..

..

زان طرق المحبه .. للمواليف صبه .. وصوتك العذب طبه .. يا حميد السجايا


بشتكي لك من اللي .. قدله سنين خلي .. صد واليوم من لي .. غير رب البرايا


في صدوده تجنا .. وفي الغياب إشتحنا .. وفي حضوره فتنا .. عن جميع الصبايا


بوصلة شوق قلبي .. عارفة وين دربي .. تتجه صوب حبي .. من جميع الزوايا


يا غرامي وشفي .. ليه عني مقفي .. نبض صوتك يدفي .. غير باقي المزايا


لك وصوف لحالك .. وأنا قلبي حلالك .. فارق في جمالك .. تفرح بك المرايا


خذت تاج الولايف .. دون جهد وكلايف .. والعذارى الوصايف في حضورك رعايا


منك يا شيب عيني .. والله إنك ظنيني .. يا حلاوة سنيني .. شف جروحي هدايا


في جروحي تطبب .. دام قلبك تسبب .. ولك ضلوعي تشبب والمحاني شظايا


والختم يا غناتي .. معك معنى حياتي .. كيف بالله أحاتي .. وإنت وسط الحنايا

..

..