|
رد: تكررت عقب البطا والتقينا...>>مؤلمه
تكررت عقب البطا وألتقينا
من عقب ما مرن سنين ٍ طويلات
في صدفةٍ حشا مادرينا
ولا هقينا نلتقي عقب مافات
لاشك جابتها الليالي وجينا
رغم الفراق ورغم ذيك المسافات
في موقفٍ بان التوتر علينا
لحظه تلين أبها القلوب القويات
قالت شلونك قلت ربك عوينا
الحمدلله عاضني عقب لوعات
الله رزقني في هنوفٍ تبينا
أحيت خفوق ٍ كان بعداد الأموات
هي نور عيني فرحتي والضنينا
ألقابها عن ضيقة الصدر سجات
قالت سليت وقلت عقبك سلينا
لكن عقب مالاعنا الحب مرات
قالت شلون وقلت لا تسألينا
مافات فات ولا تفيد الحسوفات
قالت تكلم قلت مهما حكينا
الدمع ماينفع عزيز ٍ أليا مات
قالت نسيت وقلت لا مانسينا
لكن قنعنا والقناعه من الذات
قالت أروح وقلت وش في يدينا
روحي عسى في كل خطوه سلامات
بصبر على فرقاك مهما حيينا
ولا تشوه صادق الحب زلات
قالت على ماكنت دنيا ودينا
تكرم ونكرم عن دروبٍ رديات
قلت أسمحيلي قبل لا ترحلينا
يم الديار اللي علينا بعيدات
تراي ذخر ٍ لا حدتك السنينا
أجيك مهما واجهتني صعوبات
من اليوم أخوك وغيرها مابغينا
كلي فداك أن صار بالوقت ميلات
وتبسمت بأعجاب مدري حنينا
وتهشمت قدام عيني بعبرات
قالت فمان الله قلت أنتهينا
وأقفت تكلم نفسها بس بسكات
وقفت تقدير ٍ لها ثم مشينا
دربٍ مشوه أهل القلوب العفيفات
أمشي وأردد ليتنا ما ألتقينا
وش جابها عقب السنين الطويلات
قصيده جميله ورائعه
راقت لي
شكراً
|