ملتقى طلاب وطالبات جامعة الملك فيصل,جامعة الدمام - عرض مشاركة واحدة - ضرب الزوجة لزوجها " لايجوز " ..! ( للنقاش )

Doremi · 2016- 8- 8

اقتباس:

المشاركة الأصلية كتبت بواسطة ريمنقو

سمعنا كثير طاعة الزوج مقدمه على طاعة الوالدين .. الزوجه تطيع زوجها اذا كان بمعروف الكثير يتجاهل هذي المسألة
اما لو منعها من صلة رحمها فهذا حرام ! وان منعها من عباده فهذا حرام !!
وبالمثل الوالدين ماتطيعهم اذا كان امرهم فيه مضره لها هي وزوجها ، اما لو كان خيراً لها فلبيه ولبيه ..

بيض الله وجهتس

ووجهك

بالنسبه لحكاية طاعة الزوج أولى من طاعة الوالدين صرعونا فيها وبرضو الفهم خاطئ هو السبب ..
انا عارفه انتي فاهمهته تماما ً بس كتبته للجميع فاسحبي على الشرح لو تبين

طاعة الزوج أولى من طاعة الأم والأب متى؟ في شؤون بيت الزوجه وعيالها وزوجها، احنا عارفين الأهل يستخفون مرات ويتدخلون بشؤون مالهم فيها صلاح ، وهذا الي نشوفه من العمات والأعمام ونص خراب البيوت بسبب تدخلهم في شؤون زواجات أولادهم وبناتهم ولو كان بحسن نية.

ومن هنا صار فيه أولوية للزوج لأنه بيته وبيت زوجته، بديهي ما بيعطى هالحق للزوجه لأن عاطفتها أقوى وبتتعاطف وتجامل، علشان كذا اُعطي هالحق للزوج..

مثال على هالأمور الي نبدي فيها طاعة الزوج على الأم والأب: الأم تقول لبنتها تعالوا انتي وزوجك انقلوا للمدينه الي أنا فيها لأني أبغاكم قريب مني..
وتجي الزوجه تحتار وتقول لازم أبر أمي ، والزوج يرفض النقل ويقومون يتهاوشون وتقول الزوجه لزوجها أنا لازم أرضي أمي تراها أولى منك ..

في هالشؤون تكون طاعة الزوج، وهي بالعقل معروفه، بس كان لابد من حكم شرعي ينقال علشان ما يصير لعب وتلاعب لأن بعض الناس لا منطق ولا عقل ..

لكن هذا الشيء لا يدل على أن فضل الزوج أعظم !! أبدا ً.. الغرض ليس التعظيم.. الغرض منه حفظ البيوت..
لو الغرض من هالشيء هو التعظيم أو رفع مكانة الرجل كان انذكر الزوج في القرآن مليون مره مثل ما انذكروا الوالدين وفضل برهم .. كل الآيات الي نشوفها تفضيل للرجل يكون تفسيرها أن الرجل أعلى منزله من ناحية النفقه وأمور كهذه.. مب تقديس ولا تقدير عبثي ..

اصحوا وفتحوا عيونكم، افصلوا بين التقاليد الي قدّست الرجل وبين الدين الي أعطى كل واحد حقه بدون مذله وأنا ما أدعوا للمساواه الي طايحين فيها البنات وأن كلهم زي بعض بالضبط، لا أنا فاهمه ديني وعارفه حق كل واحد.

بس ترى التقاليد متشعبة داخل الدين بشكل مؤذي، والأدلة الي تطفوا على السطح هي الي تدعم هالأمور..
الي صادق أنه حريص عالدين بيروح عالأقل يقرأ البخاري طالما هو المصدر المعتمد للأغلب، هذا أضعف الايمان، تعرفوا على الأحاديث الصحيحه الي دفنها المجتمع علشان الصالح العام..
دمار الأديان دايم يكون من داخلها، بسبب كثرة التشدد وتقديس الصالحين وأنهم ذوات منزهه عن الغلط وأن حتى انتقادهم محرم..

اقتباس:

مانسمع ونقرأ من ان بعض الفتيات
ترغب في الرد بالمثل هو انحطاط تربوي وخلقي سيؤدي في الاخير الى
جرائم قتل وانتشار السلوك الغربي البغيض . الزوج يحتمل زوجته والزوجة
تتأدب لزوجها . والعشرة بالمعروف .
انا ضد نشر ثقافة الاعتزاز بالاثم من طرف المرأة ومجارات مايروج له من
امور لاتخفى على احد .

أنا ضد أن الشيخ يفتي بعدم الجواز في مسألة عامه ومالها دخل بالدين ، (ماحكم أن علي يضرب معاذ بزاوية 90 مع العلم أن علي هو الي بدأ الألفاظ البايخه) ويجيك شيخ يفتي! أعط رأيك حسب الحاله نفسها بدون أحكام، استغل سلطتك بشكل سليم في إصلاح البيوت، وفهّم الناس أن مب كل شيء له حكم.. اقتدي برسول الله في توبيخ الصحابه على سؤالهم عن حكم كل شيء، مب تطلق فتاوى تسيء للدين وتكفر الي يخالفك.

بس كوني أقول هالكلام ما يعني أن تربيتي منحطه.. يعني أضمن لك أوضاعي تمام

متربيه الحمد لله، والوالد الله يحفظه مربي أخواني من صغرهم الي يمد يده على بنت يتوطى ببطنه لأنه ارتكب شيء غلط وكبير وينقص من رجولته قبل كل شيء.. وما تقدر تقنعني أن هالتربية منحطه..
اختلاف التربيه من بيت لبيت وارد، مب كل من اختلف معاك يعتبر منحط تربويا ً ، سواء أنا أو غيري يعني..

قصة وحده كان مفروض أنها ضربت زوجها :
أعرف وحده تقرب لي من قريب ، زوجها ضربها ( لسبب ساذج ) وطلعها بالشارع بدون عبايه أو حتى جاكيت بنص الليل والبرد..
الضربات على وجهها وجسمها ظلت آثارها أسابيع، والحين بعد 3 سنوات باقي تاخذ أدويه نفسيه بين فترة وفترة من القهر لأنه ظالمها ..
الحرمه وقت ما كان يضربها ما ردت عليه بالضرب مع أنها عارفه أنه راح يطلقها والشغله خربانه خربانه.. بس هي ما تبي تضربه، على أساس ما يجوز، وأنها بتاخذ حقها بالمحكمه..
أقول لك ايش؟ المحكمه ما عبرتها بهالموضوع كملوا أمور الطلاق وبس، لا قانون ولا دين أنصفها هنا، لأن الشيخ يقول لا يجوز تضربه، والقانون مدري اشب أمه .
الحرمه مب ذاك الضعيفه وزوجها كان منتف وكانت تقدر تضربه على الأقل تاخذ حقها وتاخذ عبايتها وأغراضها طالما بيطلقها بكل الأحوال ، فين المشكله؟ لاحد يقول لي أنوثة المرأة، الحرمه مخوله أنها تعارك في معارك لو تبي.. ابحثوا عن قصة الصحابيه الي كانت تحمي الرسول في معركة من المعارك وحتى أن ضربة سيف أصابتها في ذراعها أو كتفها ، الحرمه كانت تحمل على عاتقها حماية الرسول في غزوه !! الرسول ما قال لها وخري عني أو قال لها انوثتك خربت !! عادي له مواقف بعد الحادثه كان يتكلم معها عن هالواقعه وله جمله نسيتها ، ما كان يخالف هالأمر يعني ..

أرجع أقول وأنا أنتف شعر رموشي

ليش الشيخ أفتى هالفتوى وعممها كذا؟؟
هل تعتقد لو هي ضربت زوجها في هذيك الليله المشؤومه كانت بتحاسب أمام الله؟ هل عليها اثم كونها مجرد إنسان له مشاعر وينقهر وينغبن ويحق له يعبر عن الي بخاطره؟؟ على طوووووول ( لا يجوز للزوجه ضرب زوجها ) !!

كلام من فتره ودي أقوله بعد ما قرأت نقاشات بهالمنتدى في مواضيع مختلفه لها علاقة بالدين..
ولاحظت شيء مزعج، وأعتذر مقدما ً على الاطاله، بس ما ودي أرجع أرد مره ثانيه فحطيت كل الي عندي دفعه وحده وبعضها بيطلع حبه عن الموضوع:

الناس رموا أدلة القرآن عرض الحائط اللعين ورجعوا لحكاية وش قال الشيخ فلان والإمام فلان!! هذولا الأئمة صاروا هم الفصل في المساءل المهمة وكأنهم لسان ربي ! وصار كلامهم يعلوا على كلام الله الواضح بظاهره ، ربي ما نزّل لنا لغز نستنبط منه (القرآن)..
إذا تعارض عندنا معنى صريح وواضح لآية مع معنى آخر مستنبط باجتهاد من آية أخرى فالبديهي اننا نعمل بالواضح، بل حتى لو تعارضت آية صريحه مع حديث صريح نعمل بالآية وكفى..

حال المجتمع مع الفتوى بهالزمن + انتشار الالحاد
ما ألوم الشيوخ والأئمة بالأخير كل واحد يندفن لحاله بقبره، وربي أعطاك يابن آدم عقل، يوم القيامه يحاسبك وش بتقول؟ فلان قال؟ ولا هذا ما وجدنا عليه آباءنا الأولين..
أساسا ً الشيوخ أنفسهم يختلفون بالمسائل، بس الشعب يروح ياخذ أصعب فتوى وأكثرها تشددا ً علشان يقول لك سد الذرائع.. ويدفنون أي فتوى أخرى ..
مع أن اختلافهم رحمه لنا فيسروا ولا تعسرون بهالشكل المقيت..

اللوم على المجتمع الي يكبر ويضخم أمور مثل هذي، وتعلموا من بعض الشيوخ كيف يكفرون ناس ويدخلون في نوايا بعض وينسفون أخلاق بعض بدون مايدرون عن مافي النفوس..

-----

شيوخنا ( بدون ما أعمم، الأغلب يعني ) ما يبينون لنا السبب ولا يبررون ليش أفتوا بهالأمر وعلى أي أساس.. ما يقنعونك، اتبعوا وانتم ساكتين ..
ترى ربنا رحيم وعارف أن فيه تفاوت بالعقول، ناس ذكيه ماتحب تمشي على شيء بدون ما تعرف ليش.. والدين مافيه أي شيء نخبيه أو نغطي عليه علشان يقولون لنا ( حرام تسألون وتناقشون علشان ما تلحدون ) والله تكلمت مع 3 ملحدين واقسم بالله ما لمتهم على أسبابهم.. وقلت لهم من الآخر روحوا اقرأوا القرآن وافهموا مصطلحاته وارجعوا اسلموا ولا يكثر، أسبابكم هذي مب من الدين لا تخافون انتم باقي عالمله لأن الدين مب صناعة صاروخ، الدين شيء يستحنه العقل والذوق العام، الي يخالفها اتركه إذا كان خيارك الثاني هو الالحاد .. وإذا شيخ أو مفتي أعطاك شيء بدون مبرر اتركه، ياخي عالأقل مسلم ويرتكب إثم أهون من ملحد .. تنفرون الناس من الدين علشان أمور لها نصيب من التقاليد أكثر مما هي من الدين..

التعمق في الأحكام وطلب الاقتناع مب حرام أو إلحاد.. فيه شيوخ ما يعلمونا ليش حرموا شيء أو أجازوه وكأننا جهله وظيفتنا نعطل عقولنا وما نفكر، ولو حاولنا نفكر كفرّونا وحذرونا من الإلحاد.

إبراهيم عليه السلام سأل الله أن يريه كيف يحيي الموتى، ربي ما رفض أو نهره عن هالشيء، بالعكس قال له خذ أربعة من الطير .... إلى آخر الآية ..

موسى طلب أن يرى الله ! والله سبحانه ما نهره لكن قال له لن تراني وأنظر للجبل..

البخاري الي ماعمرهم قرأوه
لما قرأت البخاري اكتشفت أن فيه أحاديث تندفن وماحد يرجع لها ما أدري وش السبب..
مع أنها تعتبر فاصله في أمور كثير بحياتنا..
قبل لا تفصفصون أحكام المرأة وتبدأون حملات لإصلاحها وإرجاعها لعهد الجاهليه ليش ما الشيوخ يقضون تماما ً على الظواهر الأهم في المجتمع، التفحيط والسرقه والدرباويه والحشيش الي منتشر بكل مكان والبلاوي الأخرى، يكفي أن فيه شذوذ بهالبلد منتشر بشكل يخوف وماحد يتكلم عنه.. وينكم عن العزايم والتكلف الي فيها والذبايح والنعمه الي تنكب بالزبايل وفينكم عن الفلوس الي تروح عبث على نياق وهبل فاضي مخيس.. وتجون تمنعون الحرمة تمد يدها على زوجها ؟؟؟ مدري أضحك ولا أبكي صراحه

والسموحه على الإطاله وكم قطره من الفيضان طفرت برا الموضوع