قال عليه الصلاة والسلام : ( من حُسن إسلام المرء تركه ما لا يعنيه )
هذا الحديث أصل من أصول الأدب في الإسلام قال أبو داود : ( هذا الحديث نصف الإسلام , بل هو الإسلام كله ) لهدرجه نعم لهدرجه ؟
- لأن الإنشغال بالبشر يسمح للإنسان إنه ينسى نفسه ويتهاون بعيوبه وينزل بقيمته لمستوى غير لائق ويصبح غثيث ومكروه التصرف هذا يسبب مشاكل وحساسيات ويألم قلوب ويجرحها دهر وقد يفرقهم عمر < أعجبتني هنا المهم هذا كله بسبب رأي ماله قيمه ..
إنت لسى ما تخرجت ؟
ليه سميتو ولدكم تمساح ؟ كان سميتوه ضفدع أحلى ليه ما تنفخين وجهك ؟ سوي فيلر !
أنت ليه ما تتزوج الثانية ؟
ليه رجلك ما يسفركم إزعلي منه لو مكانك مااصبر !
ليه ما تشتري سياره جديدة ما مليت من ذي يا أخي قدمت وماتت سنتها ؟ ليه بيتكم صغير كذا ؟ ليه ولدكم نحيف سمنوه ؟
ليه ما حملتي لسى سوي أطفال أنابيب !
ليه بس عندك ولدين ؟
ليه خشمك كبير قصيه ؟! ليه ماعندك شغاله لو مكانك ما أتحمل أزعلي عند أهلك ؟
وصار تخبيب بيوت البشر بسيط وسهل ! للأسف
أقولك شيء وما تزعل ! " ........"
لآ تكفون لآ تقولون أساساً البشر ما تبي تسمع شيء يضايقها ليش النكد بس ؟
عزيزتي أو عزيزي من باب اللطافه : كونو مهذبين في حديثكم وقيسوه على أنفسكم !
وتحمّلو مايجيكم ممكن تسمعون شيء ما تتوقعونه الأفضل ( دعو الخلق للخالق )
وممكن ماتسمعون بس بيدعون عليكم ويتحسبون الله فيكم !
قال الحسن البصري (علامة إعراض الله تعالى عن العبد أن يجعل شغله فيما لا يعنيه )
إذا أحسنتم فلنفسكم !
لا تستهينون بقوة الكلام وأثره في نفوس الناس , من أنواع النعيم إن الإنسان لا يسمع كلام مؤذي وغير مريح للنفس و هالشيء من نعيم الجنة
( لا يسمعون فيها لغواً ولا تأثيماً إلا قيلاً سلاما سلاماً ) ..
وبعضهم للأسف تغيب عنهم حدود الحوار وحدود الأدب واللباقة..
ويا شين اللقافة إذا تغلفت بنصيحه !
أعتذر لو أطلت الحديث #فضفضة ووجهة نظر.