عسى قبرٍ يضم عظام غالي
يساقا من مراويح السحايب
تبل اللي فراقه سمّ حالي
بكيته حاظرٍ وابكيه غايب
رحل باللي من الدنيا صفالي
اخذ روح الشباب وصرت شايب
على عيون العرب داله وسالي
وانا قلبي عقب فرقاه ذايب
لهيب الشوق وسط الجوف صالي
دواه اليوم قد شد الركايب
ياليت اللي طرالي ماطرالي
وعن بعض الاماكن صرت تايب
اروح لما نزله اول وتالي
واعود منه وضلوعي حطايب
تساوى الوقت من مرٍ وحالي
وعفت اللي لنفسي كان طايب
شكيت البيت والبيت اشتكالي
جراله ماجرالي من عقايب
ياسِعد اللي تنسّيه الليالي
ولاضرّه مفارقة الحبايب
على الذكرى بعيش اللي بقالي
اناجي من سكن تحت النصايب

اتمنى تنال اعجابكم
وربما تكون اخر مشاركه

سعد الروقي