|
رد: من الظلمآت الى " النور !
-
ابي البر 
اكثر شي يبسطني البر ولو لحالي انبسط .. احب السعه
وش احلى من النومة بعد صلاة العشاء و تقوم نص الليل ترجف من البرد واللي جنبك يقوم من طقطقة اسنانك 
ورغم البرد مدري شلون دفيت ورقدت مره ثانيه وقمت على صلاة الفجر وتوضيت بماء بارد يصقع بالعظم وتحتسب الاجر 
تصلي وتعين خير وترجع تنسدح ماعندك نت علشان تتسلى بالجوال ولاعندك تلفزيون ماتسمع الا تسبيح وتهليل اللي بجنبك وتشاركه الذكر 
حتى يتبين الخيط الابيض من الخيط الاسود ويغزيك قطيع الغنم تسمع الصوت برا واذا طلعت لقيت هذا المنظر
(ضباب خفيف وارض خضراء وغنم داخل خيمة المؤونة الغذائيه)  ..
وتطلع جدتك وراك تقول انا راعية الغنم نوره وتهش الغنم بعصاها 
بعد هذا المشهد
الكل نايم ولاعندك حطب وتبي تسنع القهوة والشاهي لجدتك وللي بيقوم بعد ساعه من الان ..
تعصب راسك وتبدا رحلة البحث عن الحطب ملتهي بالبحث وابعدت عن المخيم وضعت وبيمينك حزمة حطب ومتوهق ماتدري وين الدرب
يالله على بابك
تعود على خطاك الاوله ويعينك الله وتلقى ربعك ..
تنسى اللي صار وتسكت عن النكبة علشان محد يقول لك " فضيخ "
تشب ضوك وتحط الما والى اخره ..
الضحى تعصب راسك وتبدا رحلة البحث عن فقع ..
والظهر ترجع تصلي وتتغدا وجلسة سواليف وعلوم غانمة ..
بعد صلاة العصر لعب وسباق ..
بعد صلاة المغرب قصيد ونشيد ..
بعد صلاة العشا النوم يارفاق
ولا فيه شي بالحياة يغثك ابد عايش حياه ثانية ..
لذلك انا ابي البر اذا ضقت واابي البر اذا فرحت وابي البر في كل وقت 
اذا شفتوا سالفتي طويلة زي الحين يعني تراني ضايقه .gif "(269)")
|