[ غير ذلك ] : بدأ التسجيل للدبلوم العام في التربية بالجامعة العربية المفتوحة

[مملكة الإحساس]

السلام عليكم ورحمه الله وبركاته

تعلن الجامعة العربية المفتوحة عن بدء القبول للفصل الدراسي الأول للعام 1433 هـ - 1434 هـ

موعد التسجيل :
9 رمضان 1433 هـ - 28 يوليو 2012 م

فروع الجامعة :
1- #الرياض
2- #جدة
3- #الدمام
4- #الاحساء
5- #المدينة
6- #حائل

البرامج المتاحة :
1- بكالوريوس اللغة الانجليزية و آدابها
2- بكالوريوس تقنية المعلومات و الحاسب الآلي
3- بكالوريوس إدارة اعمال ( انظمة إدارية )
4- الدبلوم العام في التربية
5- بكالوريوس التربية الخاصة

موقع الجامعة على الانترنت :
http://www.arabou.edu.sa/

للاستفسار الاتصال على الرقم الموحد من الساعة 10 صباحاً الى 3 عصراً
920000268+

[كيك]

كيف التسجيل ماعرفت

[كيك]

شكله مش مفتوح لما اشوف النموذج يطلعلي التقويم

[غصون الازهار]

[ريـ الفلا ـم]

كيف طريقة التسسجيل ؟!

[مملكة الإحساس]

أنا بعد أبي اسجل وماأدري شلون الطريقة..

ماتطلع لي استمارة التسجيل يطلع لي التقويم..

اللي عنده أي معلومة يخبرنا..

[كبرياء جرح]

طيب كيف التسجيل ربي يعافيكم ؟
ماهو واضح ابد

[ريـ الفلا ـم]

لقيت تجربة شخص مع دبلوم التربية

بنقلهـآ لكم لآن مـآ اقدر اجيب الرابط اخـآف يقولون اسوي دعـآية ولا شي ويكرششوني

---------


خططوات التسجيل كانت
عن طريق تعبئة الابلكيشن في الموقع.. وتاكد من حروف الاسم الانجليزية انها مطابقة لجواز السفر
طبعا طلباتهم معروفة للجميع ( صورتين - شهادة الجامعة - اثباتك - وتسدد مبلغ التسجيل في حساب سامبا).. وتاخذ الايصال واوراقك وعلى الجامعة ..
طبعا لا تاجل وتقول بكره لانه احتمال فاي وقت يقولون اكتفينا بالعدد

بعدها عاد ينزلك المشرف الجدول .. ويقولك سدد المبلغ الفلاني وتعال افعل لك .. وتستلم الكتب..


الدبلوم التربوي :
ينقسم على ترمين ..
6 مواد في كل ترم ..
والدوام يومين كل اسبوعين يعني ( 4 ايام فالشهر )
الاربعاء مادتين 4-6 6-8
والخميس 4 مواد 11-1 1-3 4-6 6-8 ( حسب فرع جدة )

كل مادة تتكون من
واجب 20 درجة
اختبار دوري وحيد 30 درجة
احتبار نهائي 50 درجة..

درجة النجاح 50درجة .. بشرط ان لاتقل اعمال السنة عن 20 ولا النهائي ايضا عن 20


نبدء بالواجبات ..
عادة ماتعتمد على البحث في الانترنت والكتب والمراجع و يهتمون كثير بالمراجع ... ونصيحتي
لو جبت من مرجعين لا مانع انك تروح اخر المرجع وتنقل كم اسم من المراجع الموجوده فيه
وحط معها كم موقع الكتروني لان الدكاتره بسم الله عليهم مسوووين فيها ان المراجع مهمه..

واكثر شيء عقدني فالواجبات يوم احط له 4 مراجع ويقول المراجع قلــــيله ( بسم الله عليك ياعالم الذرة كم مرجع تبي ياوجه الـهذا !! )
وتجربتي الشخصية اعتمدت على نفسي في حل جميع الواجبات الا واجب واحد .. كنت يوم من الايام في خلوه مع شيطاني واطيح في شخص ما في شات ودفيت عليه واجب مقابل 75 ريال ) و جاني الواجب واعدله بنفسي وازبطه وانتكه وارسله
طبعا الواجب المنسوخ يقولون انه ام المصائب .. فالواحد لا ينسخ بالنص .. يحاول بدال مايقول
( هذا والله اعلم ) يكتب ( والله أعلم وأحكم )


أما الاختبارات الدورية ..
الترم الأول بالنسبة لنا كانت ورقية .. ومشي حالنا في دكاتره حددوا ودكاتره ماقصروا وفي نوعيه لا والله ماعطونا وجه
والترم الثاني .. كان اختبار من الكويت حسب كلام الدكاترة (اونلاين) يعني كمبيوتر صح وخطا واختر ووصل والدرجه بمجرد ماتخلص الاختبار تطلع لك..
طبعا اكتشفت الجامعة - المفتوحة- ان الاسئله موجوده فالمنتدى فبعض الاحيان تجينا الجمل معكوسة .. او منفية بـ ( لا ) أو ( لم ) اهم شيء يعكسون معناها او يغيرون ارقام لذا جرى التنويه




الاختبار النهائي..
غالب المواد تكون 20 درجة موضوعي ( صح وخطا واختيارات ) والباقي مقالي..
النصيحة اللي ممكن اقولها للجميع.. عليك بحسن الاسلوب وتكبير الخط وجمالــه..
اكتب كل ماتعرف ومالا تعرف .. واي شيء تحس ان فيه ريحة السؤال ..
اذا مطلوب تعداد 5 حط لهم 8 وهم يدورون الصح بس..( هذا كلام الدكاتره عندنا)
وترى السالفة اختبار مو (خطبه ) يوم انكم تستحون تكتبون ..
وخلوا مبدئكم نفس مبدئي .. اذا سووا نذاله فينا وصعبوا الاسئله .. انا انذل منهم واكتب كلام كثييير اتعبهم يقرووون
دائما اتخيلني الدكتور اكيد لو قريت صفحه باتعب فنصها واصرف للطالب ع الاقل 3 من 5 وهكذا..
هذي فلسفتي الخاصه .. ولله الحمد والمنه نتايجها حلوه في معظم المواد ..



نبدء في تفصيل المواد..





مواد الدبلوم الترم الأول:

مادتين عامه ..

- الحاسب الآلي: ويمكنك معادلاتها بشهادة قيادة الحاسب الدولية اذا عندك هالشهادة ..
او تدرسها وموضعاتها سهله من مبادء ونشاءة الحاسب والكلام النظري حتى الوورد والاكسل ..
واعتقد انها ماده للي يتعاملون مع الحاسب يجب ان لايقلوا عن الممتاز او الجيد جدا مرتفع..
واصنفها :سهله..



- مهارات التعلم الذاتي ..
تتكلم عن القراء السريعة و بعض مهاراة التعلم بصراحه هالماده خصوصا انا حبيتها احسها ممتعه
على الاقل اقراء شيء واستوعبه .. بدون خرابيط علماء واسمائهم وديارهم ..
واصنفها سهله..


- علم نفس التعلم والتعليم..
علم نفس يعني علماء ومدارس وسكيولوجيه و كلمات من اللي خابرينها .. بها كلام كثيير بصراحة
واقدر اقول انها من الوزن الثقيل شوي..


- مدخل للتربية..
تتكلم عن التربية و تاريخها و تعاريف وعلاقتها بالثقافة والتعليم و اقدر اقول انها متوسطة الصعوبة..

- تقنيات تعليم:
ماده حلوووه .. يعني من منا مايعرف المسجل والداتاشو و باقي التقنيات التعليمية .. سهله هالماده لو فهمتها مو حفظتها.. وخلك انت المولف وتوصف الادوات مو تردد كلام المولف..

- مناهج وطرق تدريس عامه..
هذي مادى دسممممممممممممه بصراحه .. تتكلم عن التحضير و طرق القاء الدروس و اعداد الاسئله وانواعها .....الخ




وكذا نكون انهينا الترم الأول ..

الترم الثاني:



5 مواد مشتركه بين كل الطلاب والطالبات
وماده لكل تخصص على حده وهي ( مناهج وطرق تدريس خاصه )

1. ادارة تعليمية ..
هالماده يمكن افادني فيها اني درست كورس ادارة قبل .. الماده تتكلم عن الادارة وانواعها والفرق بين الادارة ( التربوية و التعليمية و المدرسية ) و بعض طرق الادارة .. ماده اقل من متوسطه الصعوبة ..

2. القياس والتقويم ..
سبحان الله هالماده حبيتها على اني ماهضمت محاضرتها .. بس حلوووه ( منوال و وسط وسيط ..الخ) بس اكره فيها ( انححراف معياري ) مفيده فسالفة انك تعرف مستوى صعوبة السوال و والاختبار وهكذاحبيت واجبها لان فيه تطبيق على برنامج spss وانا هالتطبيق احبه.. لكن يمكن البعض مجرد مايشوف معادلات وارقام تجيه عقدة رياضيات ومصعبين الشغله وهي ماتستاهل........!
الماده فالبداية اخذتها تحدي لكن بعدين حسيت انها اصغر مما توقعت وابسط ..
صدقوني بتجيكم وحدات تقرونها ماتدرون وش السالفة .. بس هالواحدات يبدوا لي انها تكملة عدد..
لاني مااتذكر فالاختبار النهائي اهتموا فيها .. وكان اهم شيء الاساسيات والاشياء الواضحة..
اللحين اللي يشوف كلامي عنها يقول اخذ ممتاز .. لكني باصدمكم واقول لا والله مو ممتاز .. بس على الاقل
انقل لكم انطباعي عن الماده ولو ان كثير طلع من الاختبار متذمر بسبب انه فيه سوالين يبيلها تطبيق
وكانت حساب معدل مدري معامل الصعوبة .. وشي ثاني نسيته والله..
عموما الماده نقدر نقول عليها متوسطة ...



3-علم نفس المراهقة :
هالماده الله يحفظ دكتورها .. بصراحه هو الانسان اللي تحسه (عالم) مو بعض الطقة اللي يجون حافظين ويهذرووون علينا باللي حفاظينه من الكتب.. انسان له رأيه الخاص حتى لو خالف عالم من علماء النفس.. ويقنعك ..
الماده كلام كثييير وتعدااااااااااااد .. مراهق وخصائصة والاسرة والمجتمع واقرانه والسلوك والعمر وتاثيره
طبعا يبليلها تركيز بصراحة ..

4-بحث في تحسين الاداء؛
الماده مدري وش علاقتها بتحسين اداء المرحلة الثانوية .. تتكلم عن لو كنت بتسوي بحث اش اجزائة و شروطه..
و تقسيمات البحث .. والمراجع و وش المصادر وكذا ..
الماده سهله يمكن الوحدات الاخيره فيها كلام احسه صعب بس مو مهم مررره..
في شي مهم لازم تنتبهون له اللي هو الفرق بين ( فرضيات البحث و افتراضاته ) هالشيء تكرر عنها السؤال كثيير.. وهي تخم بصراحه لتقارب الاسماء
الماده اعتقد انها سهله .. لكن الله يسامح اللي صحح النهائي ..
اول مره اشوف دكتور ينصدم ان طالب من طلابه جاب درجه عاليه




5- التدريب العملي :
هالماده 4 ساعات .. مشكلتها الوحيده انهم طبقوا فيها الكيرف .. عشان كذا يمكن عزيزي الطالب تلقى نفسك جايب درجه فوق التسعين ومعدل جيدجدا .. حتى بدون بلس
او 95 ومعدلك بي بلس ..
هالماده اللي اكثر الطلاب خايفين منها هي اسهل ماده من وجهة نظري وافضلهم و احلاهم كمان


باختصار انت عزيزي الطالب بالخيار ..

ياما تكون عندك خبره ميدانيه فالتعليم من مدرسه او معهد او ايا كان لو من امك الحبيبة او حرمتك بانها تشهد انك درست الورعان رياضيات لمده ساعه ويومين و4 اجزاء من الثانية وفي هالحاله مايلزمك التطبيق بمدرسه .. واصلا الجامعه ودهم بهالشيء عشان المشرف ماياخذ مكافئة زيارة
او انك ماعندك خبره ابد .. وهنا راح تداوم فمدرسه لمدة بسيطة وتقيم بـ 50 درجه من مشرفك ومدير المدرسه و المعلم المتعاون -حسب ظني- وماني متاكد لاني ماجربت..
وباقي الخمسين درجه طلبات وواجبات..


او انك تكون ذا خبره وهنا يطلبون منك تعريف او شهادة خبره .. و ملف اعمال يتضمن طلبات تتنافس في كثرتها مع طلبات الحرمه اذا شكت ان رجالها بياخذ عليها ..

الطلبات تجمع في ملف .. وتسلم في نهاية الترم..
نصيحتي للجميع .. في هذه الماده انك تبدء تجهز ملفها اول ماتعرف الطلبات .. ولاتاجلها للاخير
لانك بتضطر وقتها تسوي الملف بسرعه او تضحي باختباراتك الدورية .. كما حصل مع اخوكم فالله..
جهز الملف وقدمه للدكتور .. وافتك ..
طبعا يساند الملف .. 10درجات القاء درس امام المحاضر في نفس القاعه ..


6- طرق تدريس لغة انجليزية:
هالماده والله انها حلوووووه لكن بصراححه اخذتها استراحة محارب ..
ماكنت مهتم فيها كثييير .. بصراحه مفيييده لمعلمي هالماده ..
كتابها لن افرط فيه .. احس فيه اشياء لازم اقراها ..
في الفاينل اعتمدنا ع نماذج الاسئلة السابقة .. وكانت تقريبا مكرره .. الا سوال اظن او اثنين..

^

^

مـآ قصصر الرجـآل شرح كل ششي .. وحبيت هـآالدبلوم من كلآمـه

[مملكة الإحساس]

لقيت قبل هالتجربة لكن بداية خطوات التسجيل من الموقع واحنا ماتفتح معنا استمارة التسجيل يعني مانقدر نروح لهم قبل مانملئ الاستمارة..

شالحل معاهم؟؟

[مملكة الإحساس]

بنات هذا كلام من منتدى الجامعة العربية المفتوحة يخص خطوات التسجيل..

تسجلي من النت من تعبئة النموذج بس وتدفعي رسوم التسجيل في بنك سامبا الامريكي اظن ميتين وخمسين وتاخذي الوصل ووالنموذج وتروحين لهم وهناك تكملي بقية الاوراق والمواد وتروحي تدفعي المبلغ الكبير للبنك وترجعي لهم..