الموضوع هذا شرعاً لا أحد يختلف عليه ابداً ..
ولكن العيب واللوم والعادات عندنا كعرب بكل صراحة يحكمنا اكثر من غيره ..
فالبيئة التي نشأنا فيه , منذ كنا صغاراً ( عيب عليك مجرد تحط راسك برأس بنت )
وانغرس هذا الشي فينا حتى اصبحنا أباء , فلا نرضا الضرب على أخواتنا
ولا نرضا الضرب على زواجتنا , والخ ..
انا بتكلم عن نفسي , وعن البيئة الي عشت فيها
بكل صراحة تعتبر حالة ( شاذة , وفعل شنيع ) احد يضرب زوجته ..
مهما صار ومهما بلغ الامر , مد اليد على الزوجة كأنه مد يد على ابوها واخوانها واهلها اجمعين ..
فلذالك اشوف الرجل الي يضرب زوجته ( شي غريب جداً ) ..
وماراح ابالغ ولا اجامل , ولكن المرآه الي تدخل بيت اهلها مضروبة من زوجها
(( لو يحب السماء , ماترجع له ))
لو الدنيا بما فيها ( يفرشها ورد ) ماترجع له ..
خلاص طفشتك , رفعت ضغطك , ياخي بسيطة جداً
معاد لها خاطر عندك ..
حطها عند اهلها واشرح لهم وصدقني راح يتفاعلون معاك ويوقفون بصفك اذا معاك حق ..
اما تمد يدك على ( أم عيالك ) يعلم الله انها كبيرة وعيب ..
لا احد يجيني يقولي , مهما سوت , مهما فعلت , مهما ومهما
ياخي اقولك لو ترفع يدها عليك .. امسك يدها وعباتك وبيت اهلها ..وشاهدين وانتهى الامر ..
انت مااخذتها من بيت اهلها بالقوة ورفع اليد
اخذتها بالرفق واللين
انا استغرب بصراحة , من بعض المجتمعات عندنا بالمملكة
اخته تنضرب عادي عنده ..
ماراح اذكر اسماء قبائل ابداً
ولكن بحكم انتقالي الى بيئة عمل ( يوجد فيها الكثير من الثقافات والاراء )
وجدت البعض يقول عادي اختي تنضرب من زوجها .. ؟؟!!
شي عجيب بكل صراحة , انا انصدمت وتفاعلت
حتى وصلت لمرحلة صوتي ارتفع تلقائي
لان البيئة الي اعيش فيها , ما تسمح لي اسوي هذا الشي ابداً ..
حالات نادرة جداً وتعتبر شاذة
في نهاية الامر ( الانثى , ضعيفة جداً )
والرفق واللين والتعامل الحسن والاحترام والتقدير
افضل بكثير من العنف ومد اليد .. مهما بلغ الامر
انت كرجل ( تستطيع من نظرة عينك فقط أن تجعل من آمراتك تسكت وتنصت لك )
لذالك لا تجعل من نفسك تصل لمرحلة , تخرج فيها عن طورك .. وتندم