موضوع جميل وشهر عليكم مبارك جميعا بلغنا الله صيامه وقيامه
دخولي للجامعه جا بسبب تغريده شخص الله يذكره بالخير ناسي منهو ما عرفه طبعا لكن اذكر تغريدته
( الحقو اليوم اخر تقديم للجامعه لها الترم سجل بياناتك على هالرابط )
طبعا انا من عام ١٤١٧ دخلت كلية المعلمين ولا كملت ثم دخلت جامعة الملك سعود القصيم وجبت معدل زين ونقلت للرياض
وبعد مشيئة الله وبسبب دكتور اتهاوشت معه طلعت من باب الجامعه ولا عاد رجعت ركبني جني ذاك اليوم
توظفت واخذت دبلوم حاسب سنتين وشايل فكرة الجامعه ذي من راسي مرررررره
وعندي واحد في المكتب درس فيها ودايم يقولي ادرس ولا جبت خبره مطنش ويوم جا بيتخرج
صدفه طاحت عيني على هالتغريده قلت وش اني خسران خل اقدم ولا قبلوني الا ثالث دفعه
وادرس ترم ما علمت احد قلت ان استمريت بلغت اهلي وان تعثرت خلاص سكت ولا كلمت
المهم اني عديت الترم الاول وقلت لبنيتي روحي علمي ابوي وامي اني نجحت بالترم الاول في الجامعه
هي قالت لهم والا ما قالت لهم امي بكت وقامت حبت راسي الله يطول بعمرها وابوي ما قدر يقوم ولا يبدي اي ردة فعل مصدوووم
من بكره حب راسي ويقول لي ما قدرت اقوم من الفرحه
الله يطول بعمرهم ويرزقني برهم
ومن عقب هالموقف عاهدة نفسي اني بإذن الله اني اجيبها لهم هديه لهم
والحمد لله هذانا اليوم خلصنا وبإنتظار نتيجه التخرج الله يكتبها لنا جميعا ويوفقنا واياكم لما يحب ويرضى ويفرحنا بتخرجنا بهالشهر الكريم