كريم يا برق سرى يشعل إشعال
برق السحاب اللي ترازم رعوده

ناض وتلالا وأمطر المزن همال
والجو منعش فيه غيم وبــــروده

وسالت نفود العرق وسهول وجبال
كل الديار بفضل ربي وجــــــــوده

والعشب الأخضر والزهر سحر قتال
وطير السعد غنى تعدى حـــــدوده

يلعب طرب والجو غايم ولا زال
فكر المولع بالربيـــــــــع ووروده

ونبت الخزامى والنفل فوق ميال
ياما حلا شوفه ويازين عـــــــوده

وشوف الندى جذاب في كل الاحوال
فوق الزهور النرجسيه وجـــــوده

الذود ترعى بالمراعي وتختال
متناثره والروض الأخضر تـروده

انا ولو عشـت المـدن ماهنالـي
علي من لون الصحاري تواصيـف

أحـب بـرٍ أدهـلـه بـ الشمـالـي
ومناي مرقاب الرجوم المشاريـف

إن سقت دربيلي بـروس العوالـي
مرتاح لوهبـت علـي العواصيـف

وشبيت ناري بين سمـر الجبالـي
في روض وإلا هضبتاً ظلهـا هيـف

وصفيت من قبل الغـروب الدلالـي
الله يانـا بـِ منتهـى قمـة الكـيـف

وإن شفـت براقٍ بعيـد المخالـي
كنه خويٍ لي من سنيـن ماشيـف

أفرح بسيلٍ بـ أسمـر القـاع سالـي
فرحة كريمٍ لاطرق بابـه الضيـف

وإن نمت في برٍ من الحس خالـي
كني بقصرٍ أملكـه داخـل جنيـف

شوفي أثر الصيـد بالحيـل غالـي
وسمعي من طيور المواسم معازيف

الصيد يزهـي ديرتـه بـ الجمالـي
لو كان أرض الصيد ما كلها ريـف

لا لي من اللـي يعذلونـي ولالـي
من عقب هاك الوقت غير التحاسيف