اختيار التخصص ( تقني )

[(الرايق)]

السسلام عليكم .

مثل ما انتو عارفين الحين فترة تسجيل التخصصات وانا للحين ماسجلت شي لأني محتار :(

بالنسبة للتخصصات الكيميائية مابيها :) لاني اكره الكيمياء

بس محتار الحين بين هندسة الالات الدقيقة والمكيانيكا والكهرباء :)

وش رايكم في هالتخصصات وبيئة عملها في الوظيفة ؟

المكيانيكا سمعت انها تعتمد عالحفظ اكثر وبيئة عملها كرف مع انها مطلوبة كثير
والكهرباء اللي عرفته عنها ان دراستها صعبة :) !!
والالات الدقيقة انه تخصص نادر ويعتمد عالفهم اكثر ؟

وش رايكم انتم يا اصحاب الخبرة

بالذات الالات الدقيقة كيف طريقة دراستها وتعتمد على ايش ؟
فهم ولا حفظ اكثر

ومستقبلها الوظيفي كيف ؟ واذا كملتها بكالوريس كيف يكون مستقبلها ؟

[(الرايق)]

up

[Ahmed--1976]

كلّه يعتمد على قدراتك و ميولاتك. أنصحك بالتخصص المطلوب في سوق الشغل و لو كان صعبا.

[(الرايق)]

up

[silver NEO]

وعليكم السلام ورحمة الله وبركاته



يالغالي تحتاج تعرف ايش ميولك في الأول .. لا تدخل على عماها ..

اجلس مع نفسك وشوف الجوانب الي انت ترتاح معها وشوف كامل التخصصات وفص فص امها ..

(ما ابي اكبر الموضوع عليك بس صراحة هذا قرار مصيري لحياتك لأن تخصصك بيصير معاك في باقي حياتك سواءا عملية او بيتوتية )

راح اقسم ردي لكم نقطة حتى اقدر اجاوب لك جميع إستفساراتك إن شاء الله ..

النقطة الأولى (أعرف التخصص قبل ما تختاره وايش المواد اللي فيه)

المشكلة انك ما راح تلقى كثير هنا يفيدك في كل تخصص .. وان كان موجود على الاقل يكون في اخر سمستر من التخصص او متخرج حتى يفيدك بشكل افضل .. عموما

هذا رابط التخصصات التقنية من موقع الكلية ..

شوف الخطة الدراسية حق كل تخصص .. ركز على مواد التخصص وترجمها لو ما عرفت معناتها راح تكون فكرة عن ايش يتمحور هذا التخصص وابحث عن المواد في جوجل وخذ لك نظرة عامة عند اهدافها لو حصلت ..


الرابط
التخصصات والخطط الدراسية (برنامج الشهادة الجامعية المتوسطة)

ركز على مواد التخصص .. مو العامة .. مثلا مواد الكهرب ( باور او الالآت دقيقة ) الكود حق مواد التخصص يبدأ EEE

وباقي المواد لها كود مختلف حسب المبنى مثل MIT (مبنى الإدارة وتقنية المعلومات ) و ELC ( مبنى اللغة الإنجليزية )



هالطريقة راح تفيديك كثير ..


..................




النقطة الثانية (متطلبات سوق العمل )

وكم من شخص ( منهم أنا ) أجبرته الحياة على تخصص لا يريده بسبب سوق العمل ..

أرفع رأسك وشوف سوق العمل ايش يطلب خاصة شركات المصانع الكبيرة .. حاليا عندنا ثورة صناعة .. فاللي وده يصير مهندس معماري ما راح يكون له فرصة كبيرة يحصل وظيفة بعكس اللي يبي يصير مهندس الالآت دقيقة ونحكم على سبيل المثال .. >> توضيح لمتطلبات سوق العمل ..

مع كذا الحمد لله الكلية جميع تخصصاتها مطلوبة والمطلوب منك تشد حيلك بالدراسة وتجيب معدل يرفع الرأس ( +3 ) ..

في شغلة ابيك خلها في بالك

مثلا: شركة بتوظف 50 شخص من تخصصين مختلفين ( ميكانيكا والالآت دقيقة )
راح يكون عدد المكانيكا 46 و الالآت الدقيقة 4 .. !!!
(طبعا يختلف الوضع من شركة لشركة بطابع النشاط والعمل)

السبب : الميكانيكا عددهم أكثر بحكم طبيعة عملهم بعكس الالآت الدقيقة ..

ومع ذلك على لسان مدير كليتنا عادل باحكيم .. نسبة توظيف الخريجين = 98% ..

واولا واخيرا حط في بالك أن الأرزاق بيد الخالق سبحانه


لا تشيل هم الوظيفة لأي تخصص معين .. خاصة التقني سوقه ماشي واصلا عدد الطلاب اللي يتخرجون كل سمستر من كل تخصص ما يكون كبير بمثل ما تتوقعه .. ادخل ايميل الكلية وشوف إيميل اسماء الطلاب المرشحين للتدريب التعاوني .. راح تشوف عدد الخريجين هذا السمستر ( منهم أنا ^^ ) وعدد الطلاب من كل تخصص .. وعلى كلام مسؤول برنامج التدريب التعاوني لما سألته عن الشركات اللي تقدم فرص للطلاب يطبقون فيها قال لي فوق 800 شركة !!

فالوظيفة أولا تعتمد على توفيق الله سبحانه .. ثم معدلك ومقابلتك الشخصية ..
( أدعي ربك دائم في صلاتك أنه يرزقك ويوفقك ويسهل امرك للوظيفة اللي تتمناها وما راح يخيب رجاك )

فلا تشيل هم يا صاحبي .. توكل على الله وشد حيلك

النقطة الثالثة ( ما هو ميولك ؟ )

أنت تعرف لنفسك أكثر من غيرك .. تحتاج فقط وقت تجلس مع نفسك وتشوف أنت تميل لأيش أكثر ..

هل تحب تشتغل في فك وتركيب وإصلاح معدات ( مثلا مكانيكا ) او تحب تتعامل مع الكهرب وتوصل وايرات وتتحقق من الدارات الكهربائية وتحل المشاكل المتعلقة بها (مثلا كهرب ).. او تكون فني مختبر يتعامل مع المواد الكيميائية ( مثلا كيمياء ) او تهتم بالبرمجة وأنظمة الحاسب الآلي والشبكات ( مثلا دعم نظم الحاسب ) .. الخ


^ الكلام كله للتوضيح بس لا تعتمد عليه ابدا فقط حاولت اوضح لك الفكرة الاساسية بس ..


طبعا كيف تشتغل وايش بتسوي في الشركة لو كنت كهرب ما عندي اي خلفية واضحة عن الموضوع .. ويمكن يحطونك في مكان شرق وتخصصك غرب .. كم واحد تخصصهم مكانيكا وقبلوهم كفني مختبر ! واللي يقول في وظيفتك ما راح تطبق الا نسبة 4% من اللي درسته .. والثاني يقول كل شيء درسته جاني في الشغل وفادني كثير .. الخ ..

اتوقع ان السالفة كلها سياسة شركات .
....

النقطة الرابعة (ما اعجبني ولا تخصص )

هنا يا صديقي اقول لك هذا حال الكثير من الطلاب .. مثلي .. لكن وش اقول غير .. مجبراََ أخاك لا بطل .

شوف اكثر تخصص تعتقد انه يناسبك ولو بنسبة بسيطة وأستخير الله وتوكل عليه ..


بالنسبة لي أخترت تخصصي الالآت دقيقة بحكم انه نادر وتوه جديد واحس لي ميول اكثر له .. رغم اني كنت ابي دعم نظم الحاسب لأني اعشق الكمبيوتر وكل شيء عنه .. لكن للأسف وقتها كان التخصص متاح للمسار الإداري فقط فقلت عساها خيرة وتوكلت على الله والحمد لله الحين مبسوط جدا واحب تخصصي رغم اني أحيانا اسب فيه :D


النقطة الخامسة ( حق الفيتو )

تقدر تغير تخصصك بعد أول سمستر في التخصص في شفت انك استغجلت في قرارك

المادة الثامنة والعشرون:

يسمح للطالب بتغيير التخصص الدراسي عند توفر الإمكانيات وبعد مضي الفصل الدراسي الأول له في التخصص, ولا يسمح له بتغيير التخصص نهائياً بعد بداية الفصل الدراسي الثاني أو في مرحلة البكالوريوس، أو تغير تخصص من مسار إداري إلى مسار تقني.
مع مراعاة تحقيق الطالب لمتطلبات التخصص الذي يرغب بالانتقال إليه وفقاً للشروط التي تحددها الأقسام المعنية والمعلنة في حينه، وخلال الفترة الزمنية المحددة وفقاً للتقويم الأكاديمي للكلية.

المصدر


..

بالنسبة للإستفسارات .. هذا موضوع وضحت فيه تقريبا كل استفساراتك ..



اتمنى شرح بسيط للتخصصات التقنية في كلية الجبيل


...

على فكرة تخصص الالآت الدقيقة أصعب من الباور بحكم كلام طلاب من التخصصين منهم انا ..
وتقريبا سهل على متخصص الباور انه يفهم تخصص الانسترومت بشكل اسرع بكثير من متخصص الميكانيكا او الكيمياء بسبب امور مشتركة والعكس صحيح .. لكن اتوقع يبقون اصعب تخصصين لانهم يعتمدون على خيااال بعكس الميكانيكا والكيمياء وكلامي قد يحمل الخطأ ..


إنتهى ..


أتمنى قدرت أفيدك وأفيد الكل ولو بشيء بسيط والمعذرة لو أخطيت بشيء فالنهاية أنا بشر .. أي أستفسار أنا في الخدمة


لا يهمني ردك أو إطارئك لي بقدر ما تهمني دعوة صالحة بظهر الغيب

بالتوفيق

[sa2014ed]

انصحك باختيار تخصص تقنية الهندسة الكهربائية لان فرصة اكمال البكالوريوس له اكثر من غيرها خارج الكلية لان الكلية شروطها معقدة و الفرص الوظيفية له اكثر