يقولون ما للعبد بد على المقسوم
وانا اقول صح ويقنع العبد مقسومة
عسى الله يعين اللي توافد عليه اهموم
اهموم تخلي طبلة الراس منجومة
ترى والله انه مايكدر عليك النوم
سوى كلمة من بعض الاصحاب مسمومة
اليا جات من الغاليين ولا الرخوم رخوم
ولا امحق من الغاليين لا شانت علومة
اضعاف الروابع تبتلش والقروم اتشوم
ولاهيب لا شامت من الشيب مليومة
ولا ازين من القاع الخلا وللوجيه اسلوم
ولا ارفقت مع طول الايام ملغومة
ولا الذ من عشرة شريف من اقصا القوم
يبادلك فعل الطيب معناه واسلومة
ولا شفت في جو الصداقة غبش وغيوم
اعطيت الدروب اللي مع الارض مرسومة
ولا مثل عز النفس ولو مامعك مطعوم
وعن اهل الشماتة خل الاسرار مكتومة
معي لو سمحت اشوي عقب عداك اللوم
ابعطيك عن بعض الرياجيل معلومة
ترى اللاش لو وقف معك في حياتة يوم
اتشوف الردى متبين فيه من يومة
وانا اقول لو ان في وجيه الرخوم وسوم
عرفنا نميز قيمة النذل بوسومة
عشان نجلس مع رجال الوفا وانقوم
ونبعد من اللي عند الاجواد مذمومة
وانا اسمع مع اهل التجربة في الحياة اعلوم
بعضها صحيح وبعض الاخبار موهومة
يقولون وكر الحر مايعتليه البومة
وانا شوف عيني وكر حر وتحت بومة