[ جميع التخصصات ] : إلى كل من تريد الالتحاق بقسمي العزيز ( علم اجتماع وخدمة اجتماعية )

[Drop honey]

السلام عليكم ورحمة الله وبركاته

اول شيء اهلا فيكم حبيباتي
هذا الموضوع كان ببالي من زمان ، لأني شايفه التخبط اللي التحضيري حاسين فيه :58545:
مره مو عارفين ايش يبون يتخصصون وكذلك عندهم نقص في المعلومات
ولأني كنت مثلكم وحاسه زيكم وكنت افكر وافكر
حتى بالحرم استغفر الله جالسه ادعي عشان التخصص وناسيه الآخره ,,,,>> الله يخلف هههههههههههههه

المهم يا حلوووين ابدأ /

القسم يحوي 4 اعضاء هيئة تدريس هم كالآتي :

1-د.موزة الكعبي : انسانه طيوبه مبتسمه دوم الله يسعدها ، تشجع المناقشة بالمحاضرة ، تحب اللي تناقش وتعرض تجارب او قصص ، دائماً محاضراتها مدعمة بالقصص اللي واجهتها في حياتها ، الجلسة معها مفيدة جداً وتساعدك مرررره في مجال التخصص ، بالإضافة الى انها طيووبة ما تحب البنت اللي تاخذ درجتها وتسكت ، لا بالعكس اذا عندك تساؤل او اعتراض تتكلم معاك بصدر رحب ، حتى بالاختبارات النهائية تاخذ رأينا عن رغبتنا ، يعني كيف نبغى الاسئلة ؟ المقالي سؤال او 2 ؟ ايش نبغى الدرجات اكثر على المقالي ولا الموضوعي ؟
واجباتها دائماً تكون بشكل عام مو شرط تكون من ضمن المقرر لا تحط واجبات في اشياء تخص التخصص بشكل عام مثلا تعملين اسئلة موضوعية عن المقرر ! او تتكلمين عن مؤسسة التدريب والصعوبات التي واجهتك يعني تحب تاخذ رأينا عن القسم او التدريب يعني واجب منها ناخذ درجات ومنها نتعلم كيف نكتب تقارير عن امر معين ومنها كذلك تعرف ايش الاشياء اللي مو عاجبتنا حتى تصحح منها .

2-م.شيخة الشريف : يعجز لساني عن شكرها انسانة رائعة جداً جداً ، تعطي المقرر بكل امانة ، بكل إخلاص ، تعطيك مجال كبييير تجمعي درجات ، احضري دورات خارج الكلية في أي مجال ممكن يساعدك في التخصص وعليه درجات يعني احضري دورة او ندوة واعملي لها تقرير او عرض وهذا عليه 3 درجات لو تسوين مطوية وو عليه 5 وهكذا ، تعملين عرض عن المقرر هذا عليه 6 درجات ، تشاركين بالمحاضرة هذا عليه درجتين او 3 ، تسوين واجبين هذا عليه 10 درجات ، يعني بيئة خصبة لجمع الدرجات
مررره مرره تساعد الله يسعدها و يوفقها ، كلامها بالمحاضرة جداً مفيد ، تذكر لنا قصص ، و تجارب ، تعطينا نصائح حتى نستفيد منها في ممارسة المهنة تعلمنا كيف نمارس بشكل حقيقي مبادئ الخدمة مثل التقبل والسرية وووو ،غايتها هي صقلنا بشكل ممتاز في مجال التخصص تعلمت منها الكثير وما زلت اتعلم ، انسانه منصفة جداً جداُ و غايتها نستفيد من المادة بشكل جيد وتساعدنا على ذلك ، تتصف بالحزم مع الحنان وهذا المطلوب

3-د. إيمان شومان : هذه الدكتورة محاضرتها تقرأ من العرض وتشرح شويات ، كلامها عسل في عسل ، اسلوبها حلو ، بس مو دايم ممكن تضحكين معها ممكن تفشلك إذا هي معصبة وتقول اسكتي هههههههههههه
من ناحية اختباراتها ، ليست بذاك الصعوبة لكن التصحيح يكون حسب النموذج وهذا يخليك تنصدمي من درجتك شيء غير توقعك وممكن تزعلي بس بالنهاية هي صح وانت غلط ، ومع ذلك ممتازة تحدد بعد كل محاضرة ايش المهم وايش الخلاصة ما تحب الفلسفة بالكتاب المهم بناخذه وبس ، بالاختبارات عبي الورقة وتكلمي وتفلسفي وتمشي اموووورك . بوجه عام حلوه.

4-د. منى محروس : هذه اخلاق وطيبة انت بعينها بنتها ، رحوووووووووومه ، بس اسئلتها صعبة بعض الشيء ، يعني بصراحة احسها ممتازة في وضع الاسئلة ما شاء الله اسئلتها نموذجية يعني لا يمكن تشوفي عليها خطأ في الصياغة وكذا ، تعطيك درجاتك ، تتجاوب عن طريق الايميل ترسلي العصر ترد عليك بعد ساعة او اقل و تجيب عن كل تساؤلاتك

5-انضمت مؤخراً م.أميرة المطيري : كانت مشرفة تدريب ، ما اعرف عنها شيء بصراحة لكن يقولون طيبة واخلاق .

وفي دكاترة جدد إن شاء الله على العام المقبل بينضمون للقسم :58545:

عند تخصصك هذا القسم تدرسين بالمستوى الثالث ، يعني اول مستوى لك بالتخصص 6 مواد هي :

- علم اجتماع السكان :يشبه الجغرافيا ، السكان ، المواليد ، الوفيات ، آراء العلماء في هذا الموضوع ، نظريات العلماء بخصوص الهجرة ، ............ >> عطتنا إياها د.منى

- تاريخ الفكر الاجتماعي : الحضارات القديمة ، الصينية ، الفرعونية ، الهندية ، بعض العلماء مثل ابن خلدون ، اخوان الصفا ، ابن سينا ، اميل دوركايم ، سبنسر ، ........ ..>> تاريخ مع علم اجتماع لكن لذيذة .>> د.منى

- علم الاجتماع الطبي : تتكلم عن دور الطبيب مع المرضى من ناحية سسيولوجية *اجتماعية * ، تتكلم عن الادوار في المستشفى ، والنظريات في هذا المجال ، نظرية بحته اكثر من انها لذيذة ، طبعاً كل انسانه نظرتها تختلف عن الثانية ,>> د.إيمان
- علم اجتماع الاسرة والطفولة: عطتنا إياها د.إيمان تتكلم عن اشكال الاسر النووية ،،الممتدة ، عن الثقافات المختلفة وطريقتها في الزواج ، التبني ، اخوة الدم وغيرها .. ممتعه المادة

- خدمة الفرد والجماعة : مع دكتورة موزة ، المادة جميلة اقرب لعلم النفس ، ولكنها كانت طوووووويلة جداً
لان الخدمة الاجتماعية عبارة عن : خدمة فرد ، خدمة جماعة ، تنظيم مجتمع ، اخذنا كل هذا بالمادة صحيح ساعدتنا د.موزة لكن المادة اكبر من كذا طووويلة تحتاج حفظ وفهم والمام ، بس حلوة تأسسك صح .

- أسس الخدمة الاجتماعية : عطتنا إياها م.شيخة الشريف ، متداخله مع الخدمة بس على اخف ، تتكلم عن مبادئ الخدمة الاجتماعية ، دور الاخصائي مع العملاء ، ما يجب ومالا يجب وغيره ، جميلة جداً .

+ المواد العامة عقيدة واخلاق و اتصالات وانترنت

الحين مبروك صرتي المستوى الرابع

تاخذين بهذا المستوى 6 مواد + المواد العامة حاضر العالم الاسلامي و قواعد البيانات

- التنشئة الاجتماعية : مع د.موزة ، جميلة المادة جداً وسهلة اشياء نعرفها في حياتنا ، حاجات الطفل ، الاخطاء التي يقع فيها المربين ، دورك كمربية كيف يجب ان يكون ؟ دورك كأم كيف تنشئين اطفالك ؟

- سياسات الرعاية الاجتماعية : مع م.شيخة الشريف ،حلوة المادة بس طووويلة ، تتحدث عن السياسة الاجتماعية ودور الخدمة في تحقيقها ، تتكلم عن بعض الفئات مثل المسنين و الفقراء والمعاقين ، تتكلم عن التأمينات وووو ، تكسبك المادة ثقافة في مجال التخصص ومن ثم العمل ، ...

- إدارة المؤسسات الاجتماعية: مع د.منى ، المادة هذه نفس مبادئ الادارة بالتحضيري لكن بصبغة سسيولوجية ، كيف تكون ادارة المؤسسة الاجتماعية ، دور الاخصائي في الادارة ، المدير الناجح ، اشكال التنظيم الاداري وووو .. بصراحة المادة لك عليها لأن الكتاب كان جدا جدا سيء نص الكتابة ممسوحة لكن ان شاء الله العام المقبل يكون في كتاب جديد .

- العلاقات العامة : مع د.إيمان ، سهلة المادة جداً ، تتكلم عن الاتصال بين المؤسسات والجماهير الداخلية او الخارجية ، الانترنت و دورة في العلاقات العامة ، ودور الاخصائي في العلاقات ، تتكلم عن العلاقات في المؤسسات الحكومية ، الموظفين والعملاء ، الجماهير الخارجية وكم حاجة .

-الانحراف الاجتماعي والجريمة : مع د.إيمان تتكلم عن ماهية الاجرام ، الانحراف ، انماط المجرمين ، مجرم بالعاطفة ، مجرم بالصدفة وووو ، تتكلم عن مدى الالتقاء بين علم الاجرام وعلم الاجتماع ، تتكلم عن بعض الانماط الانحرافية مثل الاحداث ، التعاطي ، و أثر التربية السيئة في ذلك وووو .

-اخيراً التدريب الميداني : اللي عليك هو تسجلي المادة مع أي دكتورة موجودة في النظام يعني اللي تبينها وتختارين اليوم اللي يناسبك ، اول محاضرتين حتكون نظرية تعلمك الدكتورة ماهية التدريب ايش المطلوب منك ايش اللي عليك و اللي لك ، تتعرفين على مشرفة التدريب ، ثم يبدأ تقسيمكم على المؤسسات الاجتماعية وعلى المشرفات ، تتعرفين على مشرفتك ، احرصي تبنين علاقة جيدة معها ، كوني قدامها انسانه منضبطة مهتمه لا تغيبي في يوم التدريب سلمي سجل التدريب بالموعد ، اسألي عن اللي ما تعرفيه ، ادي الامور المطلوبة منك ، طبعاً التدريب يكون يوم بالاسبوع من 8 صباحاً وحتى 12 ظهراً ، تروحين مع قروبك ومشرفتك من الكلية بباص مجهز ، ممنوع تروحي مع ابوك او اخوك ، كذلك ممنوع يجي ياخذك من مقر تدريبك الكلية زي ما طلعتك من الكلية ترجعك ، عملك هو تشوفي كيف تشتغل الاخصائية الاجتماعية في المؤسسة ، تتقبلي مداخلاتها ، و نصائحها ، تعملي انشطة للفئة الي تخدمها المؤسسة ، مسابقات ، ندوات ، حفلات ، العاب ووو على حسب الفئة ، احرصي تبدأي تكوني نفسك صح بإمكانك تروحي ولا تتكلمي وتجلسي ساكته او تسولفي !!!!!! وبإمكانك تروحي وتشتغلي وتثبتي نفسك وتفيدي نفسك بعد التخرج !!
- بالحالة الاولى انتِ اضريتي بنفسك والقسم ما يحتاج خريجة من هذا النوع يعني انتِ بالمكان الخطأ للاسف .
- بالحالة الثانية انتِ صح وبكذا بتكوني صح في حياتك العلمية والمهنية

انطباعي عن القسم
احمد الله اولاً واخيراً لأني التحقت فيه ، واحمده لانه فتح ، هو مجال خير ، مجال لتنمية روح العطاء، يزرع فيك الحكمة والأناءة والحلم ، والعقل والرزانة >> طولتها صح ههههههههههه

هذا كل ما يجول بخاطري الصفحة هذه بتكون للاجابة عن أي تساؤل ، إذا في مخاوف ممكن تطرحونها حبيباتي انا بساعدكم ، اتمنى ما ينفتح أي موضوع غير هذا يتكلم عن قسمنا ، حتى يكون مرجع للكل

الموضوع مفتوح بمصراعيه لكم تفضلوا

[رنيم الصمت]

ما شاء الله كفيتي وفيته
الله يعطيك العافية وبموازين حسناتك

بأضيف شغلات بسيطه وهي المعدل اللي يقبلونه
اتوقع هالعام من 3 ونص >>اذا غلط صححوا لي
بالنسبة لدكتورات القسم الأربع بيكونون معانا حنا بالمستوى الخامس
والدفعه الجديدة اتوقع يستلمونهم الدكاترة الجدد مع اميرة المطيري

[W E J D A N]

< تضضضضمههآ

قسسسسم مَ آحد حآسس فيني كثركك ><"

ثآنككككس

حمستيني و الله يسهل يارب و إذآ آحتجنآ شي آنتم عندنآ

في ميزآن حسنآتكك

[روووح الورد]

وعليكم السلام ورحمة الله وبركاته
الله يعطيك العافيه حبيبتي
ويجزاك خير ع تعاونك

[مآوفيتكـ]

يآلببببى والله


انتي الانسانه اللي تحمسيني اكثر و اكثر ع القسم ___


الله يوفقك يآآآآرب حبيبي


و آن شالله نتخصص بـ هآلقسم


حفظت الموضوع بالفيفورت

[*غلا قلبي*]

يالبيه يالموضوع جا بوقته ....

حسيته ممتع من كلامك خصوصا التدريب

ماقصرتي كفيتي ووفيتي

[sorry]

علم اجتماع وععععععععع

[W E J D A N]

^ لييييييييييه ويعع قسم حلو للي ميولهم ذآ التخصص
و عندهم مهآرآت آلآتصصآل مع النآس ‘
و بعد بتضل وجهةة نظر شخصية

[Ms.Toot]

مع اني م احب التعقيد و احسه بيجي صعب لو ادخله

بس جد حمستيني له

مشكوره كفيتي و وفيتي بالمعلومات ذي ان شاء الله اللي محتاره فيه و عندها تساؤلات تكونين افدتيها

[الصمت حكمة]

شامل لكل سياسة قسمنا
يعطيك العافيه ماقصرتي