|
رد: مساااااعده ببالدراسات العلياا لتاريخ
قد تكون تجربتي لا تفيدكم في تخصصكم
لكن كان لي تجارب مع هذا النوع من الاختبارات والمقابلات . سبق وأن قدمت مرتين لدراسات الماجستير في جامعه الملك فيصل ومرة على وظيفه معيده وقدمت أيضا على وظيفه معيده في جامعه الدمام وكل محاولاتي فشلت إلى أن تكللت بالقبول في الماجستير في جامعه الملك فيصل ولله الحمد .
و سأحاول أن أقدم لكم بعض النصائح من خلال خبرتي
1- بالنسبه للسنه الماضيه كانت الاسئله مقالي وموضوعي وكانت سهله نوعا ما . أما ما يخص السنه ماقبل الماضيه كانت مقالي فقط نوعا ما صعبه ( ما موقف أمريكا من الحرب العالميه الاولى ، تحدثي عن الدوله السعوديه الاولى ، تحدثي عن قصه انفصال جنوب السودان ) .
2- أسئله الاسلامي والقديم ماعندي علم عنها للاسف .
3- فيما يخص المقابله الجميع تأهل لها بعد دخول الاختبار وحاولي تكوني واثقه من نفسك هذا له دور كبير وصوتك مسموع ولا يكون الصوت واطي ، خذي نفس عميق قبل دخولك وتوكلي على الله ، قد يحاول بعض الدكاترة استفزازك هنا حاولي تكوني طبيعيه وحطي ببالك ان الي قدامك بشر وليس ملاك والكل قد يخطأ ، سؤال يرد ذكرة دائما ما اخر مايكتب في البحث والجواب المقدمه ، قد يتفق أعضاء هيئه التدريس قبل دخولك أن يسالوك سؤالين مع بعض علشان يشوفون كيف تتصرفين في هذه المواقف وحصلت معي وجاوبت على مين أرد قبل ؟ ، حاولوا تقرون الاشياء البارزة في تخصصكم .
4- بالنسبه لي في الاختبار والمقابله قريت في مجال تخصصي فقط وسميت باسم الله ودخلت طبعا في خوف في داخلي بس حاولت اتغلب عليه ومايبين علي ، كان في دكتورين لم يسبق أن درسوني ودكتورتين درسوني سلمت على الدكتورتين باليد وقلت للدكتورين السلام عليكم (علشان احسسهم ان واثقه من نفسي ومش خايفه ولما جيت اطلع قلت لهم يعطيكم العافيه) ، اسالوني ايش معنى اسمك وليه اخترتي تاريخ حديث ليش مش اسلامي او قديم واساله كثيرة في التاريخ طبعا في اشياء جاوبت عليها صح واشياء خطأ وهنا يهمهم الثقه بالنفس أكثر شي وسالني عن اخر كتاب قريته وعن ايش يتكلم واهم شي بما ان احنا تاريخ لازم تعرفين تحددين القرن لو عطاك تاريخ لان صديقتي ماعرفت قال لها الدكتور اذا ماتعرفين تطلعين القرن وانت تاريخ وتبين تقدمين على الماجستير (اذا ماتعرفون ابشروا اعلمكم) تقريبا كانت مقابلتي 8-10 دقايق .
5- وهناك اساله سمعتها من الكثير لكن لم تطرح علي منها : لو لم يتم قبولك ايش تسوين ؟ عندك أعمال تطوعيه او دورات ؟ ايش هواياتك ؟ تكلمي عن نفسك باللغه الانجليزيه ؟ (جهزي ذلك في ثلاث سطور تقريبا واستعيني ببرنامج ترجمه) .
اتمنى ان قدمت شي مفيد لكم
لا تنسوني من صالح دعائكم ..
|