غرفه شاب >> قبل و بعد .. فهل من داعم لهم ؟؟؟

[عبير الصمت]

غرفة شاب سعودي قبل وبعد ،، فهل من داعم لهم ؟



السلام عليكم ورحمة الله وبركاته ،،


احببت ان اطلع لكم على نموذج من اعمال شبابنا السعوديين ،،

مشكلة جامعاتنا وكلياتنا ان مخرجاتها اكبر واكثر من مدخلات سوق العمل ،، مشكلة البعض من شبابنا السعوديين انهم بحاجه إلى دعم وتشجيع من المجتمع اولا وأخيرا ،، فما زال هناك سعوديين ينظرون الى بعض المهن بإحتقار وازدراء ،، ومع التوعية وتغيير النظرة ،، لبقيت اموالنا تدار بالداخل بدل ان يخرج بالمليارات إلى الخارج من قبل البنقال والهنود والآسيويين وغيرهم

تحيتي لهذا الشاب ولكل شاب يسير بخطى واثقه لكسر جمود هذا المجتمع وتحجر عقلية بعضهم ،، فالعمل ليس عيبا ،، وأجدادنا ممكن كان يرعى الغنم ،، وساقيا للقرية ،، وتاجرا للخردة وغيرهم من الاعمال المهنية الشريفة

نقلت لكم موضوع هذا الشاب بدون اي تعديل والمعذره على بعض الصور في عدم ظهورها ، فالسبب راجع لمركز التحميل

أسعد الله صباحكم ومسائكم ( كلن بوقته )
اول مره أتجرأ وافكر اسوي موضوع
حتى ان بعض الصور الي بتشوفونها كنت بنزلها من ضمن صور بموضوعي الجديد
يعني ماكنت ناوي اسويه موضوع وانزله عندكم لني حاس انه عادي أولأني ولد
بس جتني بعض الطلبات والشرهات إني أنزل الموضوع عندكم

الموضوع من بدايته ماكان ع البال اني أغير شي بالغرفه لأن مخططين بعد الصيف ان شاء الله
يكون في ترميم كامل للبيت من الداخل .. ومع العطاله الي مسببه لي وقت فراغ كبير جتني فكره
إني أغير وأعدل غرفتي بشي بسيط وغير مكلف وإذا غيرنا
وماجازت لي راح تتغير بشي احلى بعد الصيف .. لن كل شي سويته بالغرفه بيدي ومن افكاري

دورت لكم صور للغرفه قبل بالقوه لقيت هذي




نبدأ الحين بحوستي فيها



بدايه الموضوع طلعت كل شي وسحبت الدولاب والسرير بنص الغرفه والتي في معهم
ماقويت اخرجهم

جبت أغراض البويه سطل بويه أخضر فاتح وسطل بويه اسود وسطل بويه بيج خفيف
اخترت الالوان عشوائيه اللون الأخضر احبه والاسود حبيت ادخله بالغرفه لنه يعطي فخامه
وشطرطون ( لزق ) وباقي الشله << ماعرفت إسمها
ملاحظه : البويه يسمونها بوية بلاستك ميزتها مالها ريحه وتنشف خلال 3 ساعات
كل الي تشوفونه بالصوره ماخذها بـ ( 200 ريال )
اللون الاخضر ( 50 ريال ) اللون البيج ( 50 ريال ) اللون الاسود ( 60 ريال )
وباقي الاشياء ( 40 ريال )



محروستكم الست لمار وقفة معي وقفه ما انساها وساعدتني طول اليوم
الصورة دعايه بس ولا وقفتها معي بالسواليف وسعة الصدر




بدايتها جلست العب ويوم حسيت اني توهقت اشتغلت صح



التي في شغال دامنا نشتغل بالجدار البعيد .. طبعا كانت الفكره جدارين باللون الاخضر الفاتح
وجدارين اسوي فيهم خطوط طوليه بالألوان الثلاثه .. اخضر وبيج واسود
كل سطل تضيف عليه علبة مويه ( ابو نص ريال )



بكل جدار بصمه


خلصنا منه وانتهى الدلع والحين بدأ الجد



سويت نفسي مثل المعلمين وشلت الدريشه ونسيت اغطيها
والناموس دخل وبهذلني بعدين سكرنا عليه يحلفون اني ماخذت جرايد الاسبوع الي راح كله خخخ



بدينا بالجد
بدايتها كانت فله وسعه صدر بعد ماخلصت الجدارين الي باللون الاخضر
بديت بالجدارين الباقيه والي عليها الكلام والتعب
مع الوقت بدأت اللخبطه والبويه لماتخرب وتخش من تحت اللزق
خاصه اللون الاسود لنه ثقيل
وصرت اشتغل بالفرشه الصغيره لما يصر لي مشكله
واللزق مافكه الا لما ينشف العمود بعدين اضرب العمود الي جنبه



مدري عاد بتفهموا شلون كنت اشتغل الخطوط كانت عشوائيه وحاولت اني ما أكثر اللون الاسود وعطيه عمود كبير عشان لايكثر ويصير كئيب



نلعب



بدينا باللون القلق الاسود تعبني مره بصراحه .. راح تشوفونه بالاخير لما اكتمل الجدار



شوفوا كيف كئيب



خلصت الجدار الأول ويوم جيت للجدار الثاني وانا ماعاد فيني حيل
فكرت وجت ببالي فكره اسهل وأحلى وقلت مادام الجدار هذا فيه بيكون التي في + ان فيه جهة الباب
مايحتاج اسويه مثل الي مقابله وفكرته اسوي من اليمين 3 أعمده طالعه من تحت
ومن اليسار 3 أعمده نازله من فوق



كذا بس لسى ماكملت راح تشوفون وش سويت






وهذا الجدار الي فكرته جت بالوقت الضائع بس ماطلع خساره هنا بعد ما اكتمل


كذا تقريباً خلصنا وكل شي بالنسبه للبويه طبعاً في شي مدري إنتبهتوا له ولا لا
الدولاب والسرير كان فيهم لون اخضر غامق ضربته بويه سودا
والي عليه التي في بعد ضربته بويه ( كان رفوف للكتب ) ولونه بيج نفس لون الدولاب
طبعاً شريت فرشه للأرضيه( 250 ريال ) وإضاءات من ايكيا ( 130 ريال )
2 بالسقف ووحده قاعده بالارض ولوحات لزوم الاعمده الي سويتها ( 100 ريال )
والستاره الي للحين مو مقتنع فيها كلفني العازل ( 100 ريال )
والستاره الخيوط ( 60 ريال )







هذي نهاية شغلي بغرفتي والشغل أخذ من وقتي يوم واحد بس
حتى شوفوا اللوحه الي جنب المكيف طبعت إيدي بالبويه الخضرا والاسود على لوحة قماش
وحتى الجره ضربناها بويه لو مامسكوني اهلي ضربت نفسي بويه
وكل الي كلفني بتعديل الغرفه ( 850 ريال فقط ) + شغل إيدي
ما أخفي عليكم يمكن ماتميزت ببعض التفاصيل الي تكون لازم متوفره بغرفه النوم
بس إنتوا عارفين ألزم ماعلى الولد فراشه وراحته والغرفه صغيره !!
والي سويته مجرد تغيير جو وتضييع وقت وبنفس الوقت توفير فلوس
وحبيت يكون كل شي بيدي وبتفكيري << ذليتهم بذا الشي


اليس شبابنا احق بالدعم والتشجيع ،، فمواهبهم مدفونة ،، ووالله لو طلبت هذا العمل يقوم به من قبل شاب غير سعودي ،، لأخذ مني مبلغا اكبر من المتوقع



ماشاء الله تبارك الرحمن ...



مشـــــــــــــــــــاهده ممتعه ...

[ابو عزام]

سهله البويه

والدعم الحقيقي من المدرسه

لمثل هالمواهب


شكرا اختي
لموضوعك

[فراشة حائرة]

روووعة
وسبق وشفتها بااحد المنتديااات

فعلا شبابنا محتاااجين الدعم والتشجيع
اعررف وحدة ترسم وكلمة روعه قليلة فيها اعتبرهااا فناااانة بجد
شفت لها كذا عمل ابهرتني بصرااحة قلت لها ليش ماتعرضين اعمالك قالت مااحد شجعها واهلها مو مويدين الفكرة
طيب ليش بصرااحححة قهر موهبتها مدفوونة

[فواز بن ناصر]

حلووووووه
وجهد رائع وجبار

[أشواااااق]

تجنن .. ماشاء الله تبآرك آلله

ذوق

يسلمو ي عبير

[الفراق الصعب]

ماشاء الله لو انا لعبت في الدنيا شغلك نظيف ومرتب راح اسوي مثلك و احاول بس الوالده ماراح ترضى ههههههههههه

[وفووووووووووي]

جدا جميل الموضوووووع صح هناك شباب بقمت الروعه وفيهم قدره وطاقه جميله جدا والله شبابنا شباب خير وفيهم البركه بس يحتاجون فرص لجل يثبتون لنا وللكل المواهب الي عندهم والله اني اكثر من مره لاحظة على شباب الموهبه الي ربي خلقها فيهم فيهم الرسام فيهم المحترف في الميكانيك فيهم اشياء حلوه


ربي يحفظهم ي رب لأهلهم ويسهل دروووبهم بالخير


واكرر موضوع جدا جميل

[Mr.Brwon]

روعـــــه رووووعه رررررروعه

ررررروووووووعـــــــــــــــــــــــه

صراحة هالمصمم قصدي هالعاطل او الفاضي ليته دايم ييفضا ويبتكر شي ,,, وانا اقول ليه السعوديه ما ودهم يحلون مشكلة البطالة .... غير انه شغل بيده تصميم خرافي .. الوان .. تنسيق .. ديكور .. اهنيه بصراحه

بس والله اعرف واحد نفس موهبته ... بس خويانا مهب فضاوه بس يحب يخربط ويرسم .. بدا يرسم على جدار غرفته صار كأنه جدار مدرسة .... مواهب مدفونه ومصلى عليها صلاة الغائب ... تحياتي لكم ولخويي صاحب الغرفة

طويل الرد صح

[al-mha]

والله انه عجيب
انا صارلي 5 سنين اقول لامي ابي اضبغ الصاله خخخخخ بصبغها بايدي لانها حيل كبيره فا متعه
المشكله مهم واثقييين

[ابشر بعزك]

الفكرة حطيتها براسي
شكلي انا بسوي عرفتي بلا عمال بلا خرابيط
بلا تعتيق بلا مصاريف قدامي زواج وتكاليف

الله يعطيك العافيه