هناك مقولة مشهورة لآينشتاين، وهي "إذا لم تستطع أن تشرحها بشكل سهل فأنت لم تفهمها جيدا"
يعني لما أحب أشرح شي بشكل مبسط جدا لازم أكون ملم فيه بشكل جيد.
بس قبل كم يوم قرأت كلام يخالف مقولة آينشتاين، خلاف ظاهري وليس بالكامل
بما معناه - أن الفهم الكامل لموضوع معين ممكن يكون مانع لإيصال المعلومة بشكل سهل.
القصد إنك لما تكون فاهم موضوع معين وتجي تكلم شخص ثاني عنه فتكلمه على أساس إنه هو بعد فاهم.
مثلا لما تبي تشرح لواحد كيف يبرمج قناة في الدش، تقول له "اكتب التردد الفلاني " هنا ممكن الشخص يقول لك اكتبه وين بالضبط، غير إنه ممكن يتلخبط لما يشوف أشياء ثانية مثل الاستقطاب وغيره
انت طبعا فاهم وممكن خبير بعد، ومفترض إنه فاهم الأشياء الأساسية هذي، فتشرح اللي تشوفه مهم بس.
لذلك أحيانا تلاقي دكتور في الجامعة وعنده أبحاث علميه ومشاركات في مجلات ومؤتمرات عالمية لكن الطلاب يشتكون من شرحه السيء، ويكون السبب هو أنه فاهم التخصص بشكل كبير جدا ويفترض شيء قريب من ذلك لدى الطلاب.
علشان كذا لما الشركات تحط كتيب التعليمات لأي منتج تستخدم شرح مفصل بشكل يفهمه أي شخص، ويعبر عنه بـ "أكتب بشكل يفهمه جدي وجدك".
يعني ممكن أستخلص إنك إذا بغيت تشرح بشكل سهل لازم تكون فاهم وفي نفس الوقت عارف مستوى الشخص اللي تشرح له.