يا فاطري ذبـي خرايـم طميـه
الى اشمخرت مثل خشم الحصاني
ذبي طميه والفيـاض العذيـه
تنحري بـرزان زيـن المبانـي
سلام أخو نوره لـزوم عليـه
قبل القريب وقبل حي ودانـي
والى قضيت اللازم اللي عليـه
اللازم اللي ماقضـاه الهدانـي
الجدي حطيته بـورك المطيـه
وافرق نحرها عن سهيل اليماني
نبغي ندور الطفلة العوسجيـه
ريحه نسمها كالزبـاد العمانـي
تباشروا بي عقب سابع ضحية
وأنا على أبرك ليالـي زمانـي
لومي على الطيب ولومه عليه
يومه يأخذ عشقتـي ماتنانـي
ليته صبر عامين والا ضحيـه
ليا ما يميز غربتي ويـش جانـي
أما غـدا ابومحمد بالمهمهيـة
والا ظهر يصهل صهيل الحصاني
حريبنا لا اهدى علينـا هديـه
عندي مجازاته مثـل ماجزانـي
نسهج محله لين يخلـف نويـه
يصبر كما يصبر جديع الاذاني
من الافلاج الى النفود محميـة
الا أن يمشيها واحدِ ودعاني
افعالنا هـذي علينـا وصيـه
فرض علينا مثل صوم رمضاني
الصدق يظهر من حباله رديـه
والكذب يقطع من حباله مثاني