والله مدري وش اكتب - تفضلوا يابنات -لاهنتوا-..!

[صبح]

السلام عليكم ورحمة الله وبركاته


بصراحه ودي اسأل..هل فعلا قسم الانقلش بكلية الجبيل بيتقفل؟؟
لأني انا مو من اهل الجبيل ودرست بكلية الدمام
بس صار ظروف وماتيسرت
والحين ابغى ارجع بس بكليه ثانيه غير الدمام وابغى ادخل انقلش
لكن لمحت بردودكم ان القسم بيتقفل
جاني احباااط جدا من هالشي=(
مره مستغربه ليش يقفلون قسم
بالعكس الناس محتاجه تخصصات وذولي يقفلون؟؟


فلا هنتوا يا بنات "افتوني"



الله يوفقكم وييسر لكم اموركم جميع

[صبح]

غريبه!
معقوله ولاوحده تعرف اذا هالشي اكيد او لا ؟؟
بس ابغى احد يأكد لي هالشي صح
والا حاله حال اي كلام نسمعه ومايصير :(


انتظركم بنات

[تفافيح]

اهلين انا كنت ادرس بالرياض ونقلت للجبيل وودي ادرس هنا فرحت قبل فتره وسويت طلب تحويل وبالصيف انشاء الله تطلع النتيجه <<خخخخ قصه حياتها
معليش ادري طولت بس عشان اوصل لنقطه انه مسؤوله التحويل ما جابت اي طاري ان القسم بيقفل بالعكس هي تقول فيه كثير بنات طلبوا تحويل للقسم سواء من جوا الكليه او من برى وعااادي
اتمنى اكون افدتك وننقبل انا وانتي ااامين

[قمر 14]

هلا حبيبتي ..

لا
لا
لا


القسم ماراح يتقفل ..

وهالكلام من رئيسة شؤون الطالبات د.اسماء بنفسها ..


ادخليه ..
وكلك أمل بالنجاح ..


الله معكم

[صبح]

الحمدلله

يعني خلاص اتوكل على الله واكمل مسيرتي بدون قلق

---

مشكورات بنات ماقصرتوا
الله يوفقكم ويطمن قلوبكم ويبشركم باللي يسركم جميع
تفافيح الله ييسر امورك
قمر14 الله يبشرك بالجنه يا رب

[فو@فو@]

هاي بنات صراحه ماابي احطمكم

بس ترا الانجليش مايمدحونه

والدفعه مثلا 100 بنت محد ينجح الا 30 او 20 مثلااااا

مع احترامي لبنات الانجليزي مو قصور بالبنات لا والله هم شادين حيلهم
بس دكاترتهم مو اوكي
وخاصه الباكستانيات ود هاله

[مجرد أنثى]

السلام عليكم

كيفكم بنات انا ادرس بالكليه:150:

وتخصص الانجليش موجود وازلي ان شالله
لأنهم كل سنه يصعبون المستويات ...

انا طلعت روحي معاهم تخيلو جايبين دكتورات باكستانيات وهنود يدرسونا انجليش !!!!!!
لا حنا نفهم عليهم ولا هم يفهمون علينا يعني لو الوحده عندنا بالكلاس تسبها عيني عينك ماتفهم عليها ابد.. :praying:
بس ماشي حالك؟؟
انا مابي احبط احد لأنو كل واحده وقدراتهاا بس اوضح لكم حال الكليه بهالقسم بشكل العام

ودمتم بكل الود

[اوريو]

[align=center]
يارربية تراااااني اخترت تخصصي انقلش
لكن انا سمعت ان في خطة جديدة هالسنة
وراح تكون الخطة اسهل من حقين اللعام
[/align]

[بوح مجروحة]

انا كمان قسم انجليزي في جامعة تبوك

وطالبة تحويل للجبيل

الله ييسر

[صبح]

^^

مشكورات عزيزاتي
اللي مثلي توها بأول الطريق تتوكل على الله وتشد حيلها هالايام وتدعي
باقي فيه فرصه لاختيار التخصص

واللي استخارت واختارت وسجلت تتوكل على الله وتعرف انه خير لها


باعترف بشي للجميع

كل هالامور اللي قلتوها ... تعرضت لها بكلية الدمام
واي وحده بقسم الانقلش بالدمام بتقرا هالامور وماراح تستغرب ويمكن تضيف لكم بعد
حتى باكستانيات درسوني قبل
والله انهم على شدتهم اهون بكثير من غيرهم
ومااكتشفت هالشي الا لما جا الترم الثاني وشفت الفرق
يعني .. نفس الشكاوي .. نفس الهموم

اوريو
الله يبشرك بالخير
و يا رب هالكلام يصير -عمل- وليس مجرد -قول-
صراحه انا ماودي اغير التخصص لأني ماافكر بشي غيره =(
وان شا الله ربي بييسر لي واتخطى العقبات اللي كنت اصادفها قبل


سؤالي/

كم ماده تدرسونها..!
كم ماده مو كم محاضره .. يعني لاتحسبون العملي زي زميلاتي
وش هي المواد بكل السنوات..
لاتحرمونا كلنا من هالمعلومات .. ربي يعافيكم
وشكرا لكم جميعا

/

الله يوفق الجميع