آه ياكسر قلبي وآه ياضيق بالي
من فراقه وساعات الغياب الكريه
أمس ضايق أقلب ذكرياته لحالي
كل ذكرى تشق ضلوع صدري تبيه
من بعد غيبته عني وش اللي بقالي
يا عذابي بلاه ويـا وجودي عليه
واهني المريح اللي من الهم خالي
ماسهر ليلة إلا في رضى والديه
ضاق صدري وأنا من قبل أعرفه شمالي
كل ما هب نسناس الشمال أرتجيه
ليت لو كان كل غالي يعوض بغالي
كان ما نشكي فراقه ولا نحتريه
ليه غاب وتركني ليه شح بوصالي
مابقى صبر في قلبي على مايجيه
والله أني لو مقصر عليه بسؤالي
كان ما قلت وين وكان ماقلت ليه
حسبي الله على الفرقى وسود الليالي
كم خذت من عيوني كل شيً أبيه
كل ماقلت أبنسى مر طيفه قبالي
مافرحت بلقاه ولاتهنيت فيه
ليت نرجع مثل ما كنت داله وسالي
قبل ماتغرق آحلام هاللقاء بيديه
آه ياحلمي الأول ويا راس مالي
لاشبيه لغلاك ولا لجرحك شبيه