صباح الخير

زحمه ومل الطريق معاتبي للطريق
حتى تلاشى مع الأيام حلم وجلس

مع الوجيه الغريبه جيت ادور صديق
لكن وجيه الغرابه في بعضها فلس

ياوين ابلقاك ياوجهٍ تحث الرفيق
للنور تاخذ يديني من ظلام وغلس

اصارع الضيق من ياسي وادور مضيق
فيه اتخبا عن الخيبات واهل الهلس

يا موسع الأرض والدنيا بدت بي تضيق
مما رأت عيني اليمنى غشوش وخلس

مليت من حالي الشينه وحال الغريق
لاضاق فيه النفس ماهو مدور علس

يالله وانت الكريم اللي بحالي رفيق
جنبني اللي لمحته من خداع ودلس

وابعد مابيني وبين الثرثره والنعيق
واصحاب كثر المشاكل والكذوب الملس

ولاحان يوم الوداع بلا زفير وشهيق
برحمتك روح عبدك في هوان وسلس

ماعاد باقي طريق ومل راع الطريق
والحلم عيا يتقدم واستخار وجلس

محمد الشمري