|
رد: ♥ تتشآبه أنتَ و قهـوتيِ كثيراً .. في اللذة وَ المرارة وَ الإدمَان ♥
الشيء اللي ماكنت أعرفه ... " إن بعض قصص الأنبياء مخيفة للأطفال "
مع طقوس ما قبل النوم سألوني عن سيدنا يوسف عليه السلام وأيش قصته ؟ وكم عدد أخوانه ؟ تحمسوآ بالمره لما بدأت أروي لهم الأحداث
فجأه بعد ما ذكرت إن أخوانه كادو له وقررو يقتلونه كانت ملامحهم ماتنوصف من الصدمه
كيف أخوان طيب ؟ وفجأه ماما عادي أجي جنبك ؟ الثاني خاله خليني أجي معه ؟
الكبار شوي كانو جادين واحد منهم قال : لو أيش ما يصير ما أفكر أقتل أخوي عادي لو تزاعلنا
أنا هنا بدأت أقلق من هذي الفكرة .. شرحت لهم إنها من آلاف السنين وكيف كانو زمان الأخ يقتل أخوه
طمعاً منه في الحكم والسلطة وهالأمور ..
بعد ما تطمن بالي رجعت أكمل الأحداث تدرون صعب جداً تشرح لطفل أحداث أكبر منه
لما وصلت القصه لإمرأه العزيز وكيف راودته عن نفسها .. والقميص إنه شق من دبر < ذا الكلام كيف ينشرح ؟ 
فكرت ولقيت أنسب شيء أقول لهم تبي تتزوجه وهو رافض فقرر يهرب منها وهي حاولت تمنعه
ومسكته من قميصه .. لأن بشرح فقرة الطفل اللي تكلم عن القميص ؟
وأثناء ما شرحت إن الطفل تكلم ؟ إنقطعت القصة بسؤال ؟ طيب هو ثاني يوم صار يتكلم خلاص 
كنت صادقه : ماأدري 
ورجعنا لأحداث القصه وفجأه يوم القيامة راح نشوفه ؟
قلت لهم الساعه لا تقوم إلا على شرار الخلق بس يعني المسلمين ما راح يشوفونها
بتجي ريح طيبة وتقبض روح كل مسلم ...
فجأة الملامح تغيرت والوجه صار عابس ولفه على اليمين ماما ترى إنتِ جالسة تخوفيني
كيف كذا يعني روحي تطلع مع الريح وأنا من فوق أشوف جثتي طايحه على الأرض < ما أدري أضحك وإلا أحزن 
نقز الصغير قال عادي بتكون مع المسلمين وتعطيك جثتك أحلى حبتين وتقولها باي وأنت مبسوط
طبعاً يتكلم وهو لاصق فيني من بداية القصة 
ومن بعدها أي مكان يروح لازم ياخذ أحد معه ماتوقعت قصص الأنبياء مخيفه طبعاً مو كلها قبل
كذا تكلمت معهم عن صالح علية السلام والناقة ويونس علية السلام والحوت .. وكانت مسألة يومين وعادي راح الخوف
الوالد الله يحفظه عودنا دائماً على جلستنا معه بعد رجعته من صلاة الفجر
فكانت القصص والحكايات والمعلومات تنعطى لنا بهذا الوقت ولليوم مستمرة الفرق صرت أجلس معه أنا وأحفاده 
من صغري أعشق قصص الأنبياء وكنت ما أفوت حلقات الدكتور طارق السويدان
ولما كبرت شوي يجذبني أسلوب نبيل العوضي
وصباح الخير والبركة  
|