|
نصيحـه ( جايكم من المستوى الخامس ) مهم جداً للجميع
السلام عليكم ورحمة الله وبركاتـه
أخباركم يامستوى 4 وكيف الاختبارات معكم ان شاء الله تكون كويسه ( لأني اعرف مستواكم الرابع ازفت مواد مرت علي )
المهم انا جايكم من المستوى الخامس وبأذن الله رايح لـ المستوى السادس وشايل بيدي البشت والسيف ( من الابداع الي سويته ب اختبارات المستوى الخامس )
أخواني بطول عليكم شوي بس صدقوني كلكم بتستفيدون حتى الي معدله نازل بيتحمس اكثر واكثر
انا الترم الماضي لما كنت بالمستوى الرابع كانت الاختبار ( نص ونص ) يعني مجموع درجاتي كانت جيدجداً ومواد كانت مثل الزفت بالنسبه لي لأنها كانت الاصعب بالنسبه لي مقارنه بالاترام الماضيه الاول والثاني والثالث
والحمدلله عدينا من مستوى رابع على خير ورحت مستوى الخامس واخذت نصايح من الدفعه الي سبقتني وهذي النصايح ( كانت بفضل الله ثم بفضل الدفعه الي قبلي هي سبب تفوقي بـ مستوى الخامس )
بالبدايه قبل اسجل مواد مستوى خامس ولما اخذت النصايح من الدفعه الي قبلي "قررت بيني وبين نفسي أن المستوى الجاي (الخامس) أني ارفع معدلي لـ 4 وعليها وكنت مصمم على هالشي وجمعت نصايح وقريت تجارب الدفعه الي قبلي وقلبت بمواضيعهم لين شبعت
وجاء عاد تسجيل مواد المستوى الخامس عباره عن 6 مواد ( انا كنت ماشي عالخطه وقررت اني ما امشي عالخطه بحيث اني اضبط جدول الاختبار واخلي بين كل اختبار واختبار اقل شي يومين ) عشان يكون عندي وقت وعشان اضمن اجيب درجه عاليه بكل المواد وعشان كذا حذفت ماده وحده مانزلتها والي هي *الاعمال الدوليه* والسبب لان الدفعه الي قبلي قالو انها هي الاصعب وبنفس الوقت عشان جدولي مايكون زحمه اختبارات
وعلى فكره انا من الناس الي طول الترم ما افتح الموقع لدرجة اني انسى اسماء المواد الي علي وقبل يتقفل المشاركات ب اسبوع اخلصهم وحتى ما اتابعهم ولا عمري تابعتهم وبديت مذاكره قبل الاختبارات ب فتره قصيره 3 ايام لكن شديت على نفسي.
وكنت مصمم وحاط ببالي أني اجيب معدل عالي بالترم الخامس مهما كانت صعوبة الاسئلة او المواد لأني بصراحه زعلت من نتيجتي من الترم الرابع وكانت عندي مادة جبت فيها D وقلت خلاص المستوى الخامس بدخله غير وبغير طريقتي بالمذاكره واشد حيلي وتكون هذي بدايتي من جديد.
بديت اختباراتنا وأول ماده كانت متوسطه ومع مذاكرتي 3 ايام لها مع هدوء وتركيز طلعت من الاختبار وانا ضامن a
جت الماده الثانيه وكانت سهله بصراحه ( ماده دينيه وتتكلم عن سيرة الرسول وكانت ممتعه ممتعه لدرجه وانت تدرسها تقول يارب الملخص يكون طويل عشان ما اخلص وفعلاً تمنيت الملخص يكون طويل من جمالها واختبرتها وطلعت وانا ضامن +a
وجت الماده الثالثه والرابعه والخامس وكلهم طلعت من الاختبار وانا ضامن a وياربي لك الحمد خلصت الحين المستوى الخامس وانا كل المواد a بأذن الله بعد ماكنت اطلع واقول يمكن اجيب c ويمكنb تغيرت مع المستوى الخامس
ادري والله طولت عليكم
لكن الي بوصله لكم يـ أخواني لكل واحد كان معدله نازل او متوسط هذي فرصتكم بالمستوى الخامس والله مواده حلوه لكن تبي هدوء وتركيز
ومواد مستوى الخامس تعتمد على ( الحفظ الحفظ الحفظ ) في كم ماده بصراحـه مو صعبات لكن فيهم كميات معلومات كبيره حييييل لدرجه ان الواحد ينغث بالمذاكره وتتلخبط عليهم المذاكره لكن شدو حيلكم فرصه لكم
ولا تسمعون للي يقولون مستوى صعب او ان المواد صعبه ( هذولا مايذاكرون ويجي ليلة الاختبار يدور ملخص صفحتين واذا طلع من الاختبار قام يدعي على استاذ الماده ويلعن )
حتى بـ الانطباعات لما كنت اطلع من الاختبار احصل دفعتي كاتبين صعب صعب ( وانا بالنسبه لي اسهل من السهل حتى كنت اقول بنفسي هذولا شكلهم مختبرين اختبار غير اختباري )
وشكراً لكم ادري والله طولت عليكم لكن شفت في كم واحد منكم منزل موضوع بقسمنا ويستفسر وحبيت اوصل لكم هالكلام الي ادري انه طويل والله هههههههه
ملاحظه ( مواد مستوى 5 كلها اخذتها ب استثناء مادة *الاعمال الدولية* لان الدفعه الي قبلي قالوا فيها شوي غموض وقلت ب اجلها لبعدين )
فمان الكريم وبالتوفيق لكم ، والله يسهل عليكم ويكتب لكم التوفيق بكل خطوه تخطونها
التعديل الأخير تم بواسطة فهد السويلمي ; 2016- 5- 11 الساعة 04:19 AM
|