[ النظام الأفتراضي ] : نظرة عامة لجميع مواد المستوى السابع والثامن

[فـجــر]

بسم الله الرحمن الرحيم

بحث متكامل عن آراء الطلاب عن المواد و فكرة عامه حول محتواها

,, وكانت النتيجة ..

مواد ( المستوى السابع )...

اغلب مواد هالترم تحتاح تركيز وحفظ
وخاصه بحوث يبي لها تركيز اكثر لأنها دسمه شوي

1- الإدارة الإستراتيجة ( 4 نماذج)

د.أحمد بلالي

الماده تحتاج تركيز كثير واسئله الدكتور جميله وواضحه ..
ملخص بوسي كات + تبويب ام جهاد

ماده غثيثه نوعاً ما

بس كان الاختبار جميل أغلبها مكرره أو من نفس الجزيئات

ملخص بوسي +ملف ام جهاد بحل وبدون حل (عشان تدرب ع الحل )

.......

2- المحاسبة الإدارية ..(7نماذج)

د.محمد عجاج

المادة جميله جدا جدا تعتمد ع الفهم اكثر من الحفظ والتكرار اكثر واكثر في الحالات

العملية عشان تثبت المعلومه ودقه بالجواب'
اسئله الدكتور جميله وواضحه وان كان خيارات العملي كلها تطلع مع ع الآله لكن ادا فاهم المسأله صح ماراح تتعب ..
فهم العملي من ام جهاد+ النظري ملخص فهد او ابو يزن

رأي آخر ...

ماده عملية

وفيها جزء نظري وتركيز الدكتور عليه بالاختبار كان اكبر بنسبة 32 سؤال نظري
والعملي 18 سؤال وكانت من ابسط المسائل
ولله الحمد الإختبار موفق وشرح الدكتور ممتاز وله تقريباً 7 نماذج
والملخص الافضل لها ملخص فهد
وعليه بعض الملاحظات البسيطة
وطبعاً لاغنى عن تبويب ام جهاد كتب الله اجرها

ملخص فهد وتبويب أم جهاد

.....

3- إدارة التغيير ... (7 نماذج)

يحضيه سملالي

محتواها قليل و جميل .. و كانت اسئلة الدكتور رائعة وهي

مادة نظريه معلوماتها مفهومه بس تحتاج تركيز

لكثرة التعداد وتشابه النقاط
والدكتور ماقصر اختبارنا كان موفق ولله الحمد
الملخص الافضل

لافندر ومبارك ربي يسعدهم
تبويب ام جهاد مضاف له المحتوى

رأي آخر ...

كانت في قمه الروعه والسهوله والسلاسه والدكتور مالف ولا دار الاسئله مباشره

والاجابات واضحه ،
ملخص لاڤيندر + تبويب ام جهاد

....

4- بحوث الأعمال .. نموذجين

د. فاتح دبلة

بإختصار شديد ماده حفظ ومن ثم يأتي الفهم

كأن حلووو صح فيه شوية لخبطه بس بشكل عام حلووو والاسئلة مباشره بس كم سؤال فيها لف ودوران

ملخصي + نموذج دكتور (1فقط بس الحين عندكم 2)

فيه ناس اشتكو كثير من المادة

لانهم اعتمدوآ على أسئلة الأعوام

وهذا رأي آخر ...

الاختبار جميل والدكتور ماقصر ولكن الظاهر ان البعض تعود انه يمسك

الاسئله ويعتمد عليها وتشتت ذهنه

باختصار الدكتور ماجاب شيء خارجي ولاشيء غامض .

...

5- نظرية المنظمات ( 7 نماذج )

( د. عيسى حيرش)

هالدكتور مايعرف الغموض الحمد لله

وكلنا عرفناه بادارة العمليات

الآراء

سهله وكرر كثير من الأسئلة الاعوام الماضيه

المادة تحتاج

تركيز + الحفظ + الفهم= الاستيعاب

تحتاج مذاكرة أكثر من مرة لأن هذي المادة تعتمد على اسماء العلماء و انجازاتهم و

دراساتهم ..لكن مو صعبة

أول مررره ف المذاكره صعبه بس ثاني مرره مع الكويزات يجي منها

والاسئلة الحمدلله سهله واغلبها مكرره او من نفس الجزيئات

ملخص نوره القحطاني +ملف ام جهاد بحل وبدون حل

.....

6- إدارة الأعمال الصغيره (7 نماذج)

د محمد القحطاني

أنا اخذت هالمادة قبل ترمين كانت الأسئلة واضحة الحمدلله

هالدكتور بالذااات ماله أمان

الآراء

حليت تمااام لاني ذاكرت بضمير

بس اسئلته فيها خبث وبين الاسطور مع انه سعودي بس مافي رحمه
الدكاتره الاجانب اطيب منه

حلو بس لازم تركز في السؤال

مواد ( المستوى الثامن )...

(جميع المواد حلوه وسهله للي يتابع من بدري ويرتب وضعه)

.....

1- قضايا ثقافية معاصرة ( نموذجين )

د.صلاح السميح

الدكتور ممتاز

ماده حلووووه جداً ودكتورها جميل

مادة سهلة وطويلة حبتين واضحة ما فيها غموض
دكتورها صلاح السميح (اسم على مسمى)

....

رأي مفصل أكثر

الماده هذي تكلمت عن المستشرقين و الاديان .. و طريقة غزوهم للإسلام و مدى تأسس الحقد الصهيوني .. و في اخر محاضرة طرق المعالجه .. بالنسبه للماده رائعه و محتواها رائع .. بس اسم الماده قضايا ثقافيه معاصره .. اعتقد انه بعيد عن المحتوى .. و كنت اعتقد لما سمعت اسم المادة في اول مره .. انها تتكلم عن القضايا الاخلاقيه في ادارة الاعمال مثلا الغش و السرقه ايضا الاسم و القضايا اللي غزت اسواق الاعمال في عصرنا الحديث .. مثل تكنولوجيا الانترنت و التسويق عبر الشبكة العنكبوتية .. و التهكير و سرقة البيانات
بالنسبه للأختبار كان رائع و الحمد لله اتوقع درجاتي فيه عالية

........

2- موضوعات خاصة في الإدارة (6 نماذج)

د.مصدق حسن الريح < هذا دكتورنا بالإدارة العامة

الدكتور للأسف يحب الفراغات واللف

والدوران رغم تفاهة المنهج لكن راح تنجحون ان شاء الله

تتعب بالمذاكره بنسبه لطريقة الدكتور بالاسئله لانه يعتمد ع الفراغات

فا يبي لها حفظ كثيييير ومن الصعب حفظ كامل المنهج

بس الحمدالله كان الاختبار جدا جميل وسهل

...........

3- أخلاقيات الأعمال (نموذجين)

د.حسان الغربي

طبعا الماده سهله جدا اسهل من فقه السيره لكن الدكتور المغربي

جاب العيد فينا وجاب لنا اسئله صعبه جدا ومن خارج المنهج وفيها

اخطاء املائيه يعني ربي يعينكم

عليه واللي يقدر يآجل هالماده يآجلها لين يروح هالدكتور

(المحتوى في المتناول لكن الدكتور الله يهديه)

المادة سهلة وجميلة ومن الحياة العملية في اماكن العمل
دكتورها حسان الغربي (حسبي الله ونعم الوكيل)

جميع المواد سهله وحلوه وبالنسبه لاخلاقيات العمل اول شي ذاكرو الملخص كامل بدون

اختصار وارجعوا لاسئلة طموح شايب وصدقوني راح تجيبوون ممتاز والله يوفقكم

الماده ممتعه ومعلوماتها متراكمه لكنها حلوهـ
والاهم التركيز ع المحتوى

(
أخلاقيات الأعمال // تقديرا مني لشعور أخواني وأخواتي الطلبة والطالبات بعد الأختبار وماوجدته على غالبيتهم من إمتعاض وأستنكار لطريقة الأختبار أود أن أكون محايد ولا أنحاز ...

بدأت قصتي مع هذه الماده بعد أختبار الدفعه اللي قبلنا ووجدت شكاوي وأستياء شديدين منهم بصعوبة الأختبار وتشابه الخيار والأعتماد على محاضرات معينه فقط وأن الأختبار لم يكن شامل لكل المنهج !

سألت أحد أصدقائي اللي أختبرها وقال كانت المشكله فقط في تشابه الخيارات ....

مع أول يوم من بداية الترم أخذت المقرر وبدأت بالأطلاع عليه وقراءته وجدت في المحاضرات الثلاث أو الأربع الأولى صعوبة في تنسيق محتويات المحاضرة ، المهم بدأت التحدي مع نفسي الى أن قمت ولله الحمد بختمها ثلاث مرات ولو رأيتم المحتوى اللي أدرس فيه لتضحكون تعجبا من كثر الألوان من أقلام الهاي لايت ، الدكتور حسان قالها في إحدى المحاضرات المباشرة وعلى ما أعتقد لدى الطالبات بأن العلماء مطالبين بحفظهم وقال كذلك بأن 90 % المقرر تحفظونه و10% فهم !!!

90 % حفظ يعني بأن في كل زاوية بكل محاضرة من محاضرات المقرر هناك أحتمالية لوجود سؤال أو سؤالين

أخوي الغالي اللي أكن له كل الأحترام والتقدير طموح شايب قام بعمل ملخص سؤال وجواب بشكل شامل وكامل على ما أعتقد بأنه قد قام بعمل ملخص مختصر أيضا للمقرر (( على ما أعتقد))

أنا من الأشخاص الغير مؤيدين للملخصات التي تكون سؤال وجواب خاصة مع الدكاترة ((الجدد)) وذلك لأن الطالب سترسخ في عقله السءال اللي بالملخص وهذا خطأ

ولله الحمد قمت بأداء أختبار المقرر وأنا مرتاح نفسيا ولم أجد صعوبة بل (((حيرة))) بأسئلة لاتتراوح الثلاث أو الأربع أسئلة فقط هي غالبا وأحيانا وعدد الدول

لذا أنصحكم بمذاكرة المقرر من الملخص المطابق للمحتوى فقط بشكل أساسي وأعتمادكم عليه بعد الله عز وجل وبالنسبة لملخصات سؤال وجواب فهي ((للمراجعة )) فقط وليس الأعتماد عليها بأنها هي المذاكرة الأساسية

رأي آخر مفصل ..

من اجمل المواد في محتواها .. تفتح ذهنك على عقليات غير عقليتك .. تعطيك انطباع عن ردة الفعل للجهات اللي تتعامل معاها .. ترفع من ثقافة الطالب علميا و فكريا .. انا عن نفسي استفدت من المحتوى في عملي بشكل رائع .. بالنسبه للأختبار .. كان الدكتور الله يسامحة مبالغ في الاسئله .. الي درجة انه ذكر في احد الاسئله .. اجريت عينه بحث على 131 دوله .. و جاب في السؤال كم عدد الدول التي اجريت عليها العينه ؟؟ .. فعليا انا كطالب لا احتاج عدد الدول التي اجريت عليها العينه و كل ما احتاجه نتايج التجربه .. ناهيك عن اسامي العلماء .. ايضا اجابات جدا جدا قريبه من بعض الي درجة انك تضيع بين الاجابه الصحيحه من شدة الخيارات اللي تشوفها قدامك و تعتبرها كلها صحيحه .. في نظري الدكتور ظلم طلاب كثير و حرمهم درجات عاليه في المعدل مع فهمنا للمادة ..

..........

4- إدارة الجودة 6 نماذج

د. جهاد عفانه

اذا استمر نفس الدكتور اموركم سليمة والدكتور متعاون

كانت الماده سهله و الحمد لله بعد تبسيط الاخت جنون الحياة .. و اتوقع لو ما قريت التبسيط حقها .. كان جبت العيد في الماده بالذات ان الدكتور يعتمد على جزئيات صغيره و دقيقه و الاختبار كان شامل كل المحاضرات دون استثناء و اتوقع انه شامل كل التعداد و العلماء .. و انصح اي طالب ياخذ الماده هذي .. يخلي يوم او يومين قبل الماده عشان يقدر يذاكرها بالاضافه الي مراجعة ملف الغاليه ام جهاد ..

بالنسبه للماده نفسها و محتواها .. في اعتقادي ان الماده اخذت حجم اكبر من حجمها او توسعت في المحاضرات بشكل ممل .. بالاضافه الي انه اكثر الحكي اللي فيها مكرر و حشو و عباره عن جمل اقرب الي تشتيت الطالب..

يعتبر افضل اختبار عندي هالمستوى

ماشاءالله الدكتور كان متعاون كثير

إدارة الجودة // مع الدكتور الأكثر والأكثر والأكثر والأكثر والأكثر من رائع الدكتور جهاد عفانه ، المقرر مرعب وأكاد أجزم بأن كل من المحاضرة (1) و (9) و (10) هي عبارة عن ثلاث مقررات من طول سرد معلوماتها ، الماده بحاجة الى حفظ وفهم بتركيز شديدين جدا جدا ، خاصة بأن الدكتور يطالبنها بحفظ المراحل بالترتيب ، كنت مع ضد الأعتماد على ملخصات سؤال وجواب في هذا المقرر بالذات بسبب أن الدكتور يأتي بأسئلة شاملة لكل محاضرة

نصيجتي مذاكرتها من بدري مع ملخص أم جهاد

............

5- إدارة المشاريع (4نماذج )

د. عبدالله سراج

جزاه الله خير ماقصر الدكتور سراج

جميله جدا الماده ومن اسهل المقرراات

ماده رائعه و حلوه و محتواها مفيد و الحمد لله جا الاختبار على قدر روعة الماده .. و كل اللي يحتاجة الطلب التركيز و الفهم

أدارة المشاريع // مع دكتورها الرائع عبدالله سراج متعاون جدا سلس في أيصال المعلومة وأسئلته مافيها لا لف ولا دوران فيها من مقرر الأساليب الكمية ومقرر ادارة العمليات ، الا أن الدكتور عبدالله سراج جزاه الله خيرا مايجيب مسائل حسابية وهذا هو حلاوة المقرر ، الحفظ وفهم بتركيز

المادة فيها نوع من الدسامة وتحتاج مذاكرة من بدري
دكتورها عبدالله سراج (عسل)

..............

6- تعاقد وتفاوض ( 4نماذج )

د. محمد الجيزاوي

الماده دسمه جداً وتحتاج للتركيز لمن

يرغب في الفل مارك ولكن دكتورها زي العسل وكل اللي اختبروا الان او قبل يمدحوه

مادة جميلة وفيها بعض التشابهات وتحتاج تركيز وتكرار
دكتورها محمد الجيزاوي( عسل )

الماده جميله مع الجيزاوي .. وتعتمد ع الشقلبه بكل شيء

ماده رائعه في محتواها و سهل .. تحتاج الفهم .. تدرب الطالب على كيفيه التعامل في مقابلات التوظيف ايضا الي طريقه التفاوض في شتى المجالات

التعاقد والتفاوض // مع دكتورها الرائع والجميل محمد الجيزاوي ، المادة 90% فهم 10 % حفظ ، الأجمل أنه الدكتور لغى حفظ التعداد بالترتيب مما جعل المقرر يكون أسهل من السهل ، مقرر أستفدت منه كثيراً

البحث أخذ مني أيام ويارب انه ينفعكم

لأنه يوضح لكم صورة عامة عن السنة القادمة

وتساعدكم بإختيار وتنسيق جدولكم

أرحب بأي إضافة تنفعنا

[Hussain AR]

الله يعطيك ألف عافية .. ما قصرتي ..

موضوع مفيد جدا للتخطيط للمستويات القادمة ..

[ليلول]

شكرااا من القلب ربي يسعدكم هذا اللي كنت ابيهه جعل ربي يسعدك
بجد اختصرتي علي اشياء كثيره كنت تايهه فيها
والله يبلغنا بالنجاح وللجمع

[خرجاوووي]

اكيد بينفعنا تصور واضح عن المواد وبيفيد الجميع بإذن الله
لا حرمك الله الأجر..

[yosof a alghamd]

شكراً جزيلاً

المختصر المفيد بالتحديد

[حمود الدعجاني]

جزاك الله خير أختي .. وصف جميل .. بعض المقررات ريحتينا بوصفها والبعض عطيتينا إنذار مبكر لكي نعد العده ..

كل الشكر والتقدير

[أجـــود]

صراحه يعطيك العافيه ماقصرتي

واخذنا فكره شامله عن الدكاتره المتبقيين لنا

كوني بخير

[امواج حائره]

يعطيك العافيه ماقصرتي في بحثك
انا اخذت من سابع اداره استراتيجيه والحمدلله الاختبار كان جميل مع المذاكره الجيده
واخذت من ثامن اداره مشاريع وتعاقد وتفاوفض والاثنين من اجمل المواد الي اختبرتهم دكاترتهم جدا متعاونين

[*النورين*]

مشكوره وفي ميزان حسناتك عمل جدا رائع

[ام حنان]

يعطيج العافية فجورتي ما قصرتي