يامِا عطِينا ومِا حسبنِا عطانِا
ويا ما أخذنا من الزمان التجاريب
واللي بيدينا ما يطول معانا …
واللي يدش الجيب يطلع من الجيب
قل للضعوف اللي تفتش ورانا
تبطون / ما تلقون فينا ولا عيب
ياللي تعذربنا وتبحث خفانا
راجع حساباتك وتلقا العذاريب
وأن كان تنشد عقبها وش بلانا .. ؟
حنا بلانا الطيب ونموت بالطيب
الطيب خير من الردى في هوانا
واللي هوا له شي فيما هوا يشيب
نفتل شواربنا ونكرم لحانا
أن كانها في حق وإلا مواجيب
ونحمي عوايدنا وستر قصرانا
ونفزع ليا منه عوا الذيب للذيب
ونلبي المحتاج لامن نصانا
ونعاونه ولا ندور مكاسيب
وما نسال المحتاج وشهو جزانا
الله يجازينا وهو عالم الغيب
ونقدر الداعي ليامن دعانا
وفي مشينا هيبه وعز وتراحيب
والشر نقصر عنْه والله كفانا
لكن لاثارت يدينا مخاضيب
ما أقول محد ٍ واصل ٍ مستوانا
كل ٍ له فعوله وله قسم بالطيب