[ السنة التحضيــرية ] : احد يهدي من خرعتي شوي !!

[reemm7]

السلام عليكم

ماني عارفه شلون اصفصف الكلام من اللخبطه و الخرعه , انا ولله الحمد انقبلت في اداب الدمام وسويت كل شي وطبعت اشعار القبول وبس . اسألتي هي

اللحين بعد م طبعت اشعار القبول , فيه شي اسويه !! ولا خلاص ماعاد افتح موقعهم لين م تجي الجامعه ؟؟

طيب اول يوم الجامعه وش اخذ معي من اثباتات ؟

اللبس وش اللبس !! يعني وش شروطهم و عادي اقعد بعباتي طول اليوم !

طيب الساعه كم اروح للجامعه و الساعه كم ارجع !! و البريك كم ساعه ؟ و اقدر اطلع من الجامعه في البريك و لا م اقدر ؟

انزين الجوالات عادي كاميرا مو !! يقولون لازم يكون لي لاب توب صدق ؟ عادي ايباد !!

لنفرض عندي محاضره الساعه 8 عادي اجي الساعه 8 الا ربع ولا لازمم الساعه 6 زي المدرسه !

المشاركه وش قصدهم فيها !! ليكون يعني انا استاذه انا استاذه !!!!! طيب انا م احب اشارك ابد احب اكون صامته عادي م يخسف درجاتي ؟ واذا سرحت في المحاضره بتقومني الدكتوره اقول اللي قالته !! تراي متعقده من هالحرككككككككككات :)

طيب وش ندرس اول سنه ! ووين القى الكتب ! وهي غالية ؟

المكافأه متى تنزل ؟ ومتى اعطيهم حسابي في البنك !

طيب اللي يدرسون اول سنه رجال ولا حريم ؟ من اسهل في التعامل طيب ؟

الاختبارات كيف ؟ يعني كله اختاري ولا اسئلة عادية ! ولا هذا يرجع للمعلم نفسه ؟

طيب كم محاضره في اليوم ! وكم مدتها ؟

ادري اسألتي كثير لكككككككككككككككن انا اكبر خواتي و لا عندي احد يعلمني اتمنئ تكون الاجابات دقيقه لان جد متوتره من يوم شفت قبولي :) جزاكم الله خير

[الجفول*]

حبة حبة يا ريم..
المهم اخذي معك الاثبات وهو اشعار القبول اللي طبعتيه..
من الافضل انك تتعرفين على الكلية..
اللبس يكون تنورة طويلة ( أسود, كحلي, رمادي...)
والأفضل يكون بسيط ورسمي وغير مبتذل.
في أي وقت تقدرين تروحين الكلية حتى لو كان عندك محاضرة وحدة الظهر.
من الأفضل جوال بدون كاميرا على ما تتعودين على نظام الكلية.
وركزي الله يعافيك ويسلمك على المشاركة وحل الواجبات وعمل البحوث ,,
لأن السنة الأولى هي أهم سنة في نظام الجامعة ,,
اذا انت كنت دارسة نظام المقررات تكونين عارفة نظام الجامعة,,
كله جد واجتهاد من البداية ,,
لأن النسبة من الصعب رفعها,,
بالنسبة الكتب على حسب المادة ,,
بالنسبة للمكافأة أنت تحطين حسابك في النظام,,
وأهم شي شدي حيلك,,
في الترم الأول راح تكون الدراسة مع قروب بنات تتعرفين عليهم وتشوفينهم بكل المحاضرات,,
اسمه نظام المجموعات على ما تتعودين على النظام وكذا,,
الاختبارات متنوعة بين المقالي والموضوعي والالي( مثل اختبار القدرات)
على حسب جدولك تكون المحاضرات,, في الأغلب محاضرتين,,
واحيانا تكون وحدة أو ثلاث.

تمنياتي لك بالتوفيق,,

[5hawlah]

تلبسين اي لبس بس التنورهه م تكون قصيره ولا ضيقه والبدله تكون اي شي
تبدا المحاضرات الساعه 8 وتقعد ساعتين اخر دوام بالجامعه يكون 2
ماتقدري تطلعي من الجامعي وقت البريك الاستئذان يبدا بعد ال9ونص ويكون ببطاقتك الجامعيه وبطاقة اللي بيجيك
جدولك انتي تسويه وتختاري الدكاتره وكل واحد ومعاملتهه المشاﻻكه ترفعين ايدك بس وتجاوبي وانتي قاعدهه ،الجوال عادي اي شي بس ما تصوري فيه قدام الامن ولا تخليهم يشوفونه معك الكتب الدكاتره بيطلبوها منكم وتلقيها بجرير او المتنبي
اغلب اختباراتنا كانت موضوعيهه وقليل مقالي

ولازم تحضري المحاضره بوقتها لان بعضهم بطردون المتاخرين

اتمنى اكون افدتكك وموففهه يارب ♡

[sal77a]

مبروووك قبولك بالكليه حبيبتي

اول يوم جامعه ايش اخذ معي اثباتات؟؟ماتاخذين معك شي لانك خلاص انقبلتي بس لاتنسين تروحين الامن علشان تسوين اجراءات البطاقه الجامعيه لان لازم يكون لك بطاقه تثبت انك من الجامعه

اللبس وش اللبس !! يعني وش شروطهم و عادي اقعد بعباتي طول اليوم ؟؟التيشيرتات او البلايز او الجكيتات البسي الي تبين والتنوره اسود او جنز وماتكون قصيره مررا لان شفت بنات تحضيري اول مادخلو الجامعه لابسين مرا قصير والشكل طالع تووحفه

طيب الساعه كم اروح للجامعه و الساعه كم ارجع !! و البريك كم ساعه ؟ و اقدر اطلع من الجامعه في البريك و لا م اقدر ؟
الساعه كم تروحين وترجعين هذا ع حسب المواصلات المتوفره عندك
وعلى حسب محاضراتك يعني تقدرين اذا محاضرتك 10 او12 تجين متأخر لان جامعتنا ماينتقفل بابها:D
واذا كنتي بتروحين مع الباصات الي تابعه للجامعه فا لها وقت محدد توصلك فيه وترجعك للبيت
البريك مدته20دقيقه بين كل محاضره والي بعدها بس ممكن يكون عندك محاضره الساعه8وعندك 12 يصير تفضين من 9و40دقيقه الى الساعه 12
وفي وقت البريك طبعا لا ماتقدرين تطلعين ابدا اصلا حتى لو تبين تطلعين ضروري لازم اثبات الي جاي ياخذك وحوسه لانهم محددين اوقات يسمحون لك تطلعين فيها

انزين الجوالات عادي كاميرا مو !! يقولون لازم يكون لي لاب توب صدق ؟ عادي ايباد !!؟؟
الجوالات الكاميرا الكل يجيبها مع انها ممنوعه :D
والاب توب تحتاجينه اصلا في اشياء كثييرا بالجامعه وبعض الدكاتره اذا بتشرحين تقولك جيبي لابت وبك يعني بعضهم تمنع انك تشرحين من لاب توبها

لنفرض عندي محاضره الساعه 8 عادي اجي الساعه 8 الا ربع ولا لازمم الساعه 6 زي المدرسه !؟؟؟
تعالي اي وقت تبين على كيف كيفك

المشاركه وش قصدهم فيها !! ليكون يعني انا استاذه انا استاذه !!!!! طيب انا م احب اشارك ابد احب اكون صامته عادي م يخسف درجاتي ؟ واذا سرحت في المحاضره بتقومني الدكتوره اقول اللي قالته !! تراي متعقده من هالحرككككككككككات :) ؟؟؟
هذا عاد ع حسب الدكتوره وتقسيمها للدرجات بس الاغلبيه يحطون للمشاركه درجات فا لازم تشاركين
وشسمه عندنا بالجامعه مافيه انا استاذه وكذا بس ارفعي يدك
ومن ناحية انها تقومك وانتي سرحانه والله صارت كثير معي بالجامعه يعني ممكن تقومك وتقولك جاوبي

طيب وش ندرس اول سنه ! ووين القى الكتب ! وهي غالية ؟
اول سنه تدرسين 9مواد وجوده في الخطه مااعرف احط مرفق ان شاء الله غيري يعرف ويحطه لك:(
الكتب تلاقينها بالعبيكان او المتنبي او جرير
ومن ناحية الاسعار بعضهم لك عليهم توصل 100وفوق

المكافأه متى تنزل ؟ ومتى اعطيهم حسابي في البنك !
المكافأه تنزل لك من اول شهر الي هو شهر11 اذا خلصتي اجراءاته
تروحين البنك وتفتحين حساب وتدخلين الموقع واتوقع تحطين الايبان عااد مااقدر اعطيك العلم الغانم لان الي سواه لي اخوي مب انا:D

طيب اللي يدرسون اول سنه رجال ولا حريم ؟ من اسهل في التعامل طيب ؟
يدرسون دكاتره ودكتورات عاد من ناحية من اسهل بالتعامل كلهم منوعين فيه منهم الي شديد وفي منهم السهل والي يساعد بس انتي الي تختارين ع كيفك الدكاتره الي تبين

الاختبارات كيف ؟ يعني كله اختاري ولا اسئلة عادية ! ولا هذا يرجع للمعلم نفسه ؟
اختاري او مقالي هذا ع حسب الماده بعض المواد يكون اختباراتها كلهاا اختيارات وبعضها نص اختاري ونص مقالي

طيب كم محاضره في اليوم ! وكم مدتها ؟
الحد الاقصى للمحاضرات في اليوم3 محاضرات فقط بس انتي تقدرين تدرسين3مواد او2او1 في اليوم وطبعا مدة المحاضره في التحضيري كلها بتكون ساعه و40 دقيقه بس فيه مواد لها3 ساعات وفيه4 ساعات هذا بالتخصص ان شاء الله

هذا ردي ع كل الاجوبه وان شاء الله اني افدتك
و اي سؤال انا موجوده;)

[R.R]

البنات جاوبوا عليك وما قصروا عليك بشي

بس تبين نصيحتي
نصصيحه : ذاكري اول بأول عشان ما تندمين بعدين
نصصيحه : بحوثك سلميها اول بأول واجباتك سلميها اول بأول
اختباراتك : ذاكري زين زين الاختبارات الشهريه ذاكريها نفس النهائي لان الشهري هو اللي يرفع معدلك مع النهائي ، بس ذاكري زززززين
ومن ناحية الاسئلة السهلة : الدكاترة أسئلتهم اسهل من الدكتورات بكثير بس انتبهي مو كلهم ابتعدي عن اللي أسئلتهم صعبه
وفيه دكتورات أسئلتهم سهله ، بما انو السنه الجاية بتكون اول سنه لك بالجامعة يكون اول ترم نظام الشعب او نظام المجموعات
يعني البنات اللي معاك بالمادة مثلا النحو بتشوفينهم معاك بكل المواد ، بس الترم الثاني تقدرين تختارين المادة اللي تبين والدكتورة اللي تبين


بس نصصيحه نصصيحه ذاكري اول بأول عشان بعدين ما تقولين صعب ما عرفت احل شي اسألتهم صعبه ذاكري ذاكري قد ما تقدرين
وحاولي أنك تجلسين قدام عشان تركزين ذاكري زين عشان ما تندمين
عشان تجيبين معدل حلو وتدخلين التخصص اللي تبينه

والله يوفقك يارب وان شاءالله تجيبين معدل عالي
ومبروك على القبول

[reemm7]

الله يسعدكم و يطمنكم مثل ما طمنتوني شكرا لكل وحده ردت :)

[صفيناز]

مبروك القبول ..........................

[toni]

البنات الي توهم منقبلين وماعندكم اي فكره نقدر نساعدكم ❤️اسألو الي تبون

[فطوشكا]

وعليكم السلام ..
اللي انتي فيه انا عشته السنة اللي راحت بس يوم دخلت الكلية كل شي سهل لآ تتوترين ولآ تشيلين هم ياقلبي
ومبروك على القبول الحين خلاص انتي انقبلتي نهائياً ولا تفتحين الموقع ولاشي الدوام راح يبدا في شهر 11 تاريخ 5 انتي روحي بهالوقت واسألي عن الاشياء اللي تبينها اتوقع مافي دراسة الا بعد تاريخ 5 بأسبوع
موضوع اللبس عادي تنورة سودا او رمادي او بيج طبعاً ما تكون قصيرة لأن الامن يوقفونك التي شيرتات اللي تبين بس الكم ما يكون قصير مره مكياج عطور واكسسوار شوز او كعب عالي باق كبيرة او صغيرة كل ذا مالهم دخل فيه
سوي اللي تبين بس نصيحة سوي شي يناسب جو الدراسة والحرم الجامعي مو كأنك رايحة عرس انتي بتدخلين الكلية وبتشوفين العجب كأنك بصالة أفراح البنت كل ما كانت بسيطة كل ما كانت اجمل
جوالات الكاميرا انا يوم دخلت عادي جبت جوالي بس ما يصير تطلعينه قدام الأمن صديقتي سو لها تعهد شفوي
يعني طلعيه بمكان مافيه أمن عباتك عادي اذا تبين بس بعض الدكاترة يرفضون انك تقعدين بعباتك
البريك و وقت المحاضرات ووقت الخروج وايام الدوام كم تبينه اسبوع او 4 ايام او وت ايفر انتي تحددينه يوم تسجلين موادك وترتبين الجدول نصيحة خدي كل المواد لآ تقولين باخذ 4 بس او 5 خذيها ال 9 كلها وافتكي
وقت محاضرات في كلية الاساسية من الساعة 8 لين 1:40
وقت دوام الكلية تفتح 7 او 7 ونص او قبل 7 بشوي
الاثباتات انا كنت اخذ صورة من كرت العايلة بعدين رحت لممر 62 الدور الارضي وطلبوا مني فصيلة الدم و الصورة الشخصية 6×4 ملونه عشان اطلع البطاقة الجامعية طبعاً برضو نصيحة سوي البطاقة الجامعية بدري لأن اختبارات الميد ترم ( اعمال السنة ) ما تختبرين الا بالبطاقة الجامعية
المشاركة نفس المدرسة لأن البعض تقولك قومي جاوبي وترى في مشاريع وفي عروض وفي شرح
يعني توقفين قدام الطالبات وتشرحين فقرتك وتاخذين العلامة الكاملة
لازم تشدين حيلك من البداية وتخلين معدلك عالي عشان تتخصصين اللي تبين وترتاحين
الدكاترة في رجال وفي حريم انا جربت دكتور مره وحده وكان مره طيب ويشرح من قلب
طبعاً اسئلة الاختبارات يشترك فيها اكثر من دكتور او معيد يعني ذاكري كل شي
وطبعاً الكتب لا تشترين لين يقولون لك اسم الكتاب والمؤلف و وين ينباع
ولازم تشترينهم بدري لأنهم يخلصون واذا على غاليه او لآ انا طلعت من المتنبي باكثر من 500 ريال
مدة المحاضرة ساعة و40 دقيقة

ويارب اكون جاوبت على اسئلتك كلها والله يوفقك ياقلبي

[amal.ss]

السلام عليكم

ريم حبيبتي لا تفتحين الموقع هالايام بس في تسجيل المواد انتي تسجلينها وهو يفتح على حسب المستويات حبيت اذكر هالنقطه لان كثير ما ذكروها