العام غير وهالسنه خاطري غير
من يوم ماجالك على البعد طاري
اوميت لك عند الموادع كما الطير
يوم ابعده طلعن طوته الصحاري
وعودت مالي عن همومي معاذير
الا رجاي وعزتي واعتباري
ادري على الفرقى حدتك المقادير
ولاانت بعلى توديع الاحباب ظاري
وتدري لك بقلبي معزه وتقدير
وانك تموت ولاتشوف انكساري
ياأول حبيب ماانصفته التعابير
واخر حبيب له جميل اعتذاري
يامشغلن بال القصايد عن الغير
ياضحكة ايامي وسجة نهاري
ويا أبعد من ايام الرخا للمعاسير
واقرب من هيام القمر للمساري
ويا أقسى من الدمعه على وجنة صغير
وارق من لفحة نسيم العصاري
اغليك ياوجه الحيا والتباشير
وابيك لو منت عن الحال داري
شوفتك حلم وليلة الوصل تفسير
غيبتك علم وفيض حزني مواري
ماعاد لك ياهاجس الشعر تغيير
اموت ولاّ أخذ من الوقت ثاري؟!
ابنتظر حزة رجوعك على خير
لاكن طلبتك لايطول انتظاري