خل حبل السّانيه بين النحر والغارب
لا تقفّاها على السّاقه ولا تنطحها
خلّها لا سَلمَت الّلحيه وسَلْم الشّارب
منت باللي تكتب السّيّه ولا تمسحها
خَل اهل مارب تجرّب حظها في مارب
لين تقنع من خسايرها ومن مربحها
وان لقيت جحَارة الدّيبَان والعقارب
لا تقُوم ( تدَوّر العِيدَان ) وتفتحها
دام ماالله كلّفك بالمنسدح والهارب
مر عُوج الناس واتركها على مَسدَحها
لو يرُوح النوخذه والا يرُوح القارب
غلطةٍ ماهيب لك من قال لك صحّحها
الأوادم شرّها من خيرها متقارب
من خلقنا الله وحنا ذمّها وامدحها
والزمان مشمّرٍ كمّه وكَفه ضارب
عالَمٍ تحتال فيه .. وعالَمٍ يذبحها