[align=center][table1="width:100%;background-image:url('https://e.top4top.net/p_835xv8011.png');"][cell="filter:;"][align=center]
ربي إغفرلي يا ربي يا غفار الذنوب
يوم ما ينفع عيال آدم إلا أعمالها
وأجعل السيئات مني طريقه لأجل أتوب
و إجعل الحسنات مني بعشر أمثالها
أنت ياللي فضلك إمدِيمْ ماهوب محجوب
يوم خلقك فضلها مرتبط باحوالها
فاطر السبع السماوات ما مسك لغوب
ما عزب عن شوفك الذره و مثقالها
جعلني يارب لاني قنوط ولا شجوب
نفس ما انت تّولاها لا مولى لها
لا تكلني ليّ وانا نوب يا صبري ونوب
اتحايل دمعة الياس ولا احتالها
تشرق الدنيا على الكل لكن الغروب
يوجع قلوب المجاريح بس لحالها
نفسي أنفس تجمد من الظلام وما تذوب
لين يرد الها الشعاع ويرد اشعالها
الجروح أنواع وأقسى الجروح أم الثقوب
إن بقت عزّى لها وإن برت عزّى لها
إن دخلها النور شبت من الذكرى شبوب
وإن طلع منها ترك من وراه ظلالها
فدام هذا الليل ياخذ سعادات القلوب
ليت لامنه خذاها يرد بدالها
ان تغصّبنا براضي رضينا بمغصوب
شرهة الدنيا على الطيب من رجالها
يا وسع صدر الحقيقه على ضيق الكروب
مالك الأحمال ماهو مثل حمّالها
الاماني حيلة العجز و ابليس اللعوب
والله انه خير من طردها همالها
كل عارق راس يرقى يدور للهبوب
وتضربه بجنوبها وتضربه بشمالها
ما خلق ربي جبال البسيطه للركوب
بس حنا من شقاوتنا نرقى لها
غربة أصحاب الفضايل نسميها هروب
ولا حنا من هرب ليشوف أفضالها
إن شعبتوها شمال أو شعبتوها جنوب
ما عقب هجّ الضوامر سوى زِرفالها
ما لحق عوص النجايب دليل ولا طلوب
ظلها ما غير تبرى له ويبرى لها
علم اللي يحسب انه على الدنيا محسوب
ناس واجد ميته لو مشت بأزوالها
لا تعد الشعب كله يا عداد الشعوب
الشعوب تعرفها لا عرفت أبطالها
والبطوله في السلام ؟ البطوله في الحروب !
وغامض أهوال السلام أعظم من أهوالها
يجعل الله الدواهي عن الباقي تنوب
لا تساوى جاهل القوم مع عَقّالها
المنيفه للمنيفين راعين الوجوب
الله اللي نزّل الناس في منزالها
جاهل الطرقه لامن مشا يعثر بطوب
وان بدا من نصفها ما عرف كمّالها
مرجفين الأرض وأهل الصياحات الطنوب
ما تفرق بين همّالاها و مهالها
ياكبير الهقوه اللي من الخيبه غضوب
ليت نيات الأوادم تصير اشكالها
لا تدور في رفوف ولاتدور في جيوب
أوجع رساله هي اللي تعيد إرسالها
إن كرهك من القريبين منقوصٍ عجوب
المحبه مشكلتها مع جهالها
حتى هذا الحب نفسه ترى ماهو محبوب
في ناس تشوف منه سبب غربالها
أكثر اللي يدورون العيوب أهل العيوب
مدمن الحاجه هو اللي فقط يسعى لها
طبع اثاري مقدم القوم خلفه في الدروب
وطبع أثاري خطوت الراجعين إقبالها
خير كل الضحك عاجله إلا في الخطوب
كلما جت ضكتك في الأخير أحلى لها
لا تغرك كلمة الحق من فم الكذوب
الكذوب يشوفها كذب لو هو قالها
..
.. لسماع القصيدة بصوت الشاعر من.. هنآ 
لسماع القصيدة كشيله من.. هنآ ملاحظة الصور من تصميمي
[/align][/cell][/table1][/align]