المشاركة الأصلية كتبت بواسطة ام القمل

اسال الله لنا جميعا ولك خصوصا التوفيق
من تجربتي الخاصة
اخذت في المستوى الثاني جميع المواد وكنت اعرف اني باكل هوا (الشغالة وسافرت وولدي صار بالمتوسط وحضرتي طبل طبل بالانجليزي والله حتى الضمائر ماعرفها)
بس اتكلت على ربي وعزمت اني انجح واخذ الممتاز كمان وشلت الخوف من الانجليزي
ومن قبل تبدا المحاضرات تنزل انا جهزت ملخصاتي وطلعت من مكتبة البيت كم كتاب لتعليم اللغة الانجليزيه عشان استعين فيها
طبعا الملخص الي اعتمدت عليه للانجليزي كان ملخص سكرتير عبادي (انصحك فيه)منترجم وواضح وشامل
المهم من اول محاضرة حضرتها وذاكرتها زييين ماغير الملخص قدامي واذا مافهمت شي استعين بالكتب الي عندي واذا مرت علي كلمة ومافهمتها اترجمها
طبعا اول ثلالث محاضرات تعبت تعبت مع انها بالواقع سهله بس مثل ماقلت لك انا طبل بالانجليزي
بس بعدها بدا مخي يشتغل شوي وبديت استوعب فكرة الانجليزي
واللي فادني كثير اني اول باول اداكر وبعد ما اخلص ثلاث اربع محاضرات اراجعها من جديد
وقبل الاختبارات بثلاث اسابيع تقريبا حطيت لي خطة كل مادة خصصت لها كم يوم على حسب صعوبتها بالنسبه لي وذاكرتها مذاكرة نهائيه
(طبعا انا هنا كنت اصلا مخلصه كل المواد حاضرة كل المحاضرات ومذاكرتها كمان)
ولله الحمد لااله الا الله جبت الممتاز وفي الانجليزي جبت بي بلاس
طبعا بي بلاس بالنسبه لي تعتبر اكثر من اي بلالس تعتبر انجاااااز
لاني كنت عدم بالانجليزي واعتمدت على نفسي لا مدرسه خاصة ولا شي
الزبدة اذا تقدرين تنظمين وقتك وعندك طاقة استيعابيه اتكلي على الله ونزلي مواد المستوى كاملة
اهم شي اول باول تحظرين وتذاكرين

ربي يوفقك ويوفقنا جميعا ونسمع منك الاخبار الطيبه باخر الترم