كانت الكتابه مأكوله اغلب حروفها والتعبير بسيط وعفوي فابتدي بالسلام
واحبك يابابا وانتهي ب " احبك يابابا " وارسم قلب وسهم ودم يتقاطر من ذاك السهم .. واذيل الرساله بالتاريخ واليوم
فكانت اغلبها يوم " الأربعاء " يوم عودته من العمل
اقول لكم بأن الاطفال مشاعرهم لاتكذب ، فطفل بعمر السابعه او الثامنه يرسم قلب مجروح ! لانه باختصار يعاني من بعد ابوه !
اذكر اني اسهر لعمل هذي الرسائل وأتعب على تزيينها حتى اذا رجع يوم الأربعاء اعطيه
..
يقول اني انا الوحيدة من كان يفعل هذا عكس البقيه ثم بكى
!
هذا الاب رجل اسيف (كثير البكاء ) فكل شي يهزه من رحمه او محبه او حنين !
اذا تكلم عن ابوه بكى ، لا زال حزين على فراق والده ..
اذا تكلم عن الضعيف والفقير بكى ..
اذا تكلم عن حبه لنا بكى ..
اذا رأى الضعيف بكى ..
اذكر مره سافرنا انا وهو العام الماضي نغير جو وكل الرحله بكاء ..
كنّا نقوم الساعه 7 الصباح حتى نطلع فوق نفطر ،، وماكنت أفطر الله يصلح قلبه يسولف بسوآلف تكدر الخاطر
يقول لي مواقفه الإنسانيه ثم تخنقه العبره ويصرف نظره ويمسح دموعه
بعدين يسألني ليش ماتفطرين شلون أفطر بس
ونطلع نتمشى ويكمل مواقف انسانيه ومواقف مع ابوه ،، ويبكي وانا معه ..
وللاسف بسبب هذا الحزن اللي اجتاح قلبه تعب ودخل المستشفى
حقيقه كنت احس الرحله ذيك " فضفضه " فالجو صفى لنا واخذ راحته ومافيه شي ماتكلم عنه ..
مافي يدي شي غير اني اسمع له ثم اذا انتهى ، بكيت تحت الدش < حركة سامي الجابر
وانا مثل ابوي ابكي على كل شي ،، واذا تكلمت عن ابوي دموعي دائماً تسابقني واذا نظرت له بكيت
رغم ان ابوي مايفرق عن باقي الآباء الا في انه مايضرب ابداً ،،
هو اكل من ابوه جلد بكل الأدوات
اذكر مره قال لي ابوي ضربني وانا كنت احط يدي على وجهي حتى مايصيبني شي فضربت ذراع جدي بيد ابوي
فيقول ابوي بعد ما هدى جدي شفته رابط ذراعه ويتألم منها فعرفت انها مني .. يقول من عقب ذاك الموقف وانا كل ماجاء ابوي يضربني عطيته ظهري حتى لايتألم مني بدون قصد
كانت رساله عظيمه لي فمثل ماهو اهتم بالتفاصيل انا صرت مثله اهتم بتفاصيلي معه ( وهل جزاء الاحسان الا الاحسان )
تعاملك مع والديك ينعكس على عيالك اي والله ..
تقول لي امي ابوك مافيه ابّر منه عند ابوه وأمه .. الناس في كفه و والديه في كفه اخرى
الله يجزاه الجنه ،، ويطول بعمره ويزيده بر
اسأل الله العلي العظيم ان لايحزن قلبي على فراق من احب وان لايحزنكم ولايريكم مكروه بمن تحبون