 |
|
||||||
| ملتقى الفنون الأدبية شعر,نثر,خواطر,قصص,روايات وجميع الفنون الادبية |
 |
|
|
أدوات الموضوع |
|
#1
2007- 12- 5
|
|||
|
|||
|
عيني عليك ياصاحبي , خلي عندك كرامة و رجولة ...
السلام عليكم جميعا
أولا صلوا على الحبيب المصطفى ( صلى الله عليه وسلم ) ثانيا كل واحد منكم أو منكن يروح يعمل مشروبه المفضل وربع كيلو لب ويخليه جنبه علشان التركيز واللي قاعد في سيبر يطلب والحساب عليه هو الشيئ الأكيد ان الأحداث واقعية وللأسف انها واقعية بس أنا عاوزكم تأخدوا لأنفسكم عبرة من الموضوع وأحداثه. بطلنا أحمد اتعرف على مروة كان عمره ٢٢ وهي ١٨ يعني عصافير لسه وكان مكان التعارف كلية التربية مكان دراسة مروة وأحمد تجارة شايف واحدة رافعة ايدها ورا ايوة ياآنثة (لو سمحت يا حاج محمد ايه اللي جاب التربية للتجارة ?) فعلا سؤال وجيه وهنعرف الأجابة وعموما يابنتي اهو كله تعليم!!! أحمد والده الله يرحمه هو واموات المسلمين جميعا كان راجل طيب موظف في المحافظة والحاجة والدته الله يعطيها الصحة موظفة في التربية والتعليم مروة ابوها الله يعطيه الصحة ويسامحه ممن طفوا على السطح ايام السادات وسافر العراق حين كان شابا وكون حوالي 2 مليون بعد مارجع بسنتين الغريب انه لايعرف القراءة او الكتابة !!! اقفلوا بقكم التقيل ورا الحاجة والدة اختنا مروة موظفة في الهلال الأحمر (والله ما كنت اعرف ان عندنا هلال أحمر الا من احمد لما قاللي ) طبعا أنا باحكي لكم الوظائف للعائلتين لكي تكتمل الصورة لديكم لمقارنة موضوعية. المهم حبوا بعض بس حب غباء كان الواد بيكون في احسن حالاته لما بيرجع من لقاءها!! زي مايكون خارج من عند الكبابجي!! وطبعا لما أحمد قاللي عاوز اكلم أمي قلت له وماله ياضنايا كلمهم مش عيب المهم قالهم وكان الرد رفضا قاطعا ليه طيب ? انت مش عايش في البلد ولا ايه?خير بس ?ياابني ابوها فلوسه حرام ?!!هو وأخوه وفلان نصبوا علي تاجر خشب اسكندراني في ملايين والراجل ده الله يرحمه اتوفى بعدها مباشرة الحرام لأ ياابني.. طبعا احنا كشباب للاسف دايما كلام اهالينا تقيل علينا أحمد طبعا لصغر سنه مايعرفش اللى ابوه قالهوله وطبعا مروة استحالة تقول لأحمد مهما بلغت درجة حبها له ولو حتى ٤٨و بتفرفر ده على فرضية علمها بالموضوع من عدمه. المهم سألنا والدي قال لنا كلام ابوك يا أحمد كله صح وكان ساعتها موجود راجل محترم مع ابويا وأكد الكلام وبوقائع وقالواله بلاش ياابني الباب ده طبعا البيه مااقتنعش ومخه مقاس٤٥ مش قابل البعد عنها والبنت فاتحت أهلها ورفضوا من منطلق ( ده مش من توبنا- عيلتهم مش مستوانا يابنتي- هيعيشك منين وفين ?) ومبررات رفض تحط من قدر أحمد وعائلته بطريقة غريبة ودايما اقول له بلاش وانتهينا ياابني اللي يغلط في اهلي اديه بالـ...... ولا افكر فيه يقولي اصلك ماجربتش الحب . مروة ضربوها وحبسوها شوية ومنعوا عنها قناة ميلودي والشامبو يا عيني البنت اتدمرت! وأحمد بعتوا له رسائل تهديد وما فيش نتيجة وفي يوم لقيته باعت رسالة انهم وافقوا والخطوبة قريب شيئ غريب ومايطمنش .. فرحته وانا باكلمه يوم الخطوبة لاتوصف بكلمات وقال لي شفت نتيجة الاصرار المهم كان أحمد خلص الكلية والشغل كان مرتبه قليل المهم جاب عقد عمل فى دولة الخليج أول راح للسعودية كان خارب بيته مكالمات تليفون لوكان اهله كان ماشي انما كلها كانت لخطيبته . لمهم وهو هنك فى السعودية بيبعت هدايا لمروة وفي يوم بيكلم والدته قالت له حماك بعت الشبكة وبيقول كل شيئ قسمة ونصيب . صدمة لأحمد قاتلة أثرت على كل شيئ وأول شيئ الشغل وخاصة انه اتصل بمنزل حماه الكريم ليتحدث معه عن سبب ماحدث وكان لايسمع سوى صوت الجرس (( فيما بعد علمنا أن والد مروة ووالدتها الأفاضل الكرام كانوا بجانب الهاتف ولكنهم تجاهلوه وأكدوا على ابنتهم الكريمة بعدم الرد.!!! ))وقعد 3 ايام ضايع على ايه مش عارف ? وبعد كده كلم مروة وقالت له ما لايصدقه عقل ابوها العاقل الراسي قرر اقامة حفل خطوبة لكي لا يقول من يعلم بانهم يلتقون سرا ويلوثوا سمعة العائلة العريقة وبناء عليه فليتم التلاعب بأحمد كانسان وبعائلته كاملة لبعض الوقت و بعد ذلك مافيش نصيب . قمة الاستهتار بالبشر ! وعلى وعد من مروة بالوفاء ومن أحمد بالاخلاص وبعدم التخلي عنها مهما حدث استمرت العلاقة على أمل ان ربنا يهدي اهلها ويوافقوا والواد كل اما اكلمه يقول لي هي مالهاش علاقة باللي أهلها بيعملوه وحرام أشيلها وزر اللي عملوه أقوله طيب و استهزاؤهم بأهلك يقول لي بكره نبقى واحد يومها كان ردي عليه شديد ولا يمكن كتابته .!! ولأن الله سبحانه وتعالى من أسمائه جل في علاه العدل ولا يقبل الظلم أسامة بيه صاحبنا في يوم ماشي في الشارع قابل أختنا الكريمة مع أحد الشباب سوا سوا وعادي جدا المهم قال لي قلت له متأكد قال لي عيب ده أنا تربيتك ( حلوة دي ? ) قلت لأحمد قال لي مستحيل قلت له بس اتأكد ويومها يا جدعان البنت عملت ميتم وانت ظالمني ده ابن عمتي و كان بيوصلني !! المهم عدت على الواد ياضنايا ! وقعد يعتذر لها! صراحة ياجدعان أنا ما ارتحتش المهم قلت لأسامة تابع الموضوع ده واتضح ان ابن عمتها راجل متجوز ومقيم بالقاهرة لظروف عمله والتاني كان شاب صغير ودلوع وبعد ما ثبتت الرؤية كانت الصعوبة ازاي أقول له ان من يحب قلبها كبير ويساع من الحبايب ١٠٠٠ وحتى لو قلت دمعتين منها والسلام . واحد من الرجالة اللي معانا قال لي شوف ما هو لازم يعرف. قلت له ده حقه علينا بس لازم صدمة تفوقه من اللي هو فيه . قاللي أنا هاخليه يشوف ويسمع وبدون ما أطول عليكم سمعها بنفسه بتخونه زي ما بيقولوا وبعدها بدأ ينحدر مستواه ثانية بعد ذلك ذهب أحمد لقضاء أجازته في مصر وحدث ماكنا نخشاه وعادوا للحديث سويا وعاد المحروس من الأجازة السعيدة و سارت الأمور عادية وتعاملنا معه باشفاق أحيانا وبيأس من عودته لعقله أحيانا أخرى . إلى أن جاء يوم عادى جدا وكعادة أحمد اتصل بمروة شوفوا الحلاوة في اللي جاي رد عليه واحد راح قافل و اتصل مرة ثانية رد عليه وقال له خلي عندك رجولة وكرامة ناس رجعوا لك حاجتك يعني مش عاوزينك أنا قدرك ولازم تستحمله وخلي بالك من مستقبلك وغربتك أنا وهي بنحب بعض ومهما حصل مش هنسيب بعض وإمعانا في اذلال أحمد ولكي يعلمه بجلوسه بجانبه توجه اليها بالحديث قائلا هو مسافر ليه يا مروة? بسم الله ماشاء ا لله سؤال ذكي موضوعي ينم عن عقلية تفوق عقلية د/ زويل نفسه ? أنا كل اللي شفته أحمد داخل عليه زي الأفلام الهندي وفاتح بقه يا ضنايا وبيقولي ده قاعدة جنبه طبعا بعد مافاق حكي لي بالتفصيل وقلت له طيب وانت رديت بايه قال لي انا اتخرست ! والموبيل اللي انا شاريه من تعبي بيكلمني منه والواد جت له نوبة قعد يقول فيه حاجة غلط فيه حاجة غلط. الصراحة يا جدعان رغم كل اعتراضي على الموضوع كاملا فقد حزنت بالفعل على أحمد وماتعرض له من اذلال وشماتة غريبة من انسان لا يعرفه با لمرة واتصلت أنا هذه المرة بعدها بربع ساعة ورد عليه أخونا في الله باستهزاء على أساس أني أحمد وقلت له أنا مش أحمد أنا محمد بس عاوز أعرف ليه انت شمتان بالدرجة دي قال لي لأنه بيبص لفوق ومش عارف قدر نفسه قلت له فعلا هو مش عارف قيمة نفسه والدليل وقوفه علي باب الناس اللي انت وقفت على بابهم عموما مبروك ورجاء بلاش تشمت في مسلم زيك لأن رسولنا نهانا عن الشماتة ولعلمك مردودة عليك في يوم وهنشوف واللهم لا شماتة قال لي ماشي ياعم الشيخ متشكرين قلت له عادي بس انت كنت سألت أحمد هو مسافر ليه ? أقولك أنا هو عاوز يحسن دخله ولو عاوز تشتغل ، تشرفنا فعلا لأن واضح انك شاطر قال لي يا شيخ طيب وهاشتغل ايه بقى ? قلت له اكيد حاجة تليق بيك هنشغلك زير أصلنا هنا بنسقع قلل فكر ورن عليه لما تقرر !! وانتهت المكالمة . احمد قلت له خلاص كده ياحاج ننسي ونركز في حياتنا قال لي ما ينفعش قلت له هو ايه ده قال لي ما ينفعش تتجوز غيري قلت له ليه خير قال لي ماينفعش وخلاص مستحيل افهمني بقى قلت له ولا حصل ايه ? قال لي لأ ما تسرحش دي مراتي ... أن أن ان ......دوووم اتجوزنا عرفي من سنتين !! كده ياعم أحمد ده ينفع قال لى نعمل ايه يعني احنا اتجوزنا ما غلطناش . طبعا دخلنا في محاورة طويلة عن الزواج العرفي ومشروعيته من عدمها ورحنا سألنا الشيخ الله يكرمه ورد قائلا والله بالحرف (( يا بني هذه لا تؤتمن و قد تكون فرطت في نفسها لغيرك انصرف عنها لأن من طبعها الخيانة وسيعوضك ربك خيرا )) أحلى حاجة انه لما كلمها بعدها قالت له خلاص أنا طلقت نفسي منك قطع الورقة وانتهينا طب ليه ? قالت له كفاية كده ....طيب واللي بيننا ? كل حاجة وليها حل وهننسى . كان رده حسبي الله ونعم الوكيل . أحمد عاوز التوبة ومش فاهم اي حاجة من اللي حصل ! خطب انسانة فاضلة بنت ناس كرام طبيبة مثال للاحترام بمباركة كل الأهل وحاليا سعداء جدا الله يتم لهم بالخير لأ والنصيب ييجي من الحرم نفسه لأنها هي والعائلة حلوا ضيوفا بالسعودية بصفتهم من نفس المدينة والله لولا الاحداث حقيقية وانا عايشها لحظة بلحظة لكنت قلت ده فيلم لعماد حمدى يا جدعان الشماتة وحشة قوى ده اول درس ومردودة والله على صاحبه الحبيب قال ((لا تشمت باخيك فيرحمه الله ويبتليك )) بالمناسبة هى اتخطبت لواحد تانى خالص غير عمو اللى رد عليه سيدنا الحبيب قال (( تخيروا لنطفكم فان العرق دساس )) الله يهدي بنات وشباب المسلمين يارب ايه رايكم في الاحداث وفي الشخصيات وهل لو رجعت له تانى تفتكروا ماذا سيفعل ده اللى حاولوا تتوقعوه واللى هيكسب هاديله هدية اما عن نفسي فلظروفي الحالية فانا اكتفيت بحب امى واخواتى البنات والملوخية والبامية والمكرونة سلام عليكم منقول 
|
|
2007- 12- 5
|
#2 |
|
:: مــشرفـة سـابـقـة :: 
|
رد: عيني عليك ياصاحبي , خلي عندك كرامة و رجولة ...
مشكوووور اخوي الاخضر علي النقل
 وحركاات بعد القصه بالمصري  تقبل مروري |
|
|
|
| مواقع النشر (المفضلة) |
| الكلمات الدلالية (Tags) |
| يلد, ياصاحبي, رجولة, عليك, عيني, عندك, كرامة |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
