ملتقى طلاب وطالبات جامعة الملك فيصل,جامعة الدمام - عرض مشاركة واحدة

مدمن دلاخة ~ · #1 2014- 1- 14

السلام عليكم ورحمة الله وبركااته ..!

تمهيد + مدخل

لـ النقااااش >>>> ( القلب دكان وكلن له مكان

)

<< .. تردد أمي هالجملة علشان تقنعني ان كلن وغلاه أول ما أقول لها : انتِ تفضلين العيال علينا ..

ومن القهر أرد عليها ب قول : والله الظاهر حنا علك مستكى .. أبو نص وهم خياش الرز بحكم إنها أغلى شي في البقالة ..

ما أدري كل الناس يمرون بنفس الحالة ولا لا .. ؟؟

و أشدد هنا على اني ما أتكلم عن الحقوق .. أتكلم عن الغلا .. <= مهب بعيدة ينط لي واحد يقول غلاء الاسعار .. صرنا حضارم .. نهتم بالهللة ..

المهم .. هل تعانون معشر البنات من هذه الحركات ..

هل تعانون من ( يا وليدي تبي عشاء ؟ )

(ازين لك شي ؟ )

واذا قلت لأمي وراتس ما تسأليني مثلهم ..؟؟ تقول هين انتِي ما عليتس خوف .. تدبرين نفستس .. حتى اذا لمحت امي واحد منهم نازل .. وهو لاهي يزرر ثوبه استعداد للهجوله تلحّقه - وهي ترمقه بعيون تطفح بالحب

- بما لا يعد ولا يحصى من الدعوات مثل دعوتها المفضلة//

جعل جليسك من يخافه ويرجيه

خلونا من بيتنا .. ليش الوحده لين صار عندها درزن بنات يُنظر لها بعين الشفقة .. و ما يُقال لها إلا أعووووذ بالله .. الله يعينتس .. بينما لين صار عندها درزن عيال يُنظر لها نظرة اعجاب .. وما يُقال لها .. ( إلا ) مااااااشاااااء الله .. الله يخليهم لتس ..

و أكيد قد سمعنا عن حريم يحقرونهم الناس ب ( أم البنات .. - يعني ما تجيب الا البنات

بس ما قد سمعنا وحده يحقرونها ويتهزون بها لأنها ( ما تجيب الا ورااعين )

يقولون ( الولد فرحته عند طرحته ) ..
عادة يستبشر الناس لين صار المولود ذكر .. و يكبر الولد ويبدأ غثاه يكبر معه .. و أول ما يخط شنبه تبدأ حركات المراهقة و دبلة التسبد ..
ذيك الساعة يعض الوالدين اصابع الندم على ذيك البزّه ( الفرحة ) وخل ولدهم ينفعهم ..
بينما لين صارت اللي مشرفه بنت .. أكيد يفرحون بس غير عن فرحة الولد .. نقدر نقول انهم يفرحون من قلب اذا جت البنت بعد كم ولد .. يعني اذا صار عندهم تشبع من الصبيّان .. بس اقدر اقول ان غالبا غثا البنت ما يقارن بغثا الولد .. غالبا هي أحن وأنفع .. بس المشكلة انها مسؤولية ..

:

قفله
ولدنا وبنتنا ما نقدر نستغني عنهم .. بس السؤال اللي يطرح نفسه الحين : ليش التفرقة بين الولد والبنت من ناحية البزّه عند استقبال المولود في ( مسشفى الشميسي خخ ) وفي الغلا وأحيانا في المعاملة ؟

تهقون فيه أسباب ثانية غير ..

( علشان يشيل اسمي ...؟ ولا علشان يورث حلالي وما يقطون كل العائلة في الورث ..؟ و لاعلشان يفتح الباب للبقالة ..؟ )

وعلشان الناس ينتفضون على الولد ...!

خاصة الابو .. ما يرجهن ( يرتاح ) الا لين جاء الولد ؟

المهم ابي رااي الجميع بما ان هالموضوع اول موضوع اشقلبه بين جنبات القسم العام