نصيحة لكل طالب مستجد أو قديم

[محمــــــــــد]

بسم الله الرحمن الرحيم

والصلاه والسلام على خير البشر نبي الله العربي محمد عليه أفضل الصلاة وأتم التسليم

أما بعد

اخواني واخواتي طلاب جامعة الملك فيصل

أسعد الله صباحكم او مسائكم بكل خير ومحبه ورضى

حبيت ان أطرح نصيحة شخصيه للجميع من واقع تجربه متواضعه مدتها ترم

وهو الترم الذى مضى

شهدنا الترم الماضي تخطبات كبيره وعشوائيه من الجامعه ولكن بتكاتفنا وتعاوننا وحرصنا على بعض

وقبل ذلك كله توفيق الله تمت الفائده لاغلب الطلاب

وانا هنا اشكر كل من ساهم بخبر أو نزل موضوع أو ملف أو حل واجب أو نبهنا بموعد

واشياء كثيره جدا لا يسعني ذكرها

انا عن نفسي اشكرهم فرد فرد واقول الله يوفقكم ولا يضيع اجركم ولا جهدكم

واقول ايضا مبروك والف مبروك لكل من نجح ... واقول للي ما توفق هالترم لا تيأس

والطريق لسى قدامك وحاول تصلح من وضعك وباذن الله تعدي ونهني بعض بالشهاده

...

اتمنى من كل طالب هذا الترم الأول له ان ينتبه لعده امور البعض أو الغالب مننا عانى منها

او لم يفهمها

وانصح كل طالب وطالبه مستجد او مستجدة

اولا .. بمتابعة اخبار الجامعه من موقع الجامعه بنفسه

ولا ياخذ اي خبر على محمل الجد الا لما يشوف الاعلان في موقع الجامعه

ثانيا : تنزيل ... المحاضره اول ما تنزل في البلاك بورد .... تنزيل تنزيل تنزيل

كررتها 3 مرات ولذلك بسبب المعاناه اللي عانيناها الترم الماضي في ايام الاختبارات

ان موقع الجامعه ما يشتغل .. والكثير ما نزل المحاضرات وتورط ... فانصحكم نزلوها اول

باول على اجهزتكم .. ولا تاخذ منكم الا 3 دقائق ... مهم جدا جدا ...

ثالثا : كل يوم وكل دقيقه تقريبا يجي واحد ينزل لكم موضوع عن ملخصات متنوعه

ومختلفه ... لذلك انا انصحكم اولا ... المحتوى اولا واخيرا من حيث الاهميه .. ثانيا يجي دور

الملخصات .. واشهر الملخصات في نظري الترم الاول هو للاخ ابو موزه .. والشمري جزاهم الله

خير ... وهذا يجي ثانيا بعد المحتوى .. مع ان ملخصاتهم تقريبا مثل المحتوى .. ولكن لكي يكون

الموضوع واضح انا انصح المحتوى بعدين الملخص .. وهذا لا يلغي وجود الكتاب

خصوصا المحاسبه .... والاقتصاد الجزئي ... والقانون ... اما الاداره والرياضيات اتوقع

المحتوى يكفي من واقع تجربتي

وايضا مهم جدااا .. اساله الكتاب لا تهملونهاا ....

رابعا : لا تراكمون المحاضرات .. ولا تستهينوا فيها أبدااا ... وحاولوا تفهمون كل ماده

وتحلون واجبات الكتاب عليها ...

خامسا : الواجبات التي تنزل لكم على البلاك بورد .... حاولوا لا تحلوها الا بعد ما تتاكدوا

من الاجابات وتعاونوا مع بعض في حلهااا .. وراح تكون سهله من شرح الدكتور او من المحتوى او من الكتاب وتحضروا المحاضرات المباشره لان عليها درجات ايضا

سادسا : حددوا لكم جدول يتناسب مع ظروفكم والتزامتكم ولا تضيع اي اجازه صغيره الا واستثمرتها في اي ماده

سابعا :تعاونوا فيما بينكم من خلال منتدى الحوار في البلاك بورد لان عليه درجات ايضا

تجمع مع الواجبات .

ثامنا : لا يمر عليك يوم الا تمر على هذا المنتدى ... لانه من الضروري تستفيد من اي معلومه

او شي جديد يطرأ .. لان من خبرتنا الماضيه كان تقريبا كل يوم خبر جديد ولخبطه شوي فمن

الضروري يكون عندك خبر وتتاكد منه ولا تستحي ان تسال ابدا عن اي شي انت لم تفهمه

تاسعا : حاول يكون معاك ع الاقل شخصين او ثلاثه معاك في التخصص يكونوا على اتصال معاك بالجوال او غيره

مفيده جداااا . للتواصل لو كنت مشغول تجيك اخبار تهمك ..

عاشرا : مهما كانت الاحباطات من اللي قبلك ومهما سمعت عن صعوبة الماده او ناس

تخوفك لا تهتم ... دامك درست ومتابع لا تخاااف .. تدخل الاختبار وكلك ثقه ومن تشوف الاسئله

والابتسامه على محياك وتحل ونت رافع راسك ...

تذكر /ي انك استطعت ان تكمل تعليمك وغيرك ما قدر .. ولو كان بفلوسك ..هذي فرصه

والفرص لا تتكرر ... وكلنا نطمح لتطوير ذاتنا وقدراتنا وظروفنا ..

ويا كم غيرنا آلاف ما قدروا يكملون بسبب ظروف ماديه او غيرها فاحمد ربك واغتنم الفرصه

وشد الهمه .. سنوات قليله وتعدي وتستلم شهادتك .. ولو حبيت تكمل ماجستير فهذا

أروع ...

وفي نظري .. مهما كانت سلبيات الجامعه .. لكن لها الشكر بعد الله لفتح المجال للآلاف

يكملوا تعليمهم

.......

كلمة اخيره : اتمنى تواصل الطلاب الجدد بالقدامى دائما .. وكل ترم يتواصل مع اللي قبله

واتمنى اللي اشترى كتب يعطيها لاخوه اللي جاي من وراه لتعم الفائده للجميع

لذلك مجرد اقتراح .. اي شاب يتواصل مع اخوه او اي شابه مع اختها من خلال

هذا المنتدى .. لاعطاء الكتب من خلفهم .. لتعم الفائده .. ونحجم من جشع التجار

اخواني يعلم الله اني اتمنى لكل واحد منكم النجاح .. والتوفيق من كل قلبي

شدو الهمه ........................... سنوات قليله ونبارك لبعض وتكون سنوات ماضيه

ذكراها طيب على الجميع

اسال الله لكم التوفيق .......... أخوكم ::::: محمـــــــــــــــــــــــد

(فاذا عزمت فتوكل على الله )

[ھډۄء ٲڼٽۍ☺]

ماشاء الله عليك يامحمد نصايح مهمه جداً جداً ربي يسسعدك ويوفقك ومأننحرم يأرب..

[امون السعودية]

منووور اخوي محمد ومشكور ع النصيحة انا معاك في كل كلمة وبذات تراكم المحاضرات ماانصح فيية ابدا ...

[@الشمالي@]

يعطيك العافيه وجزاك الله خير اخوي محمد على هالنصائح المهمه

[Mѕ. ЯẻĺάẊ]

.. يسعد صبآآآحك خيووو
الله يبآآرك فيك ويووفق آلجميع آن شآآء الله

يعطيك آلعآآآفيه ع هآلنصآآيح آللي من جد نحتآآجهآ هآلفترهـ وآن شآآء الله نطبقهآ
وآكيد آخوآنآ وخوآتنآ مآآيقصرووون وكلنآ يد وحدهـ

لآهنت خيوو
لرووحك آلخير ..

[ربي احسن مثواي]

نصائح تكتب بمداد من ذهب

[سمو الأنوثه]

يعطيك الف الف عافيه كلامك درر وبمحله
مشكور وما قصرت وفالك التوفيق يا رب

[معادبدري]

سلمت اناملك

على هذي النصائح المهم

بصراحة لم تترك شي للاخرين


كفيت ووفيت يا بعد حيي

[ياقوته]

اخوي نصائحك جدااااا مهمه واللي بياخذ بها بيعرف قيمتها في الاخيرررر

الله يعطيك الف عافيه كلامك يثلج الصدر يارب تتسهل علينا جميعا وربي يوفقك دنيا واخره

[محمــــــــــد]

الشكر لله

جزاكم الله كل خير