أنا اللي شغلني وصف ريم ٍ عليّ أبـداه
=وصـوف النـوادر للصقاقيـر جذّابـة
كشف لي الغطا ياليت وجهه عليّ أخفاه
=ذبحني الجمـال اللـي مباديـه نهّابـة
على سيف لحيه شامة ٍ قرب حلو شفاه
=زهاها بياض الخد مـن قبـل تزهابـه
وحجّانها كنهـا هـلال ٍ علـى مبـداه
=مقاويس فوق عيونهـا كنهـا عصابـه
وعليها عيون ٍ من نظرها يموت بـداه
=عيون الوحش لاصار في رأس مرقابه
ولها خشم كنّـه سلّـة النافعـي ملـواه
=مقوّس كمـا منقـار حُـر ٍ ومخلابـه
ومعنق لطيف الروح يفرق على شرواه
=كما عنق ريم ٍ من التفافيـق مرعابـه
وعوده ليان وضامر ٍ حيل في المثنـاه
=ويفرق على الديبـاج صـدره وتلبابـه
أنا ويش أوصف جل رب ٍ عطا وسوّاه
=جمال ٍ قليل ٍ من مشابه علـى ترابـه
عنود ٍ عشقها خافقي وغيرهـا مابغـاه
=ليا جا الذهب باقي السلع ويش أنا أبغابه