وينك فقدتـك يابعـد روح مغليـك
طوّل غيابك وإشتعل جمـر شوقـي
عسى الغياب اللـي بعيـدٍ موديـك
عني يكون الخيـر مانـع وعوقـي
في غيبتك كـل المشاعـر تناديـك
ترجي رجوعك والأمـل بالشروقـي
أرجع فديتـك ياغلاتـي لارأضيـك
الحـزن نـوُخ والهنايـا سروقـي
والصبح ذاك الصبح يومي أحاكيـك
متألـم لفقـدك ويسـأل خفـوقـي
وينـه حبيبـك ما أشوفـه حواليـك
غابت رعوده عنْكْ وغابت بروقـي
وكل السحاب بدنيتـك راح ناسيـك
وأصحت سماك بشمس تلهب حروقي
من بعد ماكان المطـر دوم يسقيـك
أبشوفتـه كـل المشاعـر تروقـي
هذا الصباح اللـي بحضنـه ألاقيـك
شاحب ويبكـي غيبتـك مايفوقـي
وكل الذي حولي تحـرى حراويـك
ساعةرجوعك يمطر الفرْح فوقـي
بُعدك غرق في موج حزني وأياديـك
هي النجاة أرجوك أنـا مـد طوقـي
من كثر ما كلي آمـل ألتقـي فيـك
نبضي نطق وينك ويبكيـك موقـي
علمني وينـك ياحياتـي وأنا أجيـك
لو الخطر سايد في كـل الطروقـي