ملتقى طلاب وطالبات جامعة الملك فيصل,جامعة الدمام - عرض مشاركة واحدة

Doremi · 2016- 5- 19

آخر رد لي بخصوص الماستر.. لأني أساسا ً ما كنت أبي أدخل بهالسالفه من الأساس

اقتباس:

المشاركة الأصلية كتبت بواسطة كارزما

.

نجي دودي لسالفة الخبرات

كان زمان ياحبيبي الخبرة لها وزن وثقل اليوم وش شهادتك ثم وش خبراتك ؟؟
وبعطيك دليل من أرض الواقع كثير قريباتي أجبروا رغما عنهم على مواصلة
دراستهم علشان يقدروا يحتفظوا بمراكزهم الادارية وخبرة سنينننن اتركنت ع الرف
ادعمي خبرتك بشهادة أو متشكريين .

سؤال، اُجبروا يكملون دراستهم ايش؟ بكالوريس ولا ماستر؟
لأن طبيعي الي ماعندهم بكالوريس ما تهم خبراتهم بدون شهادة تخصص..
البكالوريس أهم شيء .. بعده تجي الخبرات

أما الي عنده بكالوريس وموظف ماراح يجبرونه يكمل ماستر إلا إذا كان في وظايف معينه، مثل معيدين بالجامعه ..
وغالبا ً هالوظايف ما نقدر احنا نسجل فيها بطريقه طبيعيه فنخليها برا حديثنا ..

أنا باستمرار أروح مع اختي وهي تبحث عن وظيفه، هي شهادتها انتظام ومعدلها حلو ماشاء الله..
معارض التوظيف، وشركات التوظيف وكلللل مكان نروح له يقولون نبي خبره ..
وآخر مره رحت معها قبل شهرين، كل مكان نروح له يقولون التخصص نحتاجه بس احنا نبي موظف عنده خبره..

لا زالت الخبره مطلوبه ومهمه..

حاليا ً أبحث أنا وهي عن طريق النت ، نفس الحاله، يبون خبرات..
ماعمري شفت مطلوب ماستر، إلا مره وحده وكان مطلوب معاه خبره 10 سنوات

--------

اقتباس:

بقول لك كلام أثق في الي قاله لي

يقول لما تجينا cv عبارة عن مجلد شهادات وخبرات ودورات
ماتلفت نظرنا مثل cv من صفحة وحدة انجازات راعيها واضحة ومحددة .

ايه لأن فيه ناس تستهبل، تروح تسوي ملف تقولين دليل الهاتف القديم هذاك

الواحد لازم يبحث عن شهادات تتوافق مع تخصصه وتخدمه.. وما تكون شهادات أبو كلب أو أبو أسبوع، مب أي شهاده.
ولا تجيك الوحده حاطه دورات مكياج وطبخ وهي تقدم في وظيفه مالها علاقه..
أو تجيب مليون شهاده كلها نفس الفكره بس يقال لك مختمه الدنيا..

تجميع الشهادات له فن ومهارات وحتى ترتيب شهاداتك في ملفك له أساليب وطرق لازم الواحد يعرف عنها..

--------

الي يبي الماستر علشان يرضي طموحه ويبي يستمر بغض النظر عن الوظيفه فهنا هالكلام كله ما يهمه..
الماستر ماله سلبيات للي يبي يكمل علشان يتعلم أكثر أو عنده شغف بمجال دراسته..

هالكلام الي تحت للي يشوفون الماستر وسيله مضمونه للحصول على الوظايف..

فيه شيء لازم تعرفونه يا قوم عن التدريب والخبره..
الشركات في السعوديه عندها مشاكل في التدريب، الشركات الكبرى ما تعاني من هالشيء وبالتالي ممكن ما تطلبك خبره، بس الشركات الكبيره هذي معروف أنها توظف ناس بتخصصات قويه، هالشركات مثل أرامكو وشلتها.. يبون مثلا ً مهندسين بمعدلات عاليه ، وطبعا ً ممكن يوظفون بدون خبره لأن التدريب عندهم مافيه مشاكل..

الشركات المتوسطه والصغيره هي الي ممكن توظف التخصصات باختلافها لكن هي الشركات الي عندها مشاكل بالتدريب لو قرأتوا وبحثتوا راح تكتشفون أن هذي مشكله مب سهله..

باختصار، الموظف الجديد عديم الخبره يحتاج تدريب، التدريب يكلف من الشركه .. الأوفر للمدير العاقل أنه يوظف شخص متدرب وعنده خبره مسبقه علشان ما يخسر عليه.. ماحد يبي يجازف بشخص جديد يجي يتدرب على حساب الشركه وسمعتها..

أنا جربت تدربت لوظيفه، دفعوا للموظفات القديمات راتب أو مبلغ إضافي علشان يدربون الجدد
إضافه إلى انهم داوموا دوام اضافي معانا وهالتدريب أثر على وقتهم وشغلهم ، بالعربي أشغلناهم وأثرنا على مستوى الانجاز والشغل في هالكم يوم ..

في الأخير بسبب مشاكل وبيئة العمل كانت مخيسه وكلها احتيال تركت أنا و3 من الموظفات الشغل بعد التدريب باسبوع..
يعني خسروا وتعبوا عالفاضي (يستاهلون هالشركه بالذات

) ..
والشركات والمدراء حاطين ببالهم هالشيء الي قلته ^ وعارفين برضو أن مب كل الناس ترتاح بهالوظيفه ممكن ينضغطون..
ما تلاحظون مؤخرا ً في الوظايف أغلبها صاروا يكتبون ( القدره على تحمل ضغوطات العمل) ؟

-----

الوظايف كل مالها تروح وتقل وانتوا عارفين الوضع الاقتصادي للبلد وبالميزانيه والمشاكل المتعلقه بالوظائف في
السعودية حاليا ً..
إذا ما نحصل عالخبرات الحين متى راح نحصل عليها؟
الماستر ما يقل ولا يتأثر بهالأمور فممكن ناخذه لاحقا ً، وهو مب من المقومات المعينه على التوظيف كمستجد..

---

كون الثنوي زمان كان يوظف ، وبعدها صار ماعاد يكفي..
ما يعني أن البكالوريس الحين يوظف وبعد فتره ماراح يكفي..
غلط، لأن فكره الماستر غير ومالها علاقه، هي مب إكمال دراسه ولا خطوه مطلوبه وضروريه ( هو مفيد لبعض المجالات الأكاديميه والتعليميه، أما في الشركات بشكل عام، ماحد يبي يوظفك مكانه

يعني مستجد وشهادتك تبي تحللها وتاخذ مسمى وظيفي وراتب عالي، فين يحطونك وانت ماعندك خبره؟ مدير على طول؟ )

الي فاهم الماستر كمرحله تكميليه ضروريه بعد البكالوريس يرجع يعيد حساباته..

في النهايه خطأ نقول أن فيه طريق واحد لتحقيق المستقبل الناجح، النقاش نوعا ً ما غريب، راح يظل عند كل واحد منا "لكن" يرد فيها

..
بس الله يكتب لنا جميعا ً الي فيه الخير ويحقق أمانينا الي نترقبها مع أنفسنا دايما ً...

كتبت هالكلام لأن فيه ناس ممكن تجهل هالأمور الي كتبتها وما تبي تمر فيها ، فحرام يظلون على أمل خاطئ متداول بين الناس.