اذا بتدعي على احد قوله

جعلك ترمم

تدري ان البناء الجديد اهون من الترميم

لأن البناء فقط بناء

ولكن الترميم ... هدم ... ثم بناء
الهدم بتعب وخساير
البناء بتعب وخساير

وانا بادعي عليك

جعلك ما ترمم ولا من يعز عليك من غير شر

وعلى طاري الترميم
صار لي قصتين مع الترميم
قصة أضحكتني كثيرا والثانية آلمتني كثيرا


القصة اللي آلمتني
بعد ما انتهينا من تركيب جبس السقف بدينا في البوية
اللي حصل اني كنت ماسك الدريل واسوي فتحات اللمبات والسبوت لايت في الجبس وشغال في تمديد اسلاك الكهرباء داخل الجبس
المهم وصلوا الدهانين وانا في هذي الحالة ويوم شافني الهندي انصدم ويناظر وهو مو مستوعب , وقف شوي وقال ما شاء الله تبارك الله
فقلت له ايس فيه اول مرة تشوف سعودي يشتغل كهربا ؟ قال ايوه اول مرة
فكان رده قوي بالنسبة لي
ولكن الكلام اللي قاله بعد كذا كان مثل الصاعقة علي
قال المفروض ان كل واحد منكم (يقصد السعوديين) يتعلم شغلة وتتعاونون بينكم وطلعوا الاجانب برا البلد

والله وقفت مذهول ومصدوم من كلمته
تخيلوا اجنبي يقول كذا ؟

ما لقيت كلمة ارد عليه بها الا اني قلت (صدقت .. لكن الله كريم)
هذا الموقف المؤلم


اما الموقف المضحك
ايام الترميم كانت زوجتي وعيالي عند اهلها وبعد انقطاع اسبوع اشتقت لعيالي ووحشوني فقلت باستأجر شقة مفروشة لمدة يوم واخذ عيالي واجلس معهم والعب معهم
المهم نسقت مع ام العيال وكان ليلة جمعة لأن الجمعة ما يجون العمال وكانوا اهلها معزومين
فطلبت مني اجيب عشا لأن ما فيه عشا
المهم تأخرت شوي في البيت ثم طلعت مستعجل ورحت لمحل بيتزا وطلبت وجلست انتظر على كرسي في وجه باب المحل
وانا جالس مروا اثنين من قدام باب المحل وناظروا فيني .. لاحظت فيهم ابتسامات يحاولون يخفونها
وشوي مر واحد ونفس الابتسامة وانا ما ادري ليه الابتسامات هذي
المهم سألت راعي المحل عندك سفن اب قال لا.. شوف البقالة اللي جنبنا
طلعت من محل البيتزا وبمجرد اني وضعت رجلي على الرصيف خارج المحل سمعت صوت غير معهود بالنسبة لي
ناظرت تحت واكتشفت "الله يكرمكم ويعزكم" اني لابس نعال مختلفة
فردة نعال والثانية شبشب

احراااااااج

ومن حسن حظي ان جنب البقالة محل احذية فقلت ما يبيلها وادخل عنده
صديق بكم هذي ؟ ما اذكر بكم قال
قلت هات ولبست الجديدة وحطيت القديمة في الكرتون

لي اكثر من 20 سنة ما لبست زبيرية الا ذاك اليوم
ومسكتني حالة ضحك الى اليوم الثاني


الله يسعدكم جميعا ويرزقكم بيوت ما يحتاج لها ترميم

دعوة من قلب