القصيد شعور يطلع على الشاعر دليل = يتضح للناس دق العلوم وجلها*
الهزيلة ما يغني بها كود الهزيل = والجزيلة عند أهلها وهم كفو لها*
وأكثر الشعار في وقتنا حطاب ليل = لا لقى له حاجة في طريقة شلها
وجاك يشعب سابقة تعتدل ولا تميل = وصفقت له شلته والقناة احتلها
البيوت مكسرة والهدف ما من حصيل = ويطوي المكره على خيبته ويفلها
وإن لقى له عاقل يرشد القلب الهبيل = ينصحه ويقول خذ هاذي وهاذي خلها
لا استفاد من النصيحة ولا صمد جميل = فيه ناس لو تكب القصيد أحسن لها
لا بغيت الشعر يبقى لجيل بعد جيل = وكل ما أصغوا له هل الصنف قالوا سلها
فارتفع به فوق وابنه على معنى جزيل = وكل ما مريت هزلة بدربك زلها*
الكلام الذرب يقنع ولو إنه قليل = والسماجة كل رجل شريف يملها*
والقصيد أنواع شي كما حد الصقيل = كل ما توحيه الأعداء تزايد غلها
وعند من يعرف معانيه مثل السلسبيل = الشعور يهزها والكبود يبلها
وشي ما ينقال وأنا على ربي دخيل = من هزيلات السوالف ومن طبلها
الجواهر فالبحر والبحر قاعه طويل = ناس تاصلها لك الناس ما تاصلها