الشهر عليكم مبارك
اخذو ردها أنا موظف فني في صحة نجران من عام 1426 وجات لنا بعثة الملك عبدالله رحمه الله واسجل فيها وبعدها اختبرونا في جده والحمد لله عديت الاختبار ولكن للاسف ما طلع اسمي مع الاسماء اللي ترشحت وقلنا يالله لعله خير وبعدها بسنه جا تمديد لبعثة الملك عبدالله الله يرحمه 5 سنوات ورجعت وسجلت فيها وارتفعت الاوراق للوزارة ولكن للاسف المرشحين من نجران 42 والمطلوب 3 وكالعاده اشوف اسمي اول واحد زحلط قلنا يالله عساها خيره لنا وبعدها سجلت في جامعة الملك عبدالعزيز وجامعة نجران وجاني قبول فيها كلهاا واخترت نجران لانها قريبة من اهلي وعملي المهم بدينا واجيب معدل فوق 4 اول ترم وثاني ترم كذلك وكان فيه صيفي في رمضان وسجلت فيه ونزل لي 3 مواد ولكن الله لايوريكم اختبرت اول اختبار كان رياضيات طلع الاختبار ما فيه خيارات كله اشرح وعلل وعرف وحل المسائل التالية يالربع ايش العلم قالو هذا نظام الجامعة مافيه خيارات الا بالترم الاول والثاني وبعدها يعطونك دفتر تحل كانك في الثانوية وانا موظف ومشغول بعائلة اييييييييييه صار عندي ردة فعل وانصدمت كثير لكن لازال عندي اصرار وبالصدفة كان ولد عمي معي في نفس الصيفي وقال انا والله ماعاد اختبر وباتجه لجامعة فيصل حاولت اقنعه وقال لا تحاول وقال لي ترا التسجيل بينتهي بعد يومين المهم رجعت البيت ونفسيتي سيئة جدا وبعد ما تسحرت قلت ياولد ليش ما اسجل في جامعة فيصل وانتظر نتائج جامعة نجران ودخلت على الموقع وسجلت والحمد لله انقبلت في جامعة فيصل وانتظرت نتائج جامعة نجران ولكن كانت المفاجاة رسبت في 3 المواد الصيفي وبعدها فصلت من نجران وارسلت اوراقي لجامعة فيصل وبديت فيها ومع ذلك كان دوامي ضغط شوي وبعد الترم الاول اشتريت لي أرض وبديت ابينها ولمدة سنتين وأنا ابني وادرس واداوم وود عامل نزل عامل جب غرض نزل غرض والمشكلة ماتجي طلباتهم اكثر الا وقت الاختبارات المهم الحمد لله انا خلصت بيتي وسكنته من سنه رغم كل اللي واجهته من ظروف وتحديات الحياة
وكان في احد الاترام دخلت الوالدة العناية اثر جلطة دماغية والحمد لله عدت وطلعت من المستشفى وهي الان في اتم نعمه نحمد الله ونشكره طبعا الكلام هذا غير المشاكل الخارجية اللي يسببونها بعض الناس اللي فاضية وتبحث عن مشاكل رغم ذلك صبرنا وتحملنا وتجاوزنا كل هالتحديات والحمد لله انا متخرج هالترم وبتقدير ممتاز مع مرتبة الشرف الاولى
اسمحوني على هذه الاطالة ولكن يشهد ان هالموضوع خلاني اتكلم واشكي لكم معاناتي وكل المواجهات والتحديات اللي واجهتنا ولو ما ادري انكم زي اخواني واخواتي ماشرحت لكم قصتي كلها
وفي الختام تقبلوا تحياتي