# تجربتك في اعداد مشروع التخرج
تجربه تخوف في البدايه وتمغصك أحياناً بس مع الوقت تستمتع وتحس إنك جالس تسوي شيء كبير .. أهم شيء ماتخليه هاجسك طول الترم وتهمل باقي المواد..
أهم نصيحة أقدر أقدمها لكم واللي أخذتها من ( خريج سابق ) واللي فعلاً أستفدت منها أنه لاتروح تعصر مخك وتتحدى المستحيل عشان تجيب موضوع متفرد من نوعه
أهم شيء موضوع تتمكن منه حتى لو كان مكرر نوعاً ما .. وحتى لو حسيته تافهه بس أهم شي تأدي المطلوب منك واللي هي العشر الأيتمز اللي مفروض تكون موجوده بكل بحث ..لانه أصلاً البحث مقسمه درجاته على كل نقطه من هالنقاط ولاتنسون أنه في يدكم 30 درجه على تحميل المحاضرات وإرسالها بالموعد يعني بأذن الله النجاح أكيد ..
# من هو مشرفك و التواصل بينكم
مشرفتي ( فاطمة ) عن طريق الإيمييل الجامعي طبعاً .. وهو أسهل وأضمن مهما تفلسف المتفلسفون يبقى إيميليك الجامعي أسهل طريقه للتواصل وبصراحه إني أتعجب من اللي يروح يسوي له إيمييل أو يرسل من إيميله الخاص ( دوشه مالها داعي ) خلاص عندك ايميل برقمك الجامعي من لمن تسجل بالجامعك وإيميلك مفعل أستخدمه ولاتضيع وقتك وتتوه نفسك .. اللي سويته إني نزلت ( outlook) على جوالي وفتحت إيميلي الجامعي وصرت أشيك عليه يومياً في البدايه أرسلت الموضوع : وردت خلال يومين بالموافقه ( الأغلب أنه مايرفضون أي موضوع ) واذا كان عام تتطلب تخصيصه زياده ..
بعدين الثيسس استيتمت أخذت ( أسبوع وردت ) وبعدين الفرست ( أرسلت أخر يوم تسليم وأخذت تقريبا 5 أسابيع حتى ردت ) وبعدين الفاينال ( ردت بنفس اليوم اللي أرسلته وطلبت أرفعه على الأيقونه )
وبصراحه اذا عرفت مشرفك مين ؟؟ يروح نص الهم لأنه بعضهم أشرار :D ( عرفتوا أقصد مين )
# ومالذي ساعدك في اختيار موضوع بحثك
والله من البدايه ماكنت ابغى موضوع غريب وجديد اللي سويته أنه نزلت كل الأبحاث الموجوده أخذت فكره عامه وبعدين لاحظت كثير كاتب عن ( إكتساب اللغه عن طريق الميديا أو وسائل التواصل الإجتماعي )
وأخذت في بالي هذا الموضوع وكتبت عن اكتساب مهارة الكلمات بواسطة قنوات التليجرام ( كمان اللي ساعدني أختار هالبرنامج ) أم حمادة اللي تشرف على البحوث مشكورة
#المشاكل التي واجهتك
المشكله الكبرى مالقيت أبحاث كاتبه عن هالموضوع وتعبت وتمنيت إني تأكدت أكثر .. يعني أي موضوع تبغى تكتب فيه تأكد أنه له مراجع وابحاث سابقه عشان تساعدك بالموضوع
#المخاوف التي أحاطت بك اثناء اعداد البحث
جاني الوسواس اللي صاب الكل .. هل وصل الإيميل ولا .. لا .. خصوصاً لمن تتأخر علي وأرجع أرسل نفس الرساله لإيميلي صار صندوق الوارد مليان من رسايلي :D
#ملاحظات
1/فعلياً المشروع لو جلست عليه جلسه ماياخذ إلا أسبوع بالكثير .. اللي يبغى يبدأ ويبحث ويخاف أنه موضوعه ينرفض .. أقول بأذن الله ماراح يرفضون أي موضوع تقدر تبدأ وتسوي وتبحث وتقدر تخلص منه وتفتك
2/ كثرت المواضيع بشأن خطوات المشروع وشرحها والكل ماقصر لكن ماعمري قرأت موضوع متكامل وسهل ومرتب مثل موضوع ( دوريمي ) ماشاء الله عليها الله يحفظها هالبنت .. والله شرحها أغناني عن أي موضوع ثاني حتى ماتوهت نفسي وقرأت هنا ولا هنا أكتفيت بموضوعها وكل ماأخلص خطوة أرجع أقرأ مره ثانيه ( الله يوفقها ويكتب أجرها )
3/ الحمد لله بفضل من الله أخذت 98 في مشروع التخرج .. ولله الحمد ..