أعترف أن الأخطاء الإملائية تنرفزني شوي
خصوصا لما أشوفها من جهات رسمية
أحيانا الواحد يغلط سهوا، بس لما تكون في جهة رسمية سواء أهلية أو حكومية، والأدهى لو كانت جهة أكاديمية، وإعلان رسمي، هنا تكون أعظم
الناس العاديين نقول أوكيه نفوتها، بس جهة أكاديمية تسعى لتكون بمصاف الجامعات العالمية وهي واجهتها الإعلامية والرسمية ضعيفة في لغتها الأم
هذا اللي يحصل لما تنفق مئات الملايين على تطوير الواجهة المادية للجامعات بس التنمية البشرية حاطها على الهامش، طبعا كل ما كنت بعيد عن مكتب المدير كل ما كنت مهمش أكثر
يعني الأبواب مكتوب عليها إسحب وإدفع مع الهمزة وهي المفروض بدون همزة، قلنا هذي عادي تفوت على ناس واجد ما نبي نتشدد، ولو إنه في جامعة المفروض ما تحصل
لكن أشوف إعلان وش كبره في جامعة وش كبرها وعريقة وكاتبين بالبنط العريض "مبناء"
وش خليتوا لخريجين الابتدائية إذا انتوا جامعة وتغلطوا هالغلط
أذكر من تخرجنا من الابتدائي خلاص ما نغلط هالأغلاط
مرة قبل عدة سنوات مدرس انسرقت سيارته، راح حط إعلان في المدرسة كاتب "فُقدة سيارة"
حسيت وقتها الوضع مأساوي، لو طالب بنمشيها، بس مدرس، قوية
هذا غير الخطأ المتكرر في عبارة "يعلن عن بدء التسجيل" دائما تنكتب خطأ كذا "يعلن عن بدأ التسجيل" والمشكلة يكون إعلان عن دورات تعليمية
ما قلنا الغلط جريمة، بس غلطة إنسان عادي، مو مثل غلطة جهة رسمية وواجهة دولة المفروض كلها كفاءات أكاديمية عالية المستوى