قالت لي : قاسي !. قلت : لا تواخذيني
.. أنا كذا واضح مع الكل يا ( نوف )

رحتي ورحْت وثورة الحرف فيني
.. ومعاطس أقلامي مصاليب ووقوف

أنا نتيجة من تجارب سنيني
.. وأنا بقايا جرح ينزفني حْروف

ماعدت أحسّب من يروح أو يجيني
.. وماني على رجوى المقفين مكلوف

لا توجعي راسك ولا توجعيني
.. إلْهي مع ظروفك وأبلهي مع ظروف

صدي عيونك عنّي لا تناظريني
.. ولمّي طيوفي عن سما البال والشوف

إلغي محطاتي !!.. ولا تحتريني
.. تكفين ( بفراقك ) تسوّين معروف

لا أحتوي زعلك .. ولا تحتويني
.. الوقت يْداوي كل جرحٍ كوى الجوف

لا آحلّفك لالا- ولا تحلّفيني
.. الموقف أبلغ من تبارير وحلوف

أنا وحيدٍ من بداية سنيني
.. وببقى وحيدٍ باقي العمر يا ( نوف )