4/4/1438 || 2/1/2017
مرحباً يارفاق
عدا اختبار المحاسبه الحمد لله وقلت دامني مروقه
خن امر على ستار بكس اخذ رشفة كراميل ماكياتو اللذيذ
و بعدها مريت عالتميمي اقضي اغراض للبيت < ماخذه دور أمي هالمره .
وبعدها رحت البيت و طلبت عشا من كنتاكي
وبعد ماتعشيت .. قررت افرمت جوالي لأنه يعلق ويطفي
وفرمته وكان الوقت متأخر على الساعه 12 الليل
انا فرمت الجوال وتوهقت فيه
لاني ماعرف ل بعض الاشياء
سويت حساب جديد وينشب لي بمكشلة البرامج
ما اقدر احملها ويالله بالموت استوعبت ادور حل من احد
واستعنت بصديق لين الساعه 4 الليل وانا احوس بالجوال!!!
يالله تعدل اختفيت عن العالم لمدة 3 ساعات ونص ..
صليت الفجر الساعه 5 وربع ونمت
وبعد ماقمت اللي هو امس يعني
حسيت بثقل بمعدتي وجوعانه ولما جيت باكل ما احس اني اقدر
< كل هذا بوقت العصريه
لين جا المغرب ورحت اجيب حلا ل خواتي
واخذت لي كوكيز كندر واكلته
وبعدها مدري وش حسيت فيه
قلت خل انسدح كود انام وانسى ويروح التعب < فيها قوة صبر ماشاء الله
ومير ماقدرت
الساعه 9 ونص دخلت المستشفى
وهاتك ياسدحه من 10 الى 12 الليل وانا بمغذي وابر
يالله تعبت بهاليوم
وراح يوم كامل مادرست المادة اللي اختبارها باجر " مبادئ رياضيات 1 "
اليوم الصباح بديت بمحاضرة
طبعاً انا دارستها قبل بس لازم اخذ اللفة الاخيره من جديد ..
خذت المحاضره الاولى وماقدر اجلس رحت نمت لين الساعه 1 ونص الظهر
صحيت وحسيت اني زينه وقلت خلاص اتغدى وابدأ اذاكر
ابي انجح فيها ان شاء الله ما ارسب :(