المشاركة الأصلية كتبت بواسطة ( ابو خالد )

السلام عليكم

مثل ما هو واضح في العنوان
الحقوا على ايقونة الإستعلام عن نتائج الإختبارات



بس موب الحين ,, اذا فتحت



المهم ابي افضفض قبل تصحى هنادي وتبلشني

احس طول الفترة اللي راحت اني كنت بعزلة من الناس
من التلفزيون .. من المباريات ... من سعة الصدر ... من الروحات والجيات
اذا طلعت تأبطت الملخص وخذته معي كأنه شنطة حرمه
ماخذه كذا لا افتحه ولا اقرأ منه ولا استفيد منه ,,, مجرد ارضاء لضميري

الحين ما اعرف اعبر عن شعوري هاللحظة من الونااااسة
أقرب مالي .. أقرب مالي .. شعور وحدتن توها طالعتن من النفاس


شئ ماشفتوه :

اليوم في اختبار الإحصاء هدوووءءءءءء ... مانسمع الا
تك تك تك تك تك تك تك تك تك تك تك تك تك تك تك تك تك تك تك تك تك تك
تك تك تك تك تك تك تك تك تك تك تك تك تك تك تك تك تك تك تك تك تك تك

اصوات الآله الحاسبة على الطاولات مع الشباب .. كأننا دجاج ياكل حب في عشة

فيه واحد جاء متأخر
ماشفته طلع آله حاسبة من جيبه ولا معه شئ
45 دقيقه الا وهو طالع حنا في إختبار أحصاء والا توحيد !! وانا توني في سؤال 23
ودي اعرف وش امداه يكتب ويفكر ويلون بورقة الإجابة
التعهد لحاله يبي له 45 دقيقة


واحد ثاني .. نكتة
بعد ما عبى ورقة الإجابة وخلص وبدأ الإختبار سلموا له ورقة الأسئلة وقعد يقلب فيها يمين يسار
قال للمراقب : انا ماعندي إحصاء ... وطلع من القاعة ونسى جواله على الطاولة


اذا ذكرت شئ رجعت لكم
واللي يبي يضيف يضيف ترى الموضوع سبيل
الا للنفسيات ,, واصحاب نوكيا الدمعة

ان فقدتوا موضوعي تراه في المحذوفات
وان فقدتوني انا بكبري تراني باليوكن الأسود
الزيارة من 4 الى 6 المغرب وجيبوا لي قهوه بترامس اصليه علشان ماتبرد