 |
|
||||||
| ملتقى المواضيع العامة منتدى المواضيع العامة والنقاش الهادف |
 |
|
|
أدوات الموضوع |
|
#1
2007- 9- 19
|
|||
|
|||
|
الموسوعة الكاملة للمذاكرة وحل مشاكلها .. للحصول على نسب في مراتب الشرف
هذا رابط التحميل لملف word مرتب ومنسق وحجمة 24 كيلو بات فقط
واذا فيه مشاكل في التنزيل اتمنى مراسلتي على الايميل mag_ksa@hotmail.com http://upload.9q9q.net/file/321utPCc...ccounting.html هذا الموضوع يختلف كثير عن باقي المواضيع اللي تطرح غالبا عن طريقة المذاكرة فهو شامل على كل المشاكل اللي تواجه الطالب أثناء الدراسة وشامل على جميع الحلول وباللهجة العامية عشان يكون فيه تقبل أكثر وصحيح أنه يذكر المواد المدرسية بدون الجامعية لكن طالب الجامعة ممكن يبدل فقط أسامي المواد إلى مواد تخصصه ويمشي على نفس النظام ومن أهم مزايا الموضوع انه يحل المشاكل المتعلقة بالدراسة واللي هي: النوم والأكل ووقت المذاكرة وتنظيم وقت المذاكرة والمشاكل النفسية وطريقة المذاكرة والمراجعة والزملاء ومذاكرة الاختبارات والاختبارات جميع هاذي مشاكل عند جميع الطلاب تقريبا وفي هالموضوع حلولها كامل نصيحتي اقرأ الموضوع ونفذه بحذافيره وبإذن الله تشوف نسبتك من أفضل ما يكون لكن أتمنى فعلا من أي شخص يقرأ هالموضوع انه ينشره في جميع المنتديات المشترك فيها والمنتديات التعليمية وبشرط انه يكون بنفس العنوان ليسهل البحث عنه ( الموسوعة الكاملة للمذاكرة وحل مشاكلها .. للحصول على نسبة في مراتب الشرف ) ومعه رابط للملف على هيئة (word) بتنسيق مرتب ولإمكانية وضعه في دسك أو طباعته نبدأ الموضوع السلام عليكم كثير من الناس يذاكر ويذاكر ويذاكر وفي الأخير يتفا جئ من النتيجة أنها مو بمستوى مذاكرته يسأل : ليش ؟؟ أنا كنت أذاكر 4 و 5 ساعات في اليوم !!! وفي الأخير هذه هي النتيجة !! مو بنفس مستوى مذاكرتي !!! إذا كنا تذاكر من 4 ساعات إلى 5 ساعات يوميا فأحنى تقضي 7680 ساعة من حياتنا المدرسيه غير الجامعية في الدراسة طيب أنت ما شاء الله عليك ذاكرت هالكم من الساعات 7680 ساعة ولا قعدت ساعة وحده أو ساعتين بالكثير تتعلم كيف تذاكر سمعت الدكتور الرائع رشاد فقيه يقول ( احنى نقضي آلاف الساعات في المذاكرة وما نقضي ساعة وحده نتعلم كيف نذاكر ) وفي هذا الموضوع راح أتكلم عن المخ كأنه جهاز كمبيوتر وهو فعلا مشابه جدا لجهاز الكمبيوتر فيه مشاكل في طريقة مذاكرتنا ما عندنا إلا نفتح أدمغتنا وندخل فيها المعلومات بشكل مبعثر أو الدماغ غير متأهب لإدخال المعلومات وفي الأخير يعمل الدماغ لهاذي المعلومات format والسبب تهنيق وبطئ في تبادل المعلومات ويبدأ الحين في طرح المشاكل وحلها وحده وحده أولا: النوم أكبر سبب في تدني مستوى المذاكرة والتذكر هي النوم متأخر ننام الساعة 12 الليل ونصحى 6 الصباح بكل معاناة بس كلها ساعة وخلاص نصير مصحصين طيب والمخ هل فكرنا فيه ؟؟ المخ يبقى في حاله من عدم الإستجابه مده طويلة وفيه هاذي الحالة من عدم الإستجابه يصعب استيعاب الدرس واستقبال المعلومات ويصعب مذاكرتها وتذكرها المخ يحتاج إلى 8 ساعات نوم على الأقل لأخذ كفايته من الراحة وخصوصا نوم الليل لأن تخزين المعلومات من المذاكرة تحتاج لراحة لحفظها وتحتاج لراحة لاستقبال الجديد من المعلومات وجرب النوم بدري وشوف النتيجة بعد أسبوع والكثير من الناس يفضل القيلولة أو مثل ما نسميها ( نومة العصر ) وهي من ساعتين وتوصل إلى أربع ساعات في فترة النهار وهاذي لها مشاكلها ومنها ضياع للوقت يعني تتغدى بثقل وبعدها تنام بثقل وفي الأخير راح تصحى بثقل وخمول وكسل جرب المذاكرة وقت العصر .... فعلا هو أفضل وقت للمذاكرة ثانيا : الأكل لازم نختار وقت الأكل بحيث أنه ما يخرب علينا المذاكرة ... كيف ؟؟ ما يصلح نذاكر على جوع فالمخ في هاذي الحالة يكون ضعيف الإستجابه بسبب قلة الطاقة الموجودة في الجسم يعني لا يفضل الرجيم وقت الدراسة ثاني شي ما تصلح المذاكرة بعد أكل وجبه دسمه والتخمة لأن الدم يكون متجمع في الأمعاء لأخذ الغذاء والدم اللي يصل للمخ قليل ويؤدي هالشي إلى الخمول وعدم القدرة على المذاكرة أفضل شي هو أكل وجبه خفيفة قبل المذاكرة بساعة أو وجبة دسمه قبل المذاكرة بساعتين ثالثا: الوقت لازم أولا اختيار الوقت الصحيح للمذاكرة أبعد عن هاذي الأوقات آخر الليل أو قبل النوم لأن هالفترة يكون المخ فيها غير قابل لاستيعاب المعلومات بسبب أن الذاكرة ممتلئة وقت شد الأعصاب يعني توك متهاوش مع أحد أو حصل لك موقف عصبك لأن طول هالوقت راح يكون تفكيرك في الموقف ولا راح تركز عالمعلومات اللي تذاكرها أبداً وقت إذا كان عندك شي وودك تسويه مثلا أنك ودك تجلس على الإنترنت لمدة نص ساعة... قدم الإنترنت على المذاكرة لأن طول وأنت مذاكر بتحاول انك تخلص بسرعة حتى لو ما فهمت بس عشان تجلس على الإنترنت لكن لازم تتقيد بالوقت وتجلس نص ساعة أو حتى أقل ولا تعطي نفسك راحتها تجنب وقت المذاكرة بعد مجهود عضلي لأن جسمك راح يكون تعبان ألتزم بهالأوقات وقت الهدوء .. اختار وقت يكون في الوضع في البيت هادئ وابدأ ذاكر أو انك تكون مستقل في غرفة خاصة بعيد عن الإزعاج اختار وقت صفاء الذهن يعني ما تكون مشغول بشي أو مهموم أو معصب أو مالك خلق فصدقني بهالطريقة ما بتستعوب المعلومة رابعا: تنظيم الوقت يجهل الكثير تنظيم الوقت فتلاقي وقته فوضى ما بين المذاكرة والراحة واللعب والطلعة و.. و .. الخ صعب أني أقولك اكتب جدول وامشي عليه لأن مو كثيرين يقدرون يمشون على الجداول ( وأنا منهم ) لكن إذا شفت في نفسك أنك تقدر تمشي على جدول فسوي لك جدول أما إذا كنت ما تقدر تسوي جدول وتمشي عليه مثل حالتي فاتبع اللي إنا كنت اسويه كنت دائما أقر في نفسي أن إنا في مرحلة حسم يعني يا غالب يا مغلوب ولازم انظم نفسي وبالنسبة لتنظيم الوقت حاول أنك تضبط وقتك بحيث اليوم يكون فيه ثلاث ارباعه للمذاكرة وربعه الباقي للراحة واللعب وغيره ومن الأفضل انك تختار وقت معين يكون هو وقت المذاكرة مثل اللي اسويه اختار من 4 العصر إلى 7 الليل ويكون هذا هو وقتي الخاص بالمذاكرة أما بالنسبة للخميس والجمعة فاعتبرها كأنها الإجازة الصيفيه وخذ راحتك وأنسى شي اسمه الدروس والمذاكرة (إلا إذا كان عندك اختبار) لأنك لازم توفق بين الراحة والمذاكرة وإلا بعدها راح تصاب بحالة من الملل والتعب والكره للكتب خامسا : المشاكل النفسية في أوقات المذاكرة والثقة بالنفس تصيبنا كثير مشاكل نفسيه وقت المذاكرة ومنها الملل والإحساس بالفشل وعدم الثقة بالنفس لكن فيه طرق نقدر نتجنب فيها هالمشاكل الملل كثير من اللي توهم بدئوا يذاكرون بجد واجتهاد حسو بملل والسبب هو إن هذا شي جديد عليهم وما تعودو عليه ومن يومهم وهم ما يحبون الدراسة ويكرهون المذاكرة والحين فجأة صارو ملزومين بالمذاكرة أفضل طريقة لتجنب هالمشكلة هي انك تبدأ مذاكرتك شوي شوي إذا كنت جديد على المذاكرة يعني ابدأ من اليوم الأول مثلا بمذاكرة مادة الرياضيات والكيمياء واليوم الثاني للفيزياء والإنجليزي واليوم الثالث للأحياء ومواد العربي لمدة أسبوع والأسبوع الثاني خليها ثلاث مواد والأسبوع الثالث خليها 4 مواد والأسبوع الرابع تصير 5 مواد وهنا تصير في وضع ممتاز ولكن أهم شي مذاكرة المواد العلمية كل درس بدرسه واعتبر نفسك في حالة حرب وحط في بالك هالاشياء زين زين : ( إذا ما شديت حيلي وجبت معدل عالي مستقبلي بيضيع ) (راح اندم على كل ساعة فوتها بدون ما استغلها في المذاكرة ) الإحساس بالفشل فيه كثيرين فشلو بالاختبارات البسيطة وفقدو الأمل في النجاح وحسو بالفشل بسبب اختبار ومنهم أنا ...مره من المرات بسبب احد اختبارات الكيمياء الشهرية ( اختبارات تقييميه) أخذت فيه 5/10 وحسيت إني فقدت الأمل في كل شي حتى في باقي المواد مع أن الكيمياء كانت سهله بنظري ولكن استغربت لما أخذت هالدرجه لكن بما أننا كنا في ثاني ثانوي وكانت الاختبارات التقييمية وكانت نسبتنا تراكمية مع ثالث ثانوي كانو المدرسين بعادتهم يختبرونا ثلاث اختبارات للمواد العلمية ومن كلامهم أنهم بياخذون أعلى درجتين ويقسمونها على 2 أنا هنا تحمست وقل لازم ادفن الدرجة الأولى وفعلا أخذت في الاختبار الأول 10 والثاني 9 وانقسم على 2و أنجبر النص وأخذت في الفصل الأول في الكيمياء 49 والفصل الثاني 50 وطلعت نتيجتي في الكيمياء 99/100 وأعلى درجة في الشهادة بعد ما قلت أن الكيمياء اللي بتهدم مستقبلي جبت فيها أعلى درجة في شهادتي عدم الثقة في النفس كثيرين ما يثقون في أنفسهم وفي قدراتهم ويشوف اللي نسميهم الدوافير ياخذون 99% و 100% ويقول في نفسه مستحيل أوصلهم أو حتى اقرب منهم وهذا هو البلى .. هنا تنعدم الثقة بالنفس وبالتالي يقل الحماس إلى الصفر أنا كان طموحي أن نسبتي توصل 90% ( مع أني كان ودي بحول 85% بس ) وكنت أقول هنا أنا راح أكون مرتاح وهذا كل اللي ابغاه وكان طموحي إني ادخل أي كلية وكنت قبل ما استلم الشهادة أتخيل مجرد تخيل أني نسبتي 95% وكنت اضحك وأقول يا زين هالتخيل والله أحلامي فوووووق فتفاجأت بتقريري الفصلي وهو يعطيني نسبتي أن نسبتي 93% فاستغربت من نفسي كيف قدرت أجيب هالنسبه بكل سهوله فقلت لازم اشد حيلي وأحاول الفصل الثاني أوصل النسبة 94% ( يعني أجيب الفصل الثاني 95% ) شيدت حيلي بشكل مو طبيعي وتفاجأت من النسبة !!!! طلعت نسبتي 94.94% وبرقم مميز بعد .... يعني جيت الفصل الثاني 97% أنا أجيب 97% !!!! أني اللي كنت أقول لا يمكن أتعدى الـ 90% الحين أجيب 97% !!!! فعلا الواحد منا إذا صار فاقد الثقة في نفسه تصعب عليه أشياء كثيرة وإذا تسلح بالثقة بالنفس يقدر يسوي أشياء كثيرة.. بس لا تكون واثق لدرجة الغرور بنفسك فصدقني راح تقدر تجاري أصحاب النسب العليا لكن لازم تحط في بالك شي مهم وهي الفوارق الفردية لأن الله عز وجل أعطى كل واحد قدرته على الفهم والاستيعاب لكن أنت المطلوب منك تسوي كل اللي تقدر عليه لو نتكلم عن الثقة بالنفس لازم يجيك طالب ويقول أنا مستحيل أجيب هالنسبه ما اقدر ... كل واحد وله قدراته ما نختلف أن كل واحد وله قدراته لكن انعدام الثقة بالنفس أهم سبب للفشل مو بس في الدراسة حتى في جميع أمور الحياة خليك دائما واثق من نجاحك وواثق من العمل اللي تسوي وواثق من مستواك ومن مذاكرتك وانك سويت اللي عليك ولا تخلي خيبة الأمل تسيطر عليك بمجرد انك فشلت في شغله بسيطة معلومة مهمة جدا يجلها كثير من الناس أكثر الناس يعتقد أن التذكار هو في العقل ويعتمد على العقل "التذكار هو تذكر اللي ذاكرته من دروسك في وقت الامتحان" لكن الحقيقة التذكار هو في النفس ... تبغون الإثبات ادخل الاختبار وأنت حافظ الكتاب كامل لكن وأنت خائف ومتردد ومرعوب من الاختبار وصدقني أنواع النسيان والغلطات لكن ادخل الاختبار حتى لو ما كنت حافظ الكتاب بشكل ممتاز جدا لكنك واثق من نفسك وواثق من اللي ذاكرته وصدقني بتكون أحسن من الأول طيب البعض يقول كيف أتغلب على الخوف ادخل القاعة وأنت مبتسم وتكلم مع زملائك وحس بارتياح تام وانك ذاكرت وسويت اللي عليك وأديت واجبك والباقي على ربك 
|
|
2007- 9- 19
|
#2 |
|
أكـاديـمـي
|
رد: الموسوعة الكاملة للمذاكرة وحل مشاكلها .. للحصول على نسب في مراتب الشرف
سادساً: طريقة المذاكرة
بما أننا عرفنا الأساسيات اللي لازم نعتمد عليها عشان نقدر نذاكر بشكل صحيح نبدأ الحين نتعلم كيف نذاكر (((((المذاكرة أول بأول))))) دائما نسمعها من كل اللي ينصحونا في المذاكرة سواء معلمين أو آباء أو أخوان أو زملاء وفيه استخفاف بهالنصيحه لدرجة التطنيش يجيك الطالب يذاكر المادة مره أو مرتين في الأسبوع وهي المفروض يذاكرها 4 أو 5 مرات في الأسبوع طيب ما تدري يا طالب إن المعلومة اللي تأخذها في المدرسة لو ما تذاكرها في نفس اليوم أنها بتطير من راسك !!! ولا تقول لي لا أنا اقدر أذاكرها زين ... راح يفضل عندك مشكلة واللي هي إلتمام الدروس وبالذات إذا كانت مواد صعبه مثل الرياضيات والفيزياء وهاذي مواد تمارينها متتابعة ومختلفة في قوانينها وأساليب حلها ولازم تذاكر كل وحده منهم باستقلاليه يعني لو تذاكر درس رياضيات ودرس كيمياء ودرس فيزياء ودرس أحياء ودرس إنجليزي بيكون درس واحد بس وخفيف ويمديك مو بس تذاكره .. يمديك تبدع في مذاكرته وتدخله في مخك زين أحسن من انه يكون عندك درسين أو أكثر في ماده وتذاكره بسرعة ولا تحاول تهرب من دروسك لأنك لو هربت من درس بيلحقك ليوم ثاني بس انه بيكون ملتم مع درس ثاني وبيكون أصعب وأصعب. طيب فيه لطريقة مذاكره حلوه واللي هي تقسيم الدرس بس أول شي لو أعطيك هاذي الأرقام وأقولك أحفظها تقدر تحفظها وإلا لا 637650503216954 صعبه وبتلخبط فيها كثير طيب لو اعطيكياها كذا 637 650 503 216 954 راح يكون حفظها صعب شوي بس ما تلاحظ إنها أسهل من الطريقة الأولى وهذا بالضبط شي أساسي لازم تعتمد عليه اللي هو تقسيم الدرس إذا كان الدرس عندك عبارة عن حفظ مثل قصائد في مادة الأدب لازم أولا انك تحفظ بيتين وترددها حتى تثبت في مخك وبعدها تحفظ بيتين لحالها وترددها حتى تثبت في مخك إلين تحفظ القصيدة كأمله تعال الحين ردد القصيدة كاملة وحاول تحفظها راح تلقى الموضوع صار سهل جدا وأسهل من انك تحفظها كلها دفعه وحده حتى في دروس الفهم كثير من دروس الرياضيات تكون مقسمه لأكثر من قسم مثلا تلقى في الدرس الواحد أكثر من طريقة لكتابة السؤال وأكثر من طريقة للحل أحفظ وحده من الطرق وخليها تمسك في مخك زين وكأن ما معك إلا هاذي الطريقة بس وبعد ما تحل عليها التمارين وتفهما زين خذلك نَفَس وابدأ بالطريقة الثانية والحل الثاني وبالشكل هذا بالتفصيل ما بين الحلين عشان ما تلخبط بينهم ولو جينا للكيمياء مثلا عندك 8 عناصر كيميائية لازم تحفظ رمزها وخصائصها واستعمالاتها أكبر غلط انك تحفظ الثمانية كلهم سوى لأنك بتلخبط فيهم أول شي أحفظ عنصرين بشكل ممتاز وبعدها خذلك راحة 3 أو 4 دقائق ثم أبدا بعنصرين ثانيه وخذلك راحة .... حتى تخلص. حط في بالك شي مهم جدا أن المخ غالبا ما يستحمل مذاكرة أكثر من ساعة وعلميا اثبت أن استجابة المخ للمعلومات تتوقف بعد 45 دقيقة من المذاكرة وإذا كان ودك تختبر نفسك إذا كان مخك يستجيب أو لا سوي الاختبار هذا ابدأ بالمذاكرة وبتحس أنك نشيط وتستقبل أي معلومة تقراها وبعد تقريبا 45 دقيقه إلى ساعة بيبدأ ذهنك يتشتت وما تلقط المعلومة زين وعيونك ما تركز على الكتاب وتبدأ تسرح في هاذي الحالة وقف لأن أي معلومة بتقراها ما بتدخل مخك وإذا دخلت مخك بتطير بالراحة لأن الذاكرة ممتلئة وإذا قدرت تذاكر ساعة لازم ترتاح 30 دقيقه على الأقل عشان يرتب المخ كل المعلومات اللي أخذها من المذاكرة يعني ترتاح نص الزمن اللي ذاكرته وهذا الشيء زى اللي يرمي عليك كتب مده نص ساعة لازم تأخذ فترة راحة عشان ترتب الكتب المخ أنت ترمي عليه معلومات ولازم تعطيه راح يرتبها فيه كثير منا يحل مسالة رياضيات أو مسالة فيزياء وبعد أسبوعين أو ثلاثة أو وقت الاختبار لما يذاكر لاختبار قصير أو يراجعها يحس بصعوبة أو فيه شي ناقصة ومو قادر يحل المسألة ... ويحاول يتذكر كيف حل المسألة المره الماضية ... كان فيه أسلوب معين أو ثغره في المسالة قدر يدخل فيها على الحل... بس وش هالاسلوب .. نسيه !! وهاذي مشكلة وأحسن طريقة لتجنب هالمشكلة هي اكتب شرح الحل في الوجه الثاني من الصفحة وكيف حليتها خطوه خطوه وبكلامك السلس وبدون فلسفة وكلام فصيح لأن ما بيقراه إلا أنت وهاذي طريقة ناجحة وجربتها شخصيا وشي مهم جدا وقت المذاكرة واللي هو الدفتر الكشكول والقلم لازم أي شي تحفظه أو تفهمه انك تكتبه على ورقة سواء كان تمرين أو قانون أو تعريف أو نقاط أو مصطلح أو خصائص أو قصيدة أو قاعدة.... الخ ودائما في المسائل إذا خلصت من فهمها اقرأ السؤال واكتب حله في ورقة خارجية لا تقول لا فهمت ما يحتاج أعيد... لأنك بالطريقة هاذي بتنساه حتى لو كان سهل جدا ونصيحة صدقوني صدقوني مهما كانت المادة صعبه ولو كانت الهندسة النويية لو تذاكرها كل يوم بيومه وتراجعها والله بتكون سهله ما فيه شي صعب بالمذاكرة المستمرة سابعاً: المراجعة وهي أهم شي في عالم "الدوافير" إذا كان ودك تدخل عالم الدوافير فعليك بالمراجعة كثيرين ما يهتمون بالمراجعة ويقول إنها مو مهمة أولا راح اشرح طريقة المراجعة ثانيه راح اثبت لك الفرق بين انك تراجع وانك ما تراجع (يعني فائدة المراجعة) طريقة المراجعة خلي هالمعلومه الصحيحة والمثبتة في بالك المعلومة اللي تدرسها اليوم بتطير بعد 24 ساعة يعني ما تستمر إلا مدة يوم واحد والمعلومة اللي تراجعها بعد 24 ساعة بتطير بعد أسبوع والمعلومة إذا راجعتها زيادة بعد أسبوع بتطير بعد شهر والمعلومة إذا راجعتها زيادة بعد شهر بتطير بعد 6 شهور والمعلومة إذا راجعتها زيادة بعد 6 شهور ما يتطير من مخك إلى الأبد طيب البعض يقول كيف أراجع.. وما يمديني أراجع إذا كنت أذاكر كل المواد العلمية ولمدة 3 أو 4 ساعات المراجعة هي كأنها مذاكرة الدرس من جديد درس في الرياضيات أول ما بتذاكره بتفهم الدرس وبتحل عليه مسائل ونفس الشي في المراجعة .. افهم الدرس وحل عليه مسائل بس طبعاً المراجعة بتكون أسهل لأنك بتكون فاهم الدرس وبتقراه قراءة وبهالطريقة بس بتحل تمارينه إذا كان عندك في احد المواد نقاط تحفظها 1 و 2 و3 و4 تحفظها وتسمعها لنفسك وقت المذاكرة ونفس الشي وقت المراجعة ممكن إذا حبيت انك تختبر نفسك وتحل مسالة رياضيات وقت المراجعة بدون ما تشوف الحل لكن حط في بالك زين انك إذا فشلت فيها مو معناه انك فشلت .... لأنك ما زلت تدرس هاذي المسألة .. والمراجعة جزء من الدراسة مو المشكلة إذا غلطت في المراجعة ... الميزة إذا حليتها صح عشان كذا حط في بالك زين انك ما فشلت إذا ما حليت المسألة وقت المراجعة وإذا غلطت ارجع للدرس وذاكره وافهمه وشوف المسألة وكيف انحلت وحلها مره ثانيه وهذا هو المطلوب طيب كيف يمديك الوقت أيام المذاكرة الأسبوعية بما انك تذاكر كل يوم لازم يجيك يوم ثقيل ويوم خفيف كل يوم خفيف ما تذاكر فيه إلا ساعة حاول تمسك ماده وتراجعها من أول وجديد يمكن تاخذ منك ساعتين بس صدقني الجهد بيكون جسدي مو عقلي لأن بتكون فاهم هالأشياء من أول وما فيه مانع لو تكون مادتين في الأسبوع وهالشي بتعرف فائدته وقت الاختبارات وبهالطريقة نطبق طريقة المراجعة الصحيحة وعدم النسيان واهم شي يكون معك دفتر كشكول وقلم تسجل عليه كل شي ذاكرته ( نفس آخر نقطه في طريقة المذاكرة ) بالنسبة للفائدة المراجعة خلونا نثبت هالشي أخذت مادة الرياضيات وما ذاكرتها ولا راجعتها أبدا لمدة شهر وأخذت في هالشهر 15 درس ال15 درس هاذي بتذاكرها لمدة يوم كامل على الأقل طيب لو تذاكر كل يوم لمدة شهر وبدون مراجعة لمدة شهر وأخذت في هالشهر 15 درس ال15 درس هاذي بتذاكرها في اقل من 5 ساعات طيب لو تذاكر كل يوم لمدة شهر وتطبق طريقة المراجعة الصحيحة اللي تأخذ فيها المادة من أولها في يوم خفيف لمدة شهر وأخذت في هالشهر 15 درس ال15 درس هاذي بتذاكرها في اقل من ساعتين وإثبات ثاني وأنت تذاكر الدرس بياخذ منك 15 دقيقه وما بيثبت في مخك زين ولما تراجعه بعد أسبوع بياخذ منك اقل من 10 دقايق وبيثبت في مخك مراجعة ثانية بياخذ منك اقل من 5 دقايق وبيكون ثابت في مخك زين تخيل انك في ليلة الاختبار وش أحسن لك تذاكر 15 دقيقه وما يثبت في مخك زين أو مراجعة ثالثه وياخذ منك اقل من 5 دقايق ويثبت في مخك زين طبعا الثانية وهالشي يثبت أن المراجعة لها فوائدها فتخيل انك تذاكر في ليلة الاختبار بالطريقة الأولى تخيل الصعوبة اللي يتواجها أو تخيل انك تذاكر بالطريقة الثانية وش أسهل بنظرك وأنت تراجع بتحس بصعوبة ويمكن حتى ما تخلص ولا ربع المنهج لمدة يوم كامل تخيل انك في هذا الوضع ليلة الاختبار !!!! ولاحظ صعوبة الدرس أول ما تذاكره وصعوبة المراجعة أو ما تراجع تخيل انك في هذا الوضع ليلة الامتحان يا ترى كيف بيكون شعورك أصعب شي المذاكرة وأسهل منها المراجعة الأولى وأسهل من المراجعة الأولى الثانية وأسهل من المراجعة الثانية المراجعة الثالثة كل ما راجعت أكثر كل ما ثبتت المعلومة في مخك وكل ما سهلت عليك المراجعة |
|
|
|
2007- 9- 19
|
#3 |
|
أكـاديـمـي
|
رد: الموسوعة الكاملة للمذاكرة وحل مشاكلها .. للحصول على نسب في مراتب الشرف
ثامنا: وأنت في الفصل
دائما ما نلاحظ أن الصف الأول في الفصل يكون فيه الدوافير ليش ؟؟؟ لأن هالمكان هو أفضل مكان للفهم ولأكثر من سبب أولا الانتباه بيكون المدرس في وجهك علطول وكل مره يطالع فيك عشان كذا ما بتسرح وبتكون مركز معه بعكس لو كنت ورا بتكون أكثر الوقت سرحان وتسولف مع اللي جنبك وثانيا التفرغ للفهم لو تكون ورا اللي جنبك واللي قدامك واللي وراك بيسولفون معك وبيشغلونك أو حتى أنت تشغلهم لكن لو كنت قدام ما بيقدر احد يكلمك أو تكلم احد عشان المدرس ما ينتبه له حاول دائما انك تكون مركز في الفصل ومشارك وعلى فكره ترا المدرس ياخذ طابع ممتاز جدا عن الطالب اللي يشارك ويساعده كثير في مسألة الدرجات لأنه طالب يستاهل ولا تسمح لزميلك اللي جنبك انه يشغلك عن التركيز في الدرس تاسعاً : أصحابك لازم تختار الصديق الصحيح ولا تستهين بهالمسألة لأن الصديق بيعطيك نفس خصائصه والصديق السيئ تغلب صفاته صفات الصديق الحسن لازم تختار المهتم بدراسته واللي شعاره وقت الجد جد ووقت اللعب لعب لا يغرك واحد يقولك : (مسوي دافور وتماشي دوافير ... وتلبس النظارات المدورة ومؤدب وقاعد قدام أول واحد ) ويضحك عليك ويعلق عليك موجودين كثير مثل هالأشخاص بس بقولك شي مهم مثل هالنماذج لا تهتم لها عارف ليه ؟؟ لأنه عمره ما راح يفيدك ... وإذا مشيت وراه أنت الخسران ... وإذا خسرت والله ما بينفعك وحتى لو كان اعز أصحابك.. لا تهمل دراستك عشان صديق سيء خله يتكلم وخله ينقد ويسوي اللي وده يسويه .... في الأخير أنت اللي بتكسب وخله هو عايش مع عقده وبيجي وقت ويندم على انه ما اهتم زي اهتمامك بس بعد ايش ؟؟؟ بعد ما تطير الطيور بأرزاقها عاشرا : المذاكرة للاختبارات والاختبار لو اتبعت كل الطرق التسعة الموجودة فوق بكامل حذافيرها المذاكرة للاختبارات بتكون أسهل منهم كلهم النوم والمذاكرة الجيدة والمراجعة واختيار الصديق والوقت كلها أصعب من مذاكرة الاختبار إذا قدرت تعديها يبقى لنا آخر شي اللي هو المذاكرة الاختبار كيف تذاكر للاختبار إذا كنت بتذاكر الكتاب كامل أو مثلا نصف الكتاب لفترة يوم أو يومين ابدأ بالدروس الصعبة والسبب ان أقصى جهد ممكن تبذله هو أول فترات المذاكرة واللي يكون المخ فيها في أنشط حالاته للمذاكرة والدروس السهلة بيسهل فهمها حتى لو كان لو المخ تعب لكن إذا ذاكرت الدروس السهلة شي أكيد ان استجابة المخ بتقل ولو شي بسيط وبتكون الدروس الصعبة أكثر صعوبة . حط في بالك انك بتكون مراجع من أول لازم قبل الاختبارات بثلاث أسابيع على الأقل أو حتى شهر تمسك كل ماده ( وابدأ بالمواد العلمية ) وذاكرها من أولها وفصصها بحيث انه ما يبقى عليك شي ليلة الاختبار طريقتي في المذاكرة كانت في الثانوية بديت أذاكر من قبل الاختبارات بشهر ومسكت أول شي الفيزياء وقعدت فيها قرابة الـ5 أيام وبعدها الأحياء وقعدت فيها 3 أيام ثم الكيمياء وقعدت فيها 4 أيام ثم الرياضيات وقعدت فيها أسبوع ثم الإنجليزي وقعدت فيه 3 أيام ومسكت مواد الدين والعربي والحاسب آخر شي وقعدت أقل من أسبوع الآن باقي لي أسبوع واللي هو آخر أسبوع للدراسة وش أسوي فيه ؟؟ أخذته راحة إلى يوم الأربعاء يعني تقريبا خمسة أيام لأني لازم على الأقل أريح مخي شوي واسترخي جسدياً وعقلياً عشان ادخل مذاكرة الامتحانات وأنا مرتاح ويوم الأربعاء بدأت بالرياضيات وحسيت نفسي تأخرت قلت يا ليت بدأت من يوم الثلاثاء بس لو أقولكم شي ما تصدقون خلصت الرياضيات والمنهج كامل يوم الأربعاء في 5 ساعات بس وش أذاكر ؟؟ كل شي عارفه و كل شي فاهمه !! أمر على الدرس احل تمرينه بسرعة واللي ياخذ نص صفحه أو صفحه كاملة وكأني احل مسالة 3×3= ؟؟؟ تفاهه إلى أبعد درجه والحمد لله أخذت درجة كاملة المشكلة ليلة الاختبار هي التوتر والشد النفسي عشان كذا حط في بالك أن مذاكرة ليلة الاختبار ما يتكون كلها في المخ لأن التوتر بيحرق اللي ذاكرته في ليلة الاختبار يعني احسب حسابك ان مذاكرتك الأولى قبل 3 أسابيع من الاختبار هي الأساس وإن ليلة الاختبار هي للمراجعة لأن التوتر ما بيسمحلك تفهم الجديد لأن أنت تذاكر... وإلا تفكر بالاختبار !!! أما المنبهات ومشروبات الطاقة مثل بايسن وريدبول وباورهورس ما اعرف فيها كثير واللي وده يجرب شي أنا جربته وشفت نتيجة لا بأس فيها هي النيسكافيه الذهبي ( علبه كبيره قيمتها حدود 40 ريال ) تحتوي على نسبة ممتازة من الكافيين وتفتح فيها مخك وأنتبه من الحبوب المنومة أو حبوب الزكام ( مثل فلوثاب أو بنادول كولد آند فلو ) لأنه يسبب خمول وكسل بسبب المهدئ اللي فيها ويمتد إلى اليوم الثاني أفضل طريقة للمذاكرة لليلة الاختبار هي كالتالي بعد ما ترجع من الاختبار لازم تريح .. لازم لازم ترتاح وما فيه مانع انك تنام ساعة وحده وكل وجبه خفيفة جدا وبعدها بساعة ابدأ بالمذاكرة والطريقة اللي اتبعها هي مذاكرة لمدة ساعة وراحة لمدة نص ساعة النص ساعة راحة يكون فيها الأكل أو طلعه أو غيره لكن احرص دائما وقت الاختبارات ما تأكل أكل ثقيل يعني خل يكون معك بسكوت أو ساندويتش وكثر من العصائر وهذا كل أكلك .. صحيح بنقص وزنك كثير لكن هي فترة أسبوعين تحملها لكن أكل دسم زي رز أو لحم هاذي بتملئ بطنك وبتسوي لك مشكلة في التركيز حاول انك تنام فتره 9 ساعات لأنك بتكون هنا نشيييييييط ومخك مفتح إلى ابعد درجه في قاعه الاختبار لا تنسى دائما قراءة المعوذات والأدعية ( اللهم لا سهل إلا ما جعلته سهلا وإنك إن شئت جعلت الحزن سهلا ) وقول لا إله إلا الله بترتاح نفسيا وحاول انك تنسى القلق ورهبة الاختبار وحط في بالك انك في أيام المراجعة وهاذي شغله بسيطة بتخلصها في ساعة وتمشي وما تحتاج كل هالقلق واضحك وسولف مع زملائك ولا كأن فيه اختبار أبدا لان مشكلة وقت الاختبار هي الخوف والتوتر واللي تطير المعلومات من راسك بالراحة واحرص آن يكون خطك في الورقة واضح ولا تكثر الشخابيط لان المدرس إذا شاف شي مو واضح بيحطه لك غلط راجع ثم راجع ثم راجع وبالذات الحسابات تكون واثق من المسألة جدا ومتأكد منها لكن فجأة وأنت تراجع تكون نسيت إشارة (-) فتعفس الناتج كامل أو يكون نسيت تحط الفاصلة وسويت عمليه حسابيه وودى الناتج آخر الدنيا أو نسيت تحط وحده أو غلطت في عملية حسابية أو فيه رقم مو واضح عندك بنيت عليه نتيجة غلط أو سؤال قريته غلط أو اخترت خيار لسؤال ثاني نصائح عامه مهمة جداً * لا تعطي نفسك وجه .. لأن لو على كيف نفسك ما ذاكرت ولا اجتهدت ولا سويت شي... خليك في تحدي بينك وبين نفسك * حاول تبعد عن المذاكرة الجماعية قد ما تقدر لأنها تروح في السوالف غالبا *حاول تعتمد على نفسك في الدروس ولا تعتمد على احد يذاكرلك سواء مدرس خصوصي أو قريب أو زميل ... إلا بعد الدرس مباشرة ممكن تسال زميل عن نقطه ما فهمتها * أنتبه وأنتبه وأنتبه من شي اسمه غياب ... لا تغيب إلا لسبب ضروري جدا جدا لأن غيابك يوم واحد بيفوت عليك دروس وبنفس الوقت بيطلعك خارج مود الحضور والمذاكرة .. لأن غيابك يوم واحد بيسحب باقي الأيام غياب * لا تستحي انك تسأل المدرس ابدأ ولا تقول عن نفسك غبي إذا سألت.. بالعكس أنت بتكون غبي إذا ما سألت .. لكن اسأل عن شي مو فاهمه مو بس لمجرد السؤال * عشان تجتهد ادخل في تحدي (بينك وبين نفسك ) مع زملائك وانك تتحداهم انك بتجيب أعلى درجه ... بس طبعا بينك وبين نفسك بدون ما تعلنها قدامهم .. هذا دافع معنوي قوي جدا وأنا جربته ونفع كثير * دائما وقت المذاكرة ابعد عن أي شي يشغلك مثل الجوال .. وإذا ذاكرت 15 دقيقه أعطي نفسك دقيقتين نَفَس وارجع ذاكر مره ثانيه * في أيام الاختبارات ابعد عن مسببات الأمراض مثل التكييف والمشروبات الباردة * لا تخلي خيبه الأمل تسيطر عليك ابدأ ... وخليك دائما متفائل لأن عمر التشاؤم ما ينفعك * إذا حسيت بتعب وقت المذاكرة ارتاح لان مذاكرة مع تعب ما بتستفيد شي وإذا نعست نام * صعوبة الدرس أو غيابك سبب في انك تترك الدرس وما تذاكره حكمة خليها دائما في مخك * ما فيه أي شي صعب مع المذاكرة المستمرة * محمد الغامدي |
|
التعديل الأخير تم بواسطة علي المطر ; 2009- 9- 29 الساعة 04:56 PM |
|
|
|
|
2007- 9- 19
|
#4 |
|
:: مــشرفـة سـابـقـة :: 
|
رد: الموسوعة الكاملة للمذاكرة وحل مشاكلها .. للحصول على نسب في مراتب الشرف
 يسلمووووووووووووووووووووووووووووووووووو معلومات إبداع وأحس إني تحمست وإن المذاكرة مافي أسهل منها ,, ربي يعطيك العافية ,, |
|
|
|
2007- 9- 19
|
#5 |
|
أكـاديـمـي ألـمـاسـي
|
رد: الموسوعة الكاملة للمذاكرة وحل مشاكلها .. للحصول على نسب في مراتب الشرف
شكــــــــــــــــــــــــــــــــــــــــــــــــ ــــــرا جزيلا على الموضوع الحلو
موضـــــــــــــــــــــــــــــــــــوع رائـــــــــــــــــــــــــــــــــــــــــــــــ ـع رائع رائع لين بكره اقول رائع وهلا فيك في ملتقانا بما انك جديد :c8: أتحفنا بمواضيعك الحلوه اللي مثل ذي
|
|
|
|
2007- 9- 20
|
#6 |
|
أكـاديـمـي
|
رد: الموسوعة الكاملة للمذاكرة وحل مشاكلها .. للحصول على نسب في مراتب الشرف
تسلم اخوي الامع عالموضوع المفيد
باركك المولى تقبل مروري وتحياتي الميرزيهــ,,, تحياتيـ,,, |
|
|
|
2007- 9- 20
|
#7 |
|
:: مــشرفـة سـابـقـة :: 
|
رد: الموسوعة الكاملة للمذاكرة وحل مشاكلها .. للحصول على نسب في مراتب الشرف
بارك الله فيك وجزاك الله الف خير:praying: :s12: |
|
|
|
2008- 3- 30
|
#8 |
|
أكـاديـمـي
|
رد: الموسوعة الكاملة للمذاكرة وحل مشاكلها .. للحصول على نسب في مراتب الشرف
:s3:
 بارك الله فيك :c8:
|
|
|
|
2008- 3- 31
|
#9 |
|
أكـاديـمـي
|
رد: الموسوعة الكاملة للمذاكرة وحل مشاكلها .. للحصول على نسب في مراتب الشرف
والله انا اتعبتني الرياضيات وخاصه التكامل
طرق للسؤال ومئه طريقه للجواب بس انشالله نستفيد من الملف تسلم والله 
|
|
|
|
2008- 7- 17
|
#10 |
|
أكـاديـمـي
|
رد: الموسوعة الكاملة للمذاكرة وحل مشاكلها .. للحصول على نسب في مراتب الشرف
مشكووووووووووووووور ويعطيك العافيه
|
|
|
|
| مواقع النشر (المفضلة) |
| الكلمات الدلالية (Tags) |
| للمذاكرة, للحصول, مراتب, مشاكلها, الموسوعة, الشرف, الكاملة, علي, نجم, نسب |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
