس منا


بالمقابل لو هالشي صاير لمره , وعقب ماتخلص عدتها وقدر الله انها تتزوج مره ثانيه ..

تعالي شوفي الكلام اللي بينقال


ليه يعني هو حلال عليه وهي حرام ؟

عالاقل جلست 4 شهور .. حتى لو انها غصبا عنها

جلست


وفي نفس الوقت مانظلم الجميع , والله فيه رجاجيل
يحـبون حريمهم ويموتون فيهم , ومايرضون بغيرهم


بس طبعا ذولي فئه نآدره , اتمنى انها تنتشر

[الثنيان7]

صباح الخير
شكرًا على دعوه اختي

[مجتهد ..]

صباحكم الكادي والزعفران ..

أولا ما هو مفهوم الوفاء ؟! وما هي صفاته ؟!!


هل الوفاء بعدم الزواج بعد وفاة الزوجة أو الزوج ؟!


الشرع حلل التعدد في الزواج وزوجاته على قيد الحياة، فما بالك بمن كانت لديه زوجة واحدة ووافاها الأجل؟!


يقول المثل ( عزوبي دهر .. ولا أرمل شهر ) يعني اللي اعتاد على الأنثى ومشاعرها في حياته يكون من الصعب عليه أن يستمر وحيدا بعد أن يفقدها


وبالنسبة للرجل الغربي عنده صاحبات كثار يملون عليه الحياة .. سواء في عمله أو جيرانه أو عائلته أو في المحلات التجارية اللي يزورها دايما أو في الشارع .. يعني ما عنده مشكلة وهذي طبايعهم اللي نشأوا عليها .. الأنثى معاهم في كل مكان من يولد لين يدفنونه


أما عاداتنا وحدودنا الإسلامية تمنع ذلك وأحلت الزواج الشرعي والتعدد .. ولكن يختلف مفهوم الوفاء من شخص لآخر حسب حجم الدراما اللي يبغى يظهر فيها، بعضهم لا ماتت زوجته اعتزل الحريم وجلس حزين طول عمره، والبعض يلحق زوجته من شدة الكآبة يموت، يا أخي الحي أولى من الميت .. الميت يحتاج دعوة صادة وصدقة تفيده في قبره ، ما يحتاج مننا نعيش في حزن وكآبة بسبب فقده لأن هذا لن يفيده بشيء




شكرا لك لافندر على الطرح .. وخل عنكم mbc دراما

[.Perfect]

.





موضوع جميل جداً


اللي مايوفون لزوجاتهم بعد الوفاة هذي حالات فردية بالمجتمع تعتبر ولا اشوف انها مقياس للرجل السعودي خصوصاً , شفنا نماذج يضرب فيهم المثل , شخصيا اعرف شخص تزوّج وحده وطلعت خالته من الرضاع وكره الحريم من بعدها ولا رضى بتزوّج مع ان بهالحاله له حق يشوف حياته بعيد عن العواطف ,


بالنّسبة للرجل الاجنبي كنت دايم اقول الاعلام الاجنبي يقوم على سياسة الغزو الفكري من طلعنا على الدنيا بحيث انه يورّينا اللي يبينا نشوفة , على نفس المنوال من ينادون بحرية المرأة يشوفون الغرب ك مثال مقدّس , ومادرو ان اكثر حالات تعنيف واضطهاد واغتصاب للمرأة بالخارج بمجتمعاتهم , لكن الاعلام موجّه لتدمير عقيدتنا .


نرجع للموضوع , المسيحية ك علاقة زوجيّة تحرّم الطّلاق مالم تزني المرأة , وعندهم لو وقع الطلاق معناتها وقع الزنى , ويحرّم زواج المطلّقة عقوبة لها بسبب زناها , عشان كذا نشوف انهم يعيشون مع بعض قبل الزواج ويجيبون عيال بعدين يفكرون يتزوجون حتى لو انفصلو مايعتبر طلاق وتمرد على الحياة الزوجية ,
ومن ناحية الترمّل يعتبر الزواج الثاني بعد وفاة الزوجة اقل درجة وبعض القديسين مايجيزونه ويحرمونه في مذاهب , وعندهم ايضا ان الزواج بعد وفاة الزوجة علامة على عدم المقدرة على ضبط النفس وضعف + ومايلجأ للزواج بعد الوفاة الا رجل " نجس " ويحرم من الكهنوت !! واهم مقولة يطبقونها " عفّة الزواج حسنة , ولكن زهد الترمّل احسن "


ولو حصل وتزوّج شخص بعد وفاة زوجته ياخذون اجراءات متشددة عليه منها انهم يبعدونه عن الكنيسة وعن الاسرار المقدّسة لمدة سنتين واللي يتزوج ثالثه بعد وفاة زوجته الثانية يبعدونه ثلاث سنوات ... الخ
+ زواجه مايحضر وليمته القسّيس + مايصلّون في هذا الزواج حسب عاداتهم وامور كثير يتخذونه ضد من يتزوج بعد وفاة زوجته .+ التعداد محرم ولافيه جدال عندهم .


لذلك نقول الحمدلله الذي فضّلنا على كثير من خلقة وانعم علينا بنعمة الاسلام , وعدم احترام العشره هذي مسألة اخلاقية من الشخص نفسة ولاهي مقياس للرجل السعودي او العربي .




يعطيك العافيه يآعيني

[تك تك مخك معاي]

حيييها هي ومواضيعهاا ,, اشتقنا



بالنسبهه للوفآء : من لم يوفيك حيا لن يوفيك وانت تحت الثراء > م يحتاج تصفيق

من وجهة نظري فالموضوع : الوفاء يعتمد على الشخص نفسه , والقصص شتى عن هكذا امور وتختلف من شخص عن الثاني .. ! مو كلهم سوى ومانقدر نحكم ع الجميع


لكن انا معك في نقطة ( الوقت ) ! بعض من الرجال من الممكن انه م يقدر يعيش دون مره
بس مو بهالعجله , فعلا تصرف م نبالغ لمن نقول غير انساني ( اتكلم ع العجول مره زي اللي بحالة جار نسيم الصبا غبني )

( حتى لو تزوج بعد حين من وفاتها .. هذا م يعني انه مافي وفاء لها .. بمعنى : مثلا فعل كثير من الخيرات عشانها , كفل يتيم او تصدق عنها , م ينساها من دعاه , يصل اهلها ولا يقطعهم / هذا بحد ذاته وفاء !
واول مثل الرسول صلى الله عليه وسلم : لمن تزوج م نسى امنا خديجة رضي الله عنها / حتى ان عائشة كانت تغار منها من شدة ذكر الرسول وحبه لها )

طرح رآقي من انسآنه رآقيهه : لآعدمناتس