|
خذاني الرزق منها , وأنت أخذك الرّدي !
السلام عليكم ..
لوّح على البعد قبل انهار والا أهلك
انا من الثقل ماتقدر تلوّح يدي !
من حولي الناس لكنّي ادور بفلك
فيه الصبر مايجمّل ، والحزن سرمدي
تمّر صدري تبختر وانت على مْهلك
تبي تأكد اذا جرحك بصدري ندي !! ..
ضاع عمري .. وانا اللي ماوصلت اولك
ليتني ذاخرٍ عمري قبل لا ابتدي !
ساعدني اذهلك ، ودي من زماان اذهلك
لو الثمن كان بين مواجعي وسهدي
ما أجمل اسمي بصوتك وانت ما اجملك
كنّه يطبطب على قلبي ويمسك يدي !
الشاعر الفذّ ، في وصفك لسانه يلك
انت فوق الطبيعة ما لوصفك مدي
ومخاوي الليل الاسود لـ إدلّهم وحلك
غطّه بخصلات شعرك لو تبيه يغدي
وصلت نجد العذية ؟ كيف ما اوصلك ؟
في داري اللي احتوتني وإشهدت مولدي ..
ومن فوقها ضمّة اجدادي وشالت هلك
لو جوّها عج قلت انه مطر وبردي !
اجهل اسامي شوارعها كثر ما اجهلك
خذاني الرزق منها وانت اخذك الردي
زعفران  ..
|