من الأشياء المهمة في التعامل مع الآخرين هي احترام ميولهم واهتمامتهم
مثلا لو شفت أحد زعلان ان فريقه انهزم وانت ما تتابع كورة وتعتبرها مجرد لعبة غلط انك تستسخف زعل الشخص لأن النتيجة بتكون زعل منك انت أيضا
أو مثلا بنت خايفة من حشرة، أو طفل معجب بشخصية خيالية، أو شاب مهتم بهواية معينة
أذكر مرة كنا في مناسبة عائلية وجالسين نسولف مع بعض القرايب اللي ما شفناهم من زمان، أخوي كان يسولف مع واحد قريبنا يحب يربي طيور ومهووس بهذي الهواية، أخوي من باب الميانة وانهم بنفس العمر وأصحاب صار يبتسم ويقول له وش لك بهالسوالف وعوار الراس وصار يتكلم معاه على إنه شيء ما يسوى وكله وصاخة وتعب، فصاحبنا بدأ يصير كلامه جد وكأنه بدأ يزعل من أخوي فأنا لمحت لأخوي بإنه يسكر السالفة قبل ما تتطور لزعل، وعاد زعل القرايب شين
يعني لو أحد زعلان من شي وتقول له ما عندك سالفة انت هنا تعطيه سالفة جديدة للزعل. مهم جدا تحتوي الآخرين وتحترم تفكيرهم وميولهم وتتفهم مشاعرهم
السبب البايخ عندك هو منطقي جدا عندهم، والمهم عندك ممكن يكون بايخ عندهم
ويهمك إنك لما تزعل من شي محد يستخف بسبب زعلك أيضا