.. تجربتي الشخصية .. في التربية الميدانية ...

[ماكنتوش]

...(بسم الله الرحمن الرحمن)....

طبعا هذا أول موضوع أكتبه وعن تجربة شخصية مرت عليّ فيها الزين وفيها الشين .. وأتمنى الكل يستفيد منها ..سواء البنات اللي راح يطبقون بعد اسبوعين لان في منهم جدّد واللي راح يطبقون الترم الثاني والسنوات الجايه اذا الله كتب ..أدري اني مقصّرة جدا في المواضيع وحتى المشاركات لكن الايام الجايه تعوّض.. نبـــدا :-

الفصل الأول:- لما جاء وقت التطبيق وطلعت اسماءنا كانت مشاعرنا مختلطة منها متوترين ومنها مستانسين اول مره ماندري عن شئ.. ولا تستغرب الوحده لما تكون متوترة لانه شئ طبيعي تمـــــــــــــــــــاما..

الفصل الثاني:- اول يوم رحنا فيه انا وصديقاتي مايمدينا حطينا رجولنا على الباب الرئيسي ودخلنا بس شلنا الشيلة الا وبدت التعليقات ..(احلى - حرررركات - ابوك يالزين - وييييييع بنات تطبيق - الكحل الازرق خايييس - تكفووون اذبحوني عند ام احمرررر )..

وعلى كيف كيفك من هالتعليق منها اللي يبرد على الخاطر ومنها اللي ودك تدوسين بطنها..

الفصل الثالث:- دخلنا الغرفة المخصصة لنا طبعا المشرفات موجودات هم اللي يختارون لنا الحصص ويحطونا فيها وكل وحده من البنات معها احتياطها .. وهذا الكلام كان يوم السبت ومن سوء حظ صديقتي (احتياطي) كانت حصتها اليوم الثاني يوم الاحد ** الخـــــامسه ** وانا يوم الثلاثاء بعد ** الخامــــسة **

الفصل الرابع:- يوم الاحد داومنا ومحضّرين الشرح جلست بالغرفة حقتنا وفيها بنات كثييير ومن الساعة 7 إلى 1:30 كل شوي بنات يدخلون الغرفة وخاصة وقت الفسحة وخذي من هالتعليقات سواء الحلو او العكــــس .. رفيقتي مو من النعيرية قامت دخلت المدرسة ودقت علي قالت :- والله ماادخل من البنات تعالي انتي استقبليني طلعت اول ماشافت وجهي قالت :-(والله مااشرح تكفييييين يا... اشرحي) .. عرفت ان الموضوع طاح براسي واساسا كنت حاسه ..

الفصل الخامس:- كل مايرن الجرس يرن قلبي معاه ولا تقولون لييييش متوترة مع ان.. صدقوني لطالما كنت أوصف نفسي بالشخصية القوية لكن استغربت ورحت لمشرفتي وسالتها (انا معقوله يصير فيني كذا) .. وقالت كلام جميييل جدا ورفع من معنوياتي .. قالت:-( حبيبتي جيبي اي وحده الحين من الغرفة مو متوترة ..والتوتر مو من البنات الا من الوقفة نفسها والشرح)...

الفصل السادس:- رن جرس وجات الحصة الخامسه اخذت الكيسة فيها شوية هدايا ودفتر التحضير والقلم ورفيقتي معها اللوحة ونمشي الدور الاول ورقينا فوق ثم الدور الثاني ثم الثالث نمشي في الاسياب .. وتقول البساط الاحمر حق المشاهير .. صرررراخ وعشرين وحده تناديك اسمك واذا التفتي كلهم يسكتون وانوع التعليق طبعا من اطراف رجولك لحد شعر راسك يعلقون اقصد بالتفاصييييل المملة من لبس من تسريحة من مشيه وغيرها..

الفصل السابع:- دخلت الفصل الكل سكت ماعطيت فرصة للكلام على طول كتبت العنوان وبديت اشرح ..رجولي اول خمس دقايق تصافق وبقوووه , البنات الكل يطالع لكن النظرات نظرة تفحّص بالشكل من _ الى وطريقة الشرح اللي طبعا اول مره ماكانت ذاك الزود ويدي فيها رجفه لكن مسكت القلم اخبي ذي الرجفه اول ماراحت الــ5 دقايق الوضع صار طبيعي وشرحت عادي ومايمديني قلت يالله اكتبوا الدرس الا طاحوا فينا انا وصديقتي بالاسئلة ..(شسمك - شنواصلك - انتي وين ساكنه - كم عمرك) اسئلة تموت من الضحك تقول بيجون يخطبونك .. اما وين ساكنه >> ذي مسكته..

الفصل الثامن:- جات حصة رفيقتي ودخلت وطالعت فيني وانا جالسة وقالت لي وهي خايفه :: مع السلامة :: .. قلت :- نعم .. وطلعت ولحقتها

قالت :- (والله مااشرح).. يابنت الناس ..البنت شوي وتنجلط قمت شرحت واخذت خبره على اساس اني خلاص وتعودت ..

الفصل التاسع:- جاء اليوم اللي بتشرح فيه اجباررري ونااااسه يااني ضحكت عليها وهي تشرح .. وكانت تشرح وهي شوي وتصفق البنات ..

[بذا التجربة ياحلوين يمكن ماتكلمت بالتفصيل لكن اهم الاشياء واللي راح تمرّ عليكم حبيت اعطيكم فكرة عنها نروح للمهم هاذي يابنات نصايح يمكن مامرت عليكم قبل كذا بس رجااااء الكل يقراها واللي يمشي عليها بتكون ايام التطبيق احلى ايام]..

1. المشرفة اصحي تعاندينها اي شئ تقوله صح ..

2. الحصص حاولي قد ماتقدرين ماتاخذين اليوم الثاني لانك راح تبهذلييين وماتدرين شلون التحضير والاغراض..والله يستر

3. مدرسة المادة تبع المدرسة نفسها لما تطبقين بثالث دخولها مش اجباري لكن برابع لازم تدخل لان بيدها نسبة من الدرجات واذا حصل غلطت شئ رديها لكن باسلوب طيب اذا مانفع مالك الا المشرفه ...

4. خذي احتياط ينشد فيه الظهر مو كل شوي وهي تصيح عندك..

** اللبـــــــــــــــــــــــــــــــــس ** :-

** اهاااا جينا للموضوع المهم حركات ,فتحات, شفاف ,فيونكات عشر متر ,تنورة ماتدخل الا بفازلين من الضيق وماادري شنو ... شوفوا انا صريحه .. مااراح اقولك ان التطبيق بس تدرسين وعلى البيت لا طبعا .. فلة ووناسة ووجيه جديده ..

لكن استانسي بحدود انتم ماشفتوا اللي شفته في ناس الفتحات للركب والشفاف تقول ولا شئ .. ولا تجي وحده وتقول انا اساسا لبسي كذا .. ليه في البيت ولا الكلية ..

(الكلية ممنوع - والبيت اللي اخبره ياجلابيه او بيجامه).. واللي على بالها كذا البنات يحبونها غلطانه .. على كثر اللي بيحبون ..على كثر اللي بيطالعون فيها ويقولون الحمد لله والشكر .. اللي اقصده خل الفتحه بسيطه .. والشفاف البسية بس مو اللي كانه ولا شي عليك ..

.** المكيـــــــــــــــــــــــــــــــــاج .. ااااخ بـس ** :-

- حمرا عنابيه ,ظل ازرق ,مكياج كويتي ,التسريحة تقول الساعه كم قامت عشان تسويها .. اللي ابي اقوله ان الله جميل يحب الجمال ومافي ااحد يموت بالكشخة نفسي لكن البسيط يلعب دور خلي المكياج بسيط حتى لو كنت من البنات اللي يحبون الثقيل لانك بكل بساطه رايحة للمدرسة اساسا ماايحطون شئ فبالنسبه لهم الروج بلحاله اوفر .. يعني خفي على نفسك شوي..

. ** البنـــــــــــــــــــــــــــــــــــات وما أدراك مالبنـــــات **:-

رجاء لاأحد يزعل انا رااااح اتكلم عن الجانبين .. الاول : بنات الثانوي وغيرهم , الثاني: بنات التطبيق ..

بنات المدارس:-

طبعا من البدايه حطي في بالك انهم صغار حتى لو عقولهم توزن بلد .. من اول يوم وبالروحه وبالجيه بتلقين تعليقات ..منهم اللي يعلق بالزين وحتى ولو هاذي لاتضحكين لها خلك عادي وامشي .. ومنهم اللي يعلق بالشينه ويمكن حتى الكلان ينرفز بعد لاتلتفتين لها امسكي نفسك وكملي .. صدقوني يابنات يمكن انا من الناس اللي فيني شئ من العصبية لكن حتى ولو اضغطي على نفسك ذيك اللحظة وكملي حتى لو لحقتك .. ولا تقولين برد عليها لان بكل بساطة هذا اللي تبيه انّ يابنات انا تهاوشت مع بنت التطبيق يالله ارفعوني بالسماء مااحد قدي .. وثانيا حتى لو قلنا انك تهاوشتي معها شوفي وش يصير .. بيقولون انتي بنت الكلية الكبيرة وهي بنت المدرسة الصغير ولو فرق 4 او 5 سنين .. انتي الفاهمه وهي الدلخ .. انتي الغلطانه انتي ضيفه وهي الصح .. وتخسرين الدرجات وشئ من الكرامه على حساب شنو ... اذا لهدرجه خربااانه طب اصبري اخر يوم في التطبيق وداومي ودقي خشمها وسحبي وجها بالزفلت .. اقلها خلصتي التطبيق وضمنتي الدرجات >> ولا احد يشوفك هااا..

في الحصة بتلقين اللي تعاندك .. احتمال .. نفس الشئ بعض الامور من الذكاء تجاهلها يعني فرضا بنات يسولفون لكن مالهم صوت سكتيهم مرة مرتين بعدين ركزي بدرسك واتركيهم .. يبون يلهونك ..

الإعجـــــــــــــــــاب:-

- بنات التطبيق :-

الله يرحم الحال بعض بنات التطبيق تشوفينها تقولين لو انها تبقى بالثانوي اصرف لها .. البنات وانا اقولها لكل بنت جايه تطبق بتلقين 20 معجبة لك 15 منهم مهاااااااااااااااايطيه و5 يممممممكن بعد صادقين وبكلا الحالتين لاتعطين احد فرصه يتكلم معك لانك اذا تكلمتي معهم بيقولون (خفيفه وجبت راسها) واذا ماتكلمتي بيقولون (مغرورة وشايفه نفسها) يعني ماكلينك بالحالتين .. لكن الثانيه ارحم .. ولا وحده تجي وتقولي انا اغيرررر لا ياماما وش معنى انتي غير ...

وبنات المدرسه صدقوني عندهم صبر ايــوب بتلحقك لحد ماتطحن الحبه اللي براسها..

اذكر لكم موقف ابين لكم وجهة نظر بنات المدارس نفسهم :-

انا عندي تقريبا 4 يقربون لي في الثانوي وكانوا يتكلمون عن بنت تطبيق تعطي البنات وجه .. وللامانه انا حتى سمعت عنها.. قلت لهم: مو هذا اللي تبونه بنات التربية يسولفون ويجلسون معكم .. واسمعوووووا قالت لي وهي اللي تقرب لي من دفعة المهايطيه : (صح لكن للوناسه فقط مو جد) .. قلت للثانيه هم ثنتين اللي عندي.. حرررام عليكم لاتلعبون عليها .. قالت لي الثانيه: (مااحد يلعب عليك الا اذا سمحت له ولا انت بالكليه وش تبين بالثانوي وبعدين بنات الثانوي او المتوسطة لما تعجب يكون على اساس انها تمشي بين البنات وتقول ترى بنت الكليه تحبني)... هههه شئ

ودي اكتب اكثر لكن اصابعي ماعاد فيها .. لكن ياحلوييين اتمني تتعظون من هالتجربة وانا لما تكلمت في النصايح ماتكلمت عن نفسي ولا كتبت الموضوع الا لما سألت بنات بالكيمياء والاقتصاد والدراسات وحتى العربي وكتبت لكم الاشياء اللي اتفقوا عليها ...................

ThanK YoU

[شريره حدها]

ماشاء الله وانتي تكتبي الموضوع مببببببببببببببدعه طريقتك ابداع وتخلي الواحد يحب يقرا كنها قصه
بس توترت من الحين مابي اشرح انا بعد
يسلمووووووووووووووووووووو يعطيك الف الف عافيه

[ماكنتوش]

المشاركة الأصلية كتبت بواسطة شريره حدها

ماشاء الله وانتي تكتبي الموضوع مببببببببببببببدعه طريقتك ابداع وتخلي الواحد يحب يقرا كنها قصه
بس توترت من الحين مابي اشرح انا بعد
يسلمووووووووووووووووووووو يعطيك الف الف عافيه

لا ياحياتــي .. لاتوتر ولا شئ بس هي اول مرة وأول خمـــس دقايق .. وبعدين رااااااااااح تحبين شئ اسمه تطبيق .. وتتضايقين اذا خلـــص ...

[قساني تغليك]

[align=center]
[align=center]
[align=center]
ماكنتوش

اسلوبك مرره جناان وسلس
بصراحه قرأيت كل حرف فيه -> مع إنو أكره شئ اسسمه قراءه
اهنيك ع الموضوع الرايق الخفيف , بجد انتٍ :049:

يعطيك الف عآفيه
وآصلي ., لاهنتي , عسسوله .
[/align]
[/align]
[/align]

[ام بلال]

بصراحة التطبيق مرة اجنان بس انتبهى من البنات مرة عندما كنت اطبق كانت عندى حصة تفسير ويوم دخلت شوفو شنو قالو انهم لم يجبون الكتاب قلت طيب انا راح اشرح وانتم اسمعو وبعدين راح اسئلكم المهم دخلت المشرفة يوم شافو ها طلعو الكتب وقامو يشاركون وان ماانتبهت الا بعد ملاحظت المشرفة وهى تقول سكرو الكتب انا عندها ماسكت ليش الحركة وقلت لهم عيب ترى الحركة ماهى حلوة و المشرفة ماتكلمت ولا كلمة لانها فهمت انة مقلب من البنات وطلع على راسهم ترى البنات شاطرات مرة انتبهو :nono:

[Roony]

مررررررررا روعه اسلووووبك رغم انو انا مو في النعيريه فس دخلت لقااافه

و موووفقه يا قلــــبي

إلا كل من دخل الآداب و العلوم لازم يطبق
و يا حيااااتي ع بنات التطبيييق خصوصا لا شرحت
تحسين حتى الإرتبااااك و التوتر بـ نبررررة صوتهــأآأآ بس مثل ما قلتي شي طبيعي

[اسماء العبدالله]

لو سمحتي اختي بالسنة لتحضيرية وتسال تقول ان اتوقع عندهم مادة اسمها الادارة وتدرسهم اردنية
وتقول الاسبوع الجاي رحلة ميدانية ؟؟؟؟؟ اول محااضره شافتهم قالت لهم

وش معناااهاااااا ؟

[ماكنتوش]

المشاركة الأصلية كتبت بواسطة قساني تغليك

[align=center]
[align=center]
[align=center]
ماكنتوش

اسلوبك مرره جناان وسلس
بصراحه قرأيت كل حرف فيه -> مع إنو أكره شئ اسسمه قراءه
اهنيك ع الموضوع الرايق الخفيف , بجد انتٍ :049:

يعطيك الف عآفيه
وآصلي ., لاهنتي , عسسوله .
[/align]
[/align]
[/align]

مشكوووووورة ياروحـي .. شفتي فيني الخير خليتك تقريـن ..

[ماكنتوش]

المشاركة الأصلية كتبت بواسطة ام بلال

بصراحة التطبيق مرة اجنان بس انتبهى من البنات مرة عندما كنت اطبق كانت عندى حصة تفسير ويوم دخلت شوفو شنو قالو انهم لم يجبون الكتاب قلت طيب انا راح اشرح وانتم اسمعو وبعدين راح اسئلكم المهم دخلت المشرفة يوم شافو ها طلعو الكتب وقامو يشاركون وان ماانتبهت الا بعد ملاحظت المشرفة وهى تقول سكرو الكتب انا عندها ماسكت ليش الحركة وقلت لهم عيب ترى الحركة ماهى حلوة و المشرفة ماتكلمت ولا كلمة لانها فهمت انة مقلب من البنات وطلع على راسهم ترى البنات شاطرات مرة انتبهو :nono:

إي طبــعا ياحلوة عليهم حركاااااات .. الواجب ماحلته ليش انها غايبة اسبوع .. وهي من جنبها..
واستاذه بروح اجيب كتابي .. وهو كتاب رفيقتها ... وغيرها من حركاااات .. الله يعين ..

[ماكنتوش]

المشاركة الأصلية كتبت بواسطة roony

مررررررررا روعه اسلووووبك رغم انو انا مو في النعيريه فس دخلت لقااافه

و موووفقه يا قلــــبي

إلا كل من دخل الآداب و العلوم لازم يطبق
و يا حيااااتي ع بنات التطبيييق خصوصا لا شرحت
تحسين حتى الإرتبااااك و التوتر بـ نبررررة صوتهــأآأآ بس مثل ما قلتي شي طبيعي

مشكــــورة ياعيوني على التشجيع .. محتاجينه .. ويااااااااازين اللقافة ..